പ്രമേഹത്തെ അറിയാം, പ്രതിരോധിക്കാം; ആരോഗ്യകരമായ ജീവിതശൈലി ശീലമാക്കാം
ലോകമെമ്പാടും പ്രമേഹരോഗത്തെക്കുറിച്ചുള്ള അവബോധം വളർത്തുന്നതിനും രോഗപ്രതിരോധത്തിന്റെയും കൃത്യമായ ചികിത്സയുടെയും പ്രാധാന്യം ജനങ്ങളിലേക്ക് എത്തിക്കുന്നതിനുമായി എല്ലാ വർഷവും നവംബർ 14 ലോക പ്രമേഹദിനമായി ആചരിക്കുന്നു.ഇന്നത്തെ കാലഘട്ടത്തിൽ അതിവേഗം വർധിച്ചുവരുന്ന ജീവിതശൈലീ രോഗങ്ങളിൽ പ്രധാനപ്പെട്ട ഒന്നാണ് പ്രമേഹം. പ്രായമായവരിൽ മാത്രമല്ല, ചെറുപ്പക്കാരിലും കുട്ടികളിലും വരെ പ്രമേഹം കണ്ടെത്തുന്നത് ആശങ്കാജനകമാണ്. കൃത്യമായ ജീവിതശൈലി ക്രമീകരണങ്ങളിലൂടെയും സമയബന്ധിതമായ പരിശോധനകളിലൂടെയും ടൈപ്പ് 2 പ്രമേഹസാധ്യത കുറയ്ക്കാനും രോഗം നേരത്തേ തിരിച്ചറിഞ്ഞ് നിയന്ത്രിക്കാനും സാധിക്കും.എന്താണ് പ്രമേഹം?രക്തത്തിലെ ഗ്ലൂക്കോസിന്റെ അളവ് സാധാരണ നിലയേക്കാൾ ഉയരുന്ന അവസ്ഥയാണ് പ്രമേഹം. ശരീരത്തിൽ ഇൻസുലിൻ എന്ന ഹോർമോൺ ആവശ്യത്തിന് ഉൽപ്പാദിപ്പിക്കപ്പെടാതിരിക്കുകയോ ശരീരത്തിന് ഇൻസുലിൻ ഫലപ്രദമായി ഉപയോഗിക്കാൻ കഴിയാതിരിക്കുകയോ ചെയ്യുമ്പോഴാണ് പ്രധാനമായും ഈ അവസ്ഥ ഉണ്ടാകുന്നത്. കൃത്യമായ നിയന്ത്രണമില്ലാത്ത പ്രമേഹം ഹൃദയം, വൃക്കകൾ, കണ്ണുകൾ, നാഡീവ്യൂഹം തുടങ്ങിയ അവയവങ്ങളെ ഗുരുതരമായി ബാധിച്ചേക്കാം.പ്രമേഹത്തിന്റെ പ്രധാന ലക്ഷണങ്ങൾ തിരിച്ചറിയാംതാഴെ പറയുന്ന ലക്ഷണങ്ങൾ ശ്രദ്ധയിൽപ്പെട്ടാൽ രക്തത്തിലെ പഞ്ചസാരയുടെ അളവ് പരിശോധിക്കണം.* അമിതമായ ദാഹവും ഇടയ്ക്കിടെയുള്ള മൂത്രമൊഴിക്കലും.* പതിവിലധികം വിശപ്പ് അനുഭവപ്പെടുക.* കാരണമില്ലാതെ ശരീരഭാരം കുറയുക.* അമിതമായ ക്ഷീണവും തളർച്ചയും.* കാഴ്ച മങ്ങുക.* മുറിവുകൾ ഉണങ്ങാൻ കാലതാമസം നേരിടുക.* കൈകാലുകളിൽ മരവിപ്പോ തരിപ്പോ അനുഭവപ്പെടുക.* ആവർത്തിച്ചുള്ള അണുബാധകൾ.