ന്യൂഡൽഹി: ബാങ്കുകളിൽ അഞ്ചുവർഷമായി അവകാശികളില്ലാതെ കെട്ടിക്കിടക്കുന്നത് 1,43,619 കോടി രൂപ. കഴിഞ്ഞ സാമ്പത്തികവർഷം മാത്രം 42,272 കോടി രൂപയാണ് പൊതു-സ്വകാര്യ ബാങ്കുകളിലായി കുമിഞ്ഞുകൂടിയത്. പൊതുമേഖലാ ബാങ്കുകളിൽ 36,185 കോടിയും സ്വകാര്യ ബാങ്കുകളിൽ 6087 കോടിയുമാണുള്ളത്.
2014-ൽ രൂപവത്കരിച്ച ഡിപ്പോസിറ്റർ എജുക്കേഷൻ ആൻഡ് അവയർനസ് ഫണ്ടിലാണ് ഈതുക നിക്ഷേപിച്ചിട്ടുള്ളത്. നിക്ഷേപകനെ കണ്ടെത്താനും തിരികെനൽകാനുമുള്ള ബോധവത്കരണപ്രവർത്തനങ്ങളിലൂടെ അഞ്ചുവർഷത്തിനുള്ളിൽ മടക്കിനൽകാനായത് 5729 കോടി രൂപ മാത്രം. ബാക്കി ഇപ്പോഴും ബാങ്കുകളിൽത്തന്നെയാണെന്ന് റിസർവ് ബാങ്ക് ഓഫ് ഇന്ത്യയുടെ കണക്കുകൾ വ്യക്തമാക്കുന്നു.
സാധാരണക്കാരായ അക്കൗണ്ടുടമകളുടെ ചെറിയതുകകൾമുതൽ ഇതിൽപ്പെടും. പൊതുമേഖലാ ബാങ്കുകളിൽ സ്റ്റേറ്റ് ബാങ്ക് ഓഫ് ഇന്ത്യയിലാണ് കൂടുതൽ അനാഥപ്പണം. 2022-23 സാമ്പത്തികവർഷംമാത്രം 8086 കോടിരൂപ ആരും വരാതെ ബാങ്കിൽ ബാക്കിയായി. 2.18 കോടി അക്കൗണ്ടുകളിലായാണ് ഇത്രയും തുക. പഞ്ചാബ് നാഷണൽ ബാങ്ക്, കനറാ ബാങ്ക്, ബാങ്ക് ഓഫ് ബറോഡ, യൂണിയൻ ബാങ്ക് എന്നിവയാണ് തൊട്ടുപിന്നിൽ.
സാമ്പത്തികവർഷം, പൊതുമേഖലാ ബാങ്ക്, സ്വകാര്യബാങ്ക്, തുക എന്ന ക്രമത്തിൽ
2018-2019 2019-2020 2020-21 2021-22 2022-2023
പൊതുമേഖലാ ബാങ്ക് 15,090 19,425 23,683 27,921 36,185
സ്വകാര്യബാങ്ക് 2694 3380 4141 5013 6087
പ്രധാന പൊതുമേഖലാ ബാങ്കിലെ തുക കോടിയിൽ (2022-23 സാമ്പത്തികവർഷം)
*എസ്.ബി.ഐ.: 8086 കോടി (2.18 കോടി അക്കൗണ്ട്) *പി.എൻ.ബി.: 5340 കോടി (1.5 കോടി അക്കൗണ്ട്) *കനറാ ബാങ്ക്: 4558 കോടി (1.56 കോടി അക്കൗണ്ട്) *ബാങ്ക് ഓഫ് ബറോഡ: 3904 കോടി (89 ലക്ഷം അക്കൗണ്ട്) *യൂണിയൻ ബാങ്ക് ഓഫ് ഇന്ത്യ: 3177 കോടി (11 ലക്ഷം അക്കൗണ്ട്) *ബാങ്ക് ഓഫ് ഇന്ത്യ: 2557 കോടി (92,56,380 അക്കൗണ്ട്) *ഇന്ത്യൻ ബാങ്ക്: 2445 കോടി (85,21,423 അക്കൗണ്ട്) *ഇന്ത്യൻ ഓവർസീസ് ബാങ്ക്: 1790 കോടി (46,17,573 അക്കൗണ്ട്) *സെൻട്രൽ ബാങ്ക് ഓഫ് ഇന്ത്യ: 1240 കോടി (30,84,349 അക്കൗണ്ട്) *ബാങ്ക് ഓഫ് മഹാരാഷ്ട്ര: 838 കോടി (18,63,192 കോടി അക്കൗണ്ട്) *യൂക്കോ ബാങ്ക്: 583 കോടി (14,78,743 കോടി അക്കൗണ്ട്) *പഞ്ചാബ് ആൻഡ് സിന്ധ് ബാങ്ക്: 494 കോടി (12,56,602 അക്കൗണ്ട്).
പണം തിരികെനൽകാൻ ബാങ്ക് നടപടിക്രമം
*10 വർഷത്തിനുമുകളിലുള്ള അവകാശികളില്ലാത്ത നിക്ഷേപത്തെക്കുറിച്ച് വെബ്‌സൈറ്റിൽ വിവരം നൽകും.
*ഇടപാടുകാരനെയോ അവകാശികളെയോ കണ്ടെത്താൻ ശ്രമംനടത്തും
*അക്കൗണ്ടുകൾ നിബന്ധനകൾക്കനുസൃതമായി തരംതിരിക്കും.
*കാലാകാലങ്ങളിൽ അവകാശി എത്തിയോ എന്ന് പരിശോധിക്കും.
*അര്‍ഹതപ്പെട്ട അക്കൗണ്ട് ഉടമകളെ നിശ്ചിതസമയത്തിനുള്ളില്‍ കണ്ടെത്താനുള്ള തീരുമാനം റിസര്‍വ് ബാങ്ക് കൈക്കൊള്ളണം. അത് പാലിക്കാനും സാമൂഹിക ഉത്തരവാദിത്വം ഏറ്റെടുക്കാനും ബാങ്കുകളെ ബാധ്യസ്ഥരാക്കണം. കെ.വൈ.സി. ഇല്ലാത്ത എല്ലാ ഇടപാടുകാരുടെയും അക്കൗണ്ടിലുള്ള തുക റിസര്‍വ് ബാങ്കിന് കൈമാറാനാണ് പ്രധാനമായും ഇപ്പോഴുള്ള നിര്‍ദേശം. നേരത്തേയുള്ള അക്കൗണ്ടുകളില്‍ കൃത്യമായ വിലാസവും നോമിനിയെ രേഖപ്പെടുത്തുന്നതിനുള്ള നിര്‍ബന്ധവും ഉണ്ടായിരുന്നില്ല. ഇതുകാരണമാണ് പല അക്കൗണ്ടുകളും മരവിച്ചുപോകുന്നത്.
-എ. രാഘവന്‍, മുന്‍ ജനറല്‍ സെക്രട്ടറി, സ്റ്റേറ്റ് ബാങ്ക്‌സ് സ്റ്റാഫ് യൂണിയന്‍
