ദേശീയ പള്സ് പോളിയോ ഇമ്മ്യൂണൈസേഷന് പരിപാടിയുടെ ഭാഗമായി അഞ്ച് വയസ്സു വരെയുള്ള കുട്ടികള്ക്കുള്ള തുള്ളി മരുന്ന് വിതരണം നാളെ (ജൂണ് 28ന് ) നടക്കും. പരിപാടിയുടെ ജില്ലാതല ഉദ്ഘാടനം പടിഞ്ഞാറത്തറ ബസ് സ്റ്റാന്റില് രാവിലെ 9.30ന് പ്രിയങ്കാ ഗാന്ധി വാദ്ര എം.പി നിര്വ്വഹിക്കും. കൃഷിവകുപ്പ് മന്ത്രി അഡ്വ. ടി സിദ്ദീഖ് അധ്യക്ഷനാകും. ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണന്, കല്പറ്റ ബ്ലോക്ക് പഞ്ചായത്ത് പ്രസിഡന്റ് കെ.കെ ഹനീഫ, ജില്ലാ കളക്ടര് ഡി ആര് മേഘശ്രീ, സംസ്ഥാന നിരീക്ഷകന് ഡോ.വി ജിതേഷ് തുടങ്ങിയവര് പങ്കെടുക്കും.
ജില്ലയില് 52,175 കുട്ടികള്ക്ക് പള്സ് പോളിയോ തുള്ളിമരുന്ന് നല്കും. ഇതിനായി 561 പള്സ് പോളിയോ ബൂത്തുകള് സജ്ജമാക്കിയിട്ടുണ്ട്. ആരോഗ്യ കേന്ദ്രങ്ങളിലും അങ്കണവാടികളിലുമുള്ള 523 ബൂത്തുകള്ക്ക് പുറമേ യാത്രാവേളയില് കുഞ്ഞുങ്ങള്ക്ക് വാക്സിന് നകുന്നതിന് ബസ് സ്റ്റാന്റ്, വിനോദ സഞ്ചാര കേന്ദ്രങ്ങള് എന്നിവിടങ്ങളില് 23 ട്രാന്സിറ്റ് ബൂത്തുകളും അതിഥി തൊഴിലാളികളുടെ താമസസ്ഥലങ്ങള്, ദുര്ഘട പ്രദേശങ്ങള്, ഉത്സവസ്ഥലങ്ങള്, എന്നിവയുള്പ്പെടെ ജനങ്ങള് എത്തുന്ന സ്ഥലങ്ങളില് തുള്ളിമരുന്ന് നല്കുന്നതിനായി 15 മൊബൈല് ബൂത്തുകളും സജ്ജീകരിച്ചിട്ടുണ്ട്. ഏതെങ്കിലും കാരണവശാല് പള്സ് പോളിയോ ദിനത്തില് ബൂത്തുകളില് എത്താത്ത കുഞ്ഞുങ്ങള്ക്ക് ജൂണ് 29, 30 തിയതികളില് വീടുകളിലെത്തി വാക്സിന് നല്കും. പ്രത്യേക പരിശീലനം ലഭിച്ച ആശ പ്രവര്ത്തകര് ഉള്പ്പെടെയുള്ള ആരോഗ്യ പ്രവര്ത്തകര്, അങ്കണവാടി, കുടുംബശ്രീ പ്രവര്ത്തകര്, സാമൂഹിക സന്നദ്ധ പ്രവര്ത്തകര് എന്നിവര് ചേര്ന്നാണ് വിതരണം നടത്തുക. ആരോഗ്യവകുപ്പിന്റെ നേതൃത്വത്തില് ആരോഗ്യകേരളം, തദ്ദേശസ്വയംഭരണ വകുപ്പ്, വനിതാ-ശിശു വികസന വകുപ്പ്, പൊതുവിദ്യാഭ്യാസ വകുപ്പ്, കുടുബശ്രീ മിഷന്, സാക്ഷരതാ മിഷന് തുടങ്ങിയ സര്ക്കാര് വകുപ്പുകളുടെയും റോട്ടറി ഇന്റര്നാഷണല്, ലയേണ്സ്, ഇതര സന്നദ്ധസംഘടനകളുടെയും ആഭിമുഖ്യത്തിലാണ് പരിപാടി നടക്കുക.