എന്നാൽ പ്രമേഹമുള്ള എല്ലാവർക്കും ഈ ലക്ഷണങ്ങൾ പ്രകടമാകണമെന്നില്ല. പ്രത്യേകിച്ച് ടൈപ്പ് 2 പ്രമേഹം ആദ്യഘട്ടത്തിൽ ലക്ഷണങ്ങളൊന്നുമില്ലാതെയും ഉണ്ടാകാം. അതിനാൽ പരിശോധനയാണ് രോഗം തിരിച്ചറിയാനുള്ള വിശ്വസനീയമായ മാർഗം.പ്രമേഹം വരാതിരിക്കാൻ എന്തുചെയ്യണം?ടൈപ്പ് 2 പ്രമേഹസാധ്യത കുറയ്ക്കുന്നതിൽ നമ്മുടെ ദൈനംദിന ജീവിതശൈലിക്ക് വലിയ പങ്കുണ്ട്.1. ആരോഗ്യകരമായ ഭക്ഷണം: പച്ചക്കറികൾ, പഴങ്ങൾ, പയർവർഗങ്ങൾ, നാരുകൾ കൂടുതലുള്ള ഭക്ഷണങ്ങൾ എന്നിവയ്ക്ക് പ്രാധാന്യം നൽകുക. മധുരപാനീയങ്ങൾ, അമിതമായ പഞ്ചസാര, സംസ്കരിച്ച ഭക്ഷണങ്ങൾ എന്നിവയുടെ ഉപയോഗം കുറയ്ക്കുക.2. വ്യായാമം ശീലമാക്കുക: ദിവസവും കുറഞ്ഞത് 30 മിനിറ്റ് നടക്കുക. ആഴ്ചയിൽ കുറഞ്ഞത് 150 മിനിറ്റ് മിതമായ ശാരീരിക പ്രവർത്തനങ്ങൾ ലക്ഷ്യമിടുക.3. ശരീരഭാരം നിയന്ത്രിക്കുക: അമിതവണ്ണവും വയറിലെ കൊഴുപ്പും പ്രമേഹസാധ്യത വർധിപ്പിക്കുന്ന ഘടകങ്ങളാണ്. ആരോഗ്യകരമായ ശരീരഭാരം നിലനിർത്തുക.4. ഉറക്കവും മാനസികാരോഗ്യവും: മതിയായ ഉറക്കം ഉറപ്പാക്കുകയും മാനസിക സമ്മർദം നിയന്ത്രിക്കുകയും ചെയ്യുക.5. പുകവലി ഒഴിവാക്കുക: പുകവലി ഉപേക്ഷിക്കുകയും ആരോഗ്യകരമായ ജീവിതശൈലി പിന്തുടരുകയും ചെയ്യുക.പരിശോധന വൈകിക്കരുത്കുടുംബത്തിൽ പ്രമേഹമുള്ളവർ, അമിതവണ്ണമുള്ളവർ, ശാരീരിക അധ്വാനം കുറഞ്ഞ ജീവിതശൈലി പിന്തുടരുന്നവർ, ഉയർന്ന രക്തസമ്മർദമോ മറ്റ് അപകടസാധ്യതകളോ ഉള്ളവർ എന്നിവർ ഡോക്ടറുടെ നിർദേശപ്രകാരം കൃത്യമായ ഇടവേളകളിൽ രക്തത്തിലെ പഞ്ചസാര പരിശോധിക്കണം.ഫാസ്റ്റിംഗ് ബ്ലഡ് ഷുഗർ, HbA1c തുടങ്ങിയ പരിശോധനകൾ പ്രമേഹം കണ്ടെത്താൻ സഹായിക്കുന്നു. പരിശോധനാഫലം വിലയിരുത്തി ആവശ്യമായ തുടർനടപടികൾ സ്വീകരിക്കേണ്ടതാണ്.