ഇടിച്ച വാഹനം തിരിച്ചറിയാത്ത (ഹിറ്റ് ആൻഡ് റണ്) റോഡപകടങ്ങളില് മരിക്കുന്നവരുടെ അവകാശികള്ക്ക് രണ്ടുലക്ഷം രൂപയും ഗുരുതരമായി പരിക്കേല്ക്കുന്നവർക്ക് 50,000 രൂപയും കേന്ദ്രപദ്ധതിയനുസരിച്ചു കിട്ടുമെങ്കിലും അപേക്ഷകർ തീരെക്കുറവ്. രാജ്യത്ത് ഒരുവർഷം ശരാശരി അറുപതിനായിരത്തിലധികം ഹിറ്റ് ആൻഡ് റണ് റോഡപകടങ്ങളുണ്ടാകുന്നുണ്ടെങ്കിലും നഷ്ടപരിഹാരത്തിന് അപേക്ഷിക്കുന്നവർ മൂവായിരത്തോളം മാത്രമാണ്. ഇതുസംബന്ധിച്ച ബോധവത്കരണത്തിന് കേന്ദ്രം സംസ്ഥാനങ്ങളോട് നിർദേശിച്ചിരിക്കുകയാണ്.
കേരളത്തിലെ മുഴുവൻ തദ്ദേശസ്ഥാപനങ്ങളിലും അറിയിപ്പെത്തി. പ്രശ്നത്തില് സുപ്രീംകോടതി ഇടപെട്ടതിനെത്തുടർന്നാണിത്. ഹിറ്റ് ആൻഡ് റണ് അപകടമരണവും പരിക്കുമുണ്ടായാല് അപേക്ഷിക്കേണ്ടതെങ്ങനെ, ഏതൊക്കെ രേഖകളാണു ചേർക്കേണ്ടത്, എങ്ങനെ പണം ലഭിക്കും തുടങ്ങിയ കാര്യങ്ങളെക്കുറിച്ചാണ് ബോധവത്കരിക്കേണ്ടത്.
ഇത്തരം അപകടത്തില്പ്പെടുന്നവർക്ക് എം.എ.സി.ടി. (മോട്ടോർ ആക്സിഡന്റ്സ് ക്ലെയിംസ് ട്രിബ്യൂണല്) വഴി നഷ്ടപരിഹാരത്തിന് കേസ് ഫയല് ചെയ്യാൻ സാധിക്കാത്തതിനാലാണ് ഹിറ്റ് ആൻഡ് റണ് മോട്ടോർ ആക്സിഡന്റ് സ്കീം-2022 പ്രകാരം നഷ്ടപരിഹാരം നല്കുന്നത്. ജനറല് ഇൻഷുറൻസ് കൗണ്സിലാണ് പണം നല്കുന്നത്.
അപേക്ഷ എങ്ങനെ ?hitandrunschemeclaims@gicouncil.in എന്ന ഇമെയിൽ വിലാസത്തിലേക്കാണ് നിർദ്ദിഷ്ട ഫോമിൽ മരിച്ചവരുടെ അനന്തരാവകാശികൾ ഗുരുതരമായി പരിക്കേറ്റവരോ അപേക്ഷകൾ സമർപ്പിക്കേണ്ടത്. വക്കീല് വഴിയും അപേക്ഷ നല്കാം. വിശദവിവരങ്ങള് https://www.gicouncil.in/insurance-education/hit-and-run-motor-accidents/ എന്ന ലിങ്കില് ലഭിക്കും.
ആവശ്യമുള്ള രേഖകള്: തിരിച്ചറിയല് കാർഡ്, ബാങ്ക് അക്കൗണ്ട് വിവരം, ചികിത്സാരേഖകള്, എഫ്.ഐ.ആറിന്റെ പകർപ്പ്, പോസ്റ്റ്മോർട്ടം റിപ്പോർട്ട് (മരണം സംഭവിച്ചെങ്കില്), മരണസർട്ടിഫിക്കറ്റ് / പരിക്കേറ്റതിന്റെ രേഖ.
നടപടിക്രമം: ഒരു മാസത്തിനുള്ളില് അപേക്ഷിക്കണം. അപകടംനടന്ന സ്ഥലവുമായി ബന്ധപ്പെട്ട തഹസില്ദാർ/ആർ.ഡി.ഒ. ആണ് അപേക്ഷ പരിശോധിക്കുക. ഇവരുടെ റിപ്പോർട്ടനുസരിച്ച് കളക്ടർ ക്ലെയിം തീർപ്പാക്കും. രേഖകള് കൃത്യമാണെങ്കില് പരമാവധി 30 ദിവസത്തിനുള്ളില് പണം അക്കൗണ്ടില് ലഭിക്കും.
