ഉലകനായകൻ കമല്‍ഹാസനെ നായകനാക്കി സ്റ്റാർ ഡയറക്ടർ ശങ്കർ സംവിധാനം നിർവഹിക്കുന്ന മാസ്റ്റർപീസ് ചിത്രം ‘ഇന്ത്യൻ 2’വിന്റെ ട്രെയിലർ റിലീസായി. ലൈക പ്രൊഡക്ഷൻസിന്റെ ബാനറില്‍ സുബാസ്കരനും റെഡ് ജെയന്റ് മൂവീസും ചേർന്ന് നിർമ്മിക്കുന്ന ഈ ബിഗ് ബജറ്റ് ചിത്രം ശ്രീ ഗോകുലം ഗോപാലന്റെ ഉടമസ്ഥതയിലുള്ള ശ്രീ ഗോകുലം മൂവീസാണ് കേരളത്തില്‍ വിതരണത്തിനെത്തിക്കുന്നത്. ജൂലൈ 12 ന് ചിത്രം തിയേറ്ററുകളിലെത്തും.
https://youtu.be/3bvBUT5pQYY
എസ് ജെ സൂര്യ, കാജല്‍ അഗർവാള്‍, രാകുല്‍ പ്രീത് സിംഗ്, ബോബി സിംഹ എന്നിവർക്കൊപ്പം നെടുമുടി വേണു, വിവേക് എന്നിവരും താരനിരയിലുണ്ട്. ഇരുവരുടേയും മരണശേഷം പുറത്തിറങ്ങുന്ന ചിത്രം എന്ന രീതിയില്‍ ഇന്ത്യൻ 2 വലിയ വാർത്താപ്രാധാന്യം നേടിയിരുന്നു. ഇരുവരും ഉള്‍പ്പെടുന്ന രംഗങ്ങളും ട്രെയിലറിലുണ്ട്.
‘ഇന്ത്യൻ 2’വിന്റെ തിരക്കഥ ബി ജയമോഹൻ, കബിലൻ വൈരമുത്തു, ലക്ഷ്മി ശരവണ കുമാർ തുടങ്ങിയ എഴുത്തുകാരുമായ് ചേർന്നാണ് സംവിധായകൻ ശങ്കർ തയ്യാറാക്കിയത്. കഥ സംവിധായകന്റേത് തന്നെയാണ്. 1996-ലെ ബോക്സ് ഓഫീസ് റെക്കോർഡുകള്‍ തകർത്ത് ബ്ലോക്ക്ബസ്റ്ററടിച്ച ‘ഇന്ത്യൻ’ എന്ന ചിത്രത്തിന്റെ തുടർച്ചയാണ് ‘ഇന്ത്യൻ 2’. 1996 മെയ് 9നാണ് ‘ഇന്ത്യൻ’ റിലീസ് ചെയ്തത്. അഴിമതിക്കെതിരെ പോരാടുന്ന സ്വാതന്ത്രസമര സേനാനിയായ സേനാപതിയെന്ന വൃദ്ധന്റെ റോളിലാണ് കമല്‍ഹാസൻ ‘ഇന്ത്യൻ’നില്‍ പ്രത്യക്ഷപ്പെട്ടത്.
ഛായാഗ്രഹണം: രവി വർമ്മൻ, ചിത്രസംയോജനം: ശ്രീകർ പ്രസാദ്, ആക്ഷൻ: അൻബറിവ്, പീറ്റർ ഹെയിൻ, സ്റ്റണ്ട് സില്‍വ, ഡിസ്ട്രിബ്യുഷൻ പാർട്ണർ: ഡ്രീം ബിഗ് ഫിലിംസ്, പിആർഒ: ശബരി.