പ്രമേഹം വന്നാൽ ജീവിതം അവസാനിക്കുന്നില്ലപ്രമേഹം കണ്ടെത്തിയാൽ ഭയപ്പെടുകയോ ചികിത്സ വൈകിക്കുകയോ ചെയ്യരുത്. ഡോക്ടറുടെ നിർദേശപ്രകാരം മരുന്നുകൾ കൃത്യമായി കഴിക്കുക, ഭക്ഷണക്രമം പാലിക്കുക, വ്യായാമം ശീലമാക്കുക, രക്തത്തിലെ പഞ്ചസാര നിരീക്ഷിക്കുക എന്നിവയിലൂടെ പ്രമേഹം ഫലപ്രദമായി നിയന്ത്രിക്കാം. സ്വയം ചികിത്സിക്കുകയോ ഡോക്ടറുടെ നിർദേശമില്ലാതെ മരുന്നുകൾ നിർത്തുകയോ ചെയ്യരുത്.അവബോധമാണ് ഏറ്റവും വലിയ പ്രതിരോധംലോക പ്രമേഹദിനം ഒരു ദിനാചരണം മാത്രമല്ല, ആരോഗ്യകരമായ ജീവിതത്തിലേക്കുള്ള ഒരു ഓർമ്മപ്പെടുത്തൽ കൂടിയാണ്. പ്രമേഹത്തെക്കുറിച്ചുള്ള അറിവ് ഓരോ കുടുംബത്തിലേക്കും എത്തണം. രോഗലക്ഷണങ്ങൾ തിരിച്ചറിയാനും സമയബന്ധിതമായി പരിശോധന നടത്താനും ആരോഗ്യകരമായ ജീവിതശൈലി സ്വീകരിക്കാനും ഓരോരുത്തരും തയ്യാറാകണം.പ്രമേഹത്തെ ഭയക്കേണ്ടതില്ല, അവഗണിക്കുകയുമരുത്. തിരിച്ചറിയുക, നിയന്ത്രിക്കുക, ആരോഗ്യത്തോടെ ജീവിക്കുക.പ്രമേഹത്തെ അറിയാം… പ്രതിരോധിക്കാം… ആരോഗ്യകരമായ നാളേക്കായി കൈകോർക്കാം.
കേരളത്തിൽ കൂടുതൽ സ്പീഡ് ക്യാമറകൾ വരുന്നു
സംസ്ഥാനത്ത് റോഡപകടങ്ങൾ കുറയ്ക്കുന്നതിന്റെ ഭാഗമായി കൂടുതൽ സ്പീഡ് ക്യാമറകൾ അടിയന്തരമായി സ്ഥാപിക്കാൻ നവംബർ 12-ന് കേരള ഹൈക്കോടതി നിർദ്ദേശം നൽകി. അപകടസാധ്യതയേറിയ മേഖലകൾ കണ്ടെത്തി കൃത്യമായ സമയബന്ധിതമായി കൂടുതൽ സ്പീഡ് വയലേഷൻ ഡിറ്റക്ഷൻ സിസ്റ്റങ്ങൾ (SVDS) സജ്ജമാക്കാൻ ട്രാൻസ്പോർട്ട് കമ്മീഷണറോട് കോടതി ബെഞ്ച് ആവശ്യപ്പെട്ടു. "അമിതവേഗത റോഡ് സുരക്ഷയ്ക്ക് കടുത്ത ഭീഷണിയാണ്", അതിനാൽ ക്യാമറ സംവിധാനങ്ങൾ അടിയന്തരമായി വ്യാപിപ്പിക്കണമെന്ന് കോടതി നിരീക്ഷിച്ചു. ഹർജി കൂടുതൽ വാദത്തിനായി നവംബർ 30-ലേക്ക് മാറ്റിയിട്ടുണ്ട്.