അപകടങ്ങള്‍, ശസ്ത്രക്രിയകള്‍, പ്രസവം, ചില രോഗാവസ്ഥകള്‍ എന്നിവയില്‍ ജീവന്‍ രക്ഷിക്കാന്‍ രക്തം നല്‍കുന്നത് (Blood Transfusion) ആവശ്യമായി വരാം. എന്നാല്‍ രോഗിക്ക് അനുയോജ്യമല്ലാത്ത രക്തം നല്‍കിയാലോ? ശരീരത്തിന്റെ പ്രതിരോധസംവിധാനത്തെ മുതല്‍ വൃക്കകളുടെ പ്രവര്‍ത്തനത്തെ വരെ ബാധിക്കാവുന്ന ഗുരുതരമായ പ്രത്യാഘാതങ്ങള്‍ ഇതുമൂലം ഉണ്ടാകാം. അറിയാം, തെറ്റായ രക്തഗ്രൂപ്പ് സ്വീകരിക്കുന്നത് എത്രത്തോളം അപകടകരമാണെന്ന്.
എന്തുകൊണ്ടാണ് രക്തഗ്രൂപ്പ് പൊരുത്തപ്പെടേണ്ടത്?
സാധാരണയായി രക്തഗ്രൂപ്പുകളെ എ, ബി, എബി, ഒ (A, B, AB, O) എന്നിങ്ങനെ നാലായി തിരിച്ചിരിക്കുന്നു. ചുവന്ന രക്താണുക്കളുടെ ഉപരിതലത്തിലുള്ള പ്രത്യേക ഘടകങ്ങളാണ് ഈ ഗ്രൂപ്പുകള്‍ നിര്‍ണയിക്കുന്നത്. ഇതിനു പുറമേ രക്തം പോസിറ്റീവ് ആണോ നെഗറ്റീവ് ആണോ എന്ന് നിര്‍ണയിക്കുന്ന Rh ഘടകവുമുണ്ട്. ഓരോ വ്യക്തിയുടെയും രക്തത്തിലെ പ്രതിരോധഘടകങ്ങള്‍ വ്യത്യസ്തമായിരിക്കും. അനുയോജ്യമല്ലാത്ത രക്തത്തിലെ ചുവന്ന രക്താണുക്കള്‍ ശരീരത്തില്‍ എത്തിയാല്‍ പ്രതിരോധസംവിധാനം അവയെ തിരിച്ചറിഞ്ഞ് ആക്രമിച്ചേക്കാം. ഇതാണ് രക്തകൈമാറ്റവുമായി ബന്ധപ്പെട്ട ഗുരുതരമായ പ്രത്യാഘാതങ്ങള്‍ക്ക് കാരണമാകുന്നത്.
transfusion of the wrong blood type
തെറ്റായ രക്തം നല്‍കിയാല്‍ ശരീരത്തില്‍ എന്ത് സംഭവിക്കും?
പൊരുത്തപ്പെടാത്ത ചുവന്ന രക്താണുക്കള്‍ ശരീരത്തിലെത്തുമ്പോള്‍ അവ നശിപ്പിക്കപ്പെടുന്ന അവസ്ഥയുണ്ടാകാം. ഇതിനെ ഹീമോളിസിസ് (Hemolysis) എന്നു വിളിക്കുന്നു. ഈ പ്രക്രിയയിലൂടെ പുറത്തുവരുന്ന ഘടകങ്ങള്‍ ശരീരത്തിന്റെ സാധാരണ പ്രവര്‍ത്തനങ്ങളെ ബാധിക്കുകയും ഗുരുതരമായ ആരോഗ്യപ്രശ്‌നങ്ങളിലേക്ക് നയിക്കുകയും ചെയ്യാം. ഇത്തരം പ്രതികരണം ഉണ്ടായാല്‍ ചിലരില്‍ താഴെ പറയുന്ന ലക്ഷണങ്ങള്‍ പ്രത്യക്ഷപ്പെടാം.
