സാധാരണക്കാർക്ക് താങ്ങാവുന്ന നിരക്കില് യാത്രയ്ക്ക് 10 വന്ദേമെട്രോ ട്രെയിനുകള് കേരളത്തിലും വരുന്നു. എല്ലാ പ്രധാന സ്റ്റോപ്പിലും നിറുത്തുന്ന എ.സി ട്രെയിനാണ്. 100-130 കിലോമീറ്റർ വേഗത്തിലോടും. ടിക്കറ്റ് ബുക്കിംഗ് സൗകര്യമുണ്ടാകില്ല. അതത് സ്റ്റേഷനില് നിന്ന് ടിക്കറ്റെടുക്കാം. ഒരു കോച്ചില് 100 പേർക്ക് ഇരുന്നും 200 പേർക്ക് നിന്നും യാത്ര ചെയ്യാം.
ജൂലായില് പരീക്ഷണ ഓട്ടം തുടങ്ങും. മാസങ്ങള്ക്കകം സർവീസും. കുറഞ്ഞ നിരക്കുള്പ്പെടെ തീരുമാനിച്ചിട്ടില്ല. സൂപ്പർ ഫാസ്റ്റിന്റെ നിരക്കാവാനാണ് സാദ്ധ്യത. എറണാകുളത്തു നിന്ന് കോഴിക്കോട്ടേക്കാണ് ആദ്യ സർവ്വീസ്. തിരുവനന്തപുരം – എറണാകുളം, കോഴിക്കോട്- പാലക്കാട്, കോട്ടയം – പാലക്കാട്, എറണാകുളം- കോയമ്ബത്തൂർ, മധുര- ഗുരുവായൂർ, കൊല്ലം- തിരുനെല്വേലി, കൊല്ലം – തൃശ്ശൂർ, കോഴിക്കോട്- മംഗലാപുരം, നിലമ്ബൂർ – മേട്ടുപ്പാളയം എന്നിവയാണ് മറ്റു സർവീസുകള്.
ഇപ്പോഴുള്ള രണ്ട് വന്ദേഭാരത് സർവ്വീസുകളും വൻ ലാഭത്തിലാണ്. വന്ദേമെട്രോയ്ക്ക് കേരളത്തെ ആദ്യ ലിസ്റ്റിലുള്പ്പെടുത്താൻ കാരണവുമിതാണ്. 10 കോടിയാണ് ഒരു കോച്ചിന് നിർമ്മാണച്ചെലവ്. കപൂർത്തല റെയില് കോച്ച് ഫാക്ടറിയിലും പെരമ്ബൂർ ഇന്റഗ്രല് കോച്ച് ഫാക്ടറിയിലുമായി 400 ട്രെയിനുകളാണ് ഈ വർഷം പുറത്തിറക്കുക. പരമാവധി 250 കിലോമീറ്റർ ദൂരം കണക്കാക്കിയാണ് സർവ്വീസ്.
മെമുവിനെ വന്ദേഭാരത് മോഡലില് പരിഷ്കരിച്ച രൂപമാണ് 12 കോച്ചുള്ള വന്ദേ മെട്രോ.ഭക്ഷണമൊഴിച്ച് വന്ദേഭാരതിലെ സൗകര്യങ്ങള് മെട്രോയിലുണ്ടാകും.ഇവയ്ക്കുള്ളിൽ ലഭ്യമാകുന്ന ആധുനിക സൗകര്യങ്ങൾ ചുവടെ വായിക്കാം.
ഓട്ടോമാറ്റിക് വാതിലുകള്, വലിയ ചില്ല് ജന്നാലകള്, കോച്ചുകളെ ബന്ധിപ്പിച്ച് വാതിലുകൾ
ഡിജിറ്റല് റൂട്ട് – സ്റ്റോപ്പ് ഇൻഡിക്കേഷൻ ഡിസ്പ്ലേ, മൊബൈല് ചാർജ്ജിംഗ് സൗകര്യം,ക്യാമറ
ആധുനിക ടോയ്ലെറ്റുകള്, അപകടമൊഴിവാക്കാൻ കവച് ഡിജിറ്റല് സെക്യുരിറ്റി സംവിധാനം