അമിതവേഗതയും അപകടകരമായ ഡ്രൈവിംഗും തടയാൻ വരുംദിവസങ്ങളിൽ പരിശോധന കൂടുതൽ കർശനമാക്കും. നിലവിൽ അമിതവേഗതയ്ക്ക് ലൈറ്റ് മോട്ടോർ വാഹനങ്ങൾക്ക് 1,500 രൂപയും മീഡിയം/ഹെവി വാഹനങ്ങൾക്ക് 3,000 രൂപയുമാണ് പിഴ തുക. വാഹനം ഓടിക്കുമ്പോൾ ഫോൺ കൈയിലെടുത്ത് ഉപയോഗിച്ചാൽ ആദ്യതവണ 2,000 രൂപയും കുറ്റം ആവർത്തിച്ചാൽ 5,000 രൂപയും പിഴയൊടുക്കേണ്ടി വരും. ഫോൺ ഉപയോഗമല്ലാതെ അപകടകരമായ രീതിയിൽ വാഹനം ഓടിച്ചാൽ സെക്ഷൻ 184 പ്രകാരം കോടതി നടപടികൾ നേരിടേണ്ടി വരും.ദേശീയ നിർദ്ദേശങ്ങൾക്ക് അനുസൃതമായാണ് കേരളത്തിലും പുതിയ വേഗപരിധികൾ നിശ്ചയിച്ചിട്ടുള്ളത്. ആറുവരി ദേശീയപാതകളിലും നാലുവരി ദേശീയപാതകളിലും കാറുകൾക്ക് പരമാവധി 100 കി.മീ/മണിക്കൂറാണ് വേഗത അനുവദിച്ചിരിക്കുന്നത്. നാലുവരി സംസ്ഥാന പാതകളിൽ (എംസി റോഡ് ഉൾപ്പെടെ) 90 കി.മീ/മണിക്കൂറാണ് പരിധി. നഗര റോഡുകളിൽ ഇത് 50 കി.മീ/മണിക്കൂറായി തുടരും. കുറഞ്ഞ വേഗത നിർദ്ദേശിക്കുന്ന സൈൻബോർഡുകൾ ഉള്ളയിടങ്ങളിൽ അത് കൃത്യമായി പാലിക്കേണ്ടതാണ്.
താരങ്ങളെല്ലാവരും 7-ാം നമ്പര്‍ ജഴ്‌സിയില്‍, ഏഴാം മിനിറ്റില്‍ മത്സരം നിര്‍ത്തിവെക്കും, റൊണാള്‍ഡോക്ക്‌ ആദരമര്‍പ്പിക്കാന്‍ പോര്‍ച്ചുഗല്‍ ടീം
യുവേഫ നേഷന്‍സ്‌ ലീഗില്‍ ഡെന്‍മാര്‍ക്കിനെതിരെ പോര്‍ച്ചുഗല്‍ കളിക്കാനിറങ്ങുന്നത്‌ ക്രിസ്‌റ്റിയാനോ റൊണാള്‍ഡോക്ക്‌ ആദരമര്‍പ്പിക്കാന്‍ കൂടിയാണ്. ഇന്ത്യന്‍ സമയം ഞായര്‍ രാത്രി 1.15ന് ആരംഭിക്കുന്ന മത്സരത്തിന്‌ പോര്‍ച്ചുഗല്‍ താരങ്ങള്‍ ഗ്രൗണ്ടിലേക്ക്‌ പ്രവേശിക്കുക ക്രിസ്റ്റ്യാനോയുടെ ഐതിഹാസികമായ ഏഴാം നമ്പര്‍ ജഴ്‌സി ധരിച്ചിട്ടാകും. അന്താരാഷ്ട്ര ഫുട്‌ബോളില്‍ നിന്ന് വിരമിക്കല്‍ പ്രഖ്യാപിച്ച ക്രിസ്റ്റ്യാനോ റൊണാള്‍ഡോ പോര്‍ച്ചുഗല്‍ ഫുട്‌ബോള്‍ ഫെഡറേഷന്‍ ഒരുക്കുന്ന ആദരിക്കല്‍ പരിപാടികളോട്‌ സഹകരിക്കുന്നില്ല.വിട പറയല്‍ മത്സരം ആലോചിച്ചെങ്കിലും കോച്ച്‌ ഹോര്‍ഹെ ജെസ്യൂസിന്‌ കീഴില്‍ ഒരു മത്സരം കളിക്കാന്‍ തയ്യാറല്ലെന്ന നിലപാടിലാണ്‌ താരം.
നിരാശ, എങ്കിലും പ്രതീക്ഷ; നേരിയ വർധനവിലും സ്വർണവില 1 ലക്ഷത്തിനടുത്ത് തുടരുന്നു
സംസ്ഥാനത്ത് സ്വർണവില കുറയുമെന്ന് കരുതിയവരെ നിരാശരാക്കി സ്വർണവില കൂടി. പവന് 200 രൂപയാണ് കൂടിയത്. 1,00,920 രൂപയാണ് വിപണിവില. ഗ്രാമിന് 25 രൂപയാണ് കൂടിയത്. 12,615 രൂപയാണ് വിപണിവില.സ്വർണവില കുറഞ്ഞ് ഒരു ലക്ഷത്തിലെത്തും എന്ന പ്രതീക്ഷയിലായിരുന്നു സംസ്ഥാനത്തെ ആഭരണപ്രേമികൾ. അപ്പോഴാണ് പവന് 200 രൂപ കൂടിയത്. എങ്കിലും വില ഒരു ലക്ഷത്തിനടുത്ത് തന്നെ തുടരുന്നതിൽ ആഭരണപ്രേമികൾക്ക് ആശ്വാസമുണ്ട്. ഇക്കഴിഞ്ഞ നംവബർ അഞ്ചാം തിയതിയാണ് സ്വർണ വില വില 1,07,080 രൂപ എന്ന ഈ മാസത്തെ ഏറ്റവും ഉയർന്ന നില തൊട്ടത്. അവിടെ നിന്നും ഒരാഴ്ചയ്ക്കിടെ ഒരു പവൻ സ്വർണത്തിന്റെ വിലയിൽ വലിയ ഇടിവാണ് രേഖപ്പെടുത്തിയത്.
എം.എല്‍.എ ഫണ്ട് അനുവദിച്ചു
ഐ.സി ബാലകൃഷ്ണന്‍ എം.എല്‍.എയുടെ ആസ്തി വികസന പദ്ധതിയില്‍ ഉള്‍പ്പെടുത്തി സുല്‍ത്താന്‍ ബത്തേരി പൂതാടി ഗ്രാമപഞ്ചായത്തിലെ നെയ്ക്കുപ്പ പള്ളിക്ക് സമീപം മിനിമാസ്റ്റ് ലൈറ്റ് സ്ഥാപിക്കല്‍ പ്രവൃത്തിക്ക് 177800 ലക്ഷം രൂപയുടെ ഭരണാനുമതി ലഭിച്ചു.
ഗതാഗത നിയന്ത്രണം
കരണി–കമ്പളക്കാട് റോഡിൽ കരണി മുതൽ കെൽട്രോൺ വളവ് വരെയുള്ള ഭാഗത്ത് റോഡ് ഉപരിതല പ്രവൃത്തികൾ നടക്കുന്നതിനാൽ നവംബർ നാളെ 15 മുതൽ 25 വരെ വാഹനഗതാഗതം പൂർണമായും നിരോധിക്കുമെന്ന് അസിസ്റ്റന്റ് എഞ്ചിനീയർ അറിയിച്ചു. കരണിയിലേക്ക് പോകുന്ന വാഹനങ്ങൾ കൈനാട്ടി–പാറയ്ക്കൽ–കാര്യമ്പാടി വഴിയും കരണിയിൽനിന്ന് കമ്പളക്കാടിലേക്ക് വരുന്ന വാഹനങ്ങൾ കാര്യമ്പാടി–കൊളവയൽ–മുട്ടിൽ–കൈനാട്ടി വഴിയും തിരിച്ചുവിടും.
ക്വട്ടേഷൻ ക്ഷണിച്ചു
മാലിന്യസംസ്‌കരണവുമായി ബന്ധപ്പെട്ട് വയനാട് ജില്ലാ എൻഫോഴ്‌സ്‌മെന്റിന്റെ ആവശ്യത്തിന് ഒരു വർഷത്തേക്ക് വാഹനം വാടകയ്ക്ക് നൽകുന്നതിന് ടാക്സി ഉടമകളിൽ നിന്നും ക്വട്ടേഷൻ ക്ഷണിച്ചു. ടാക്സി രജിസ്ട്രേഷനുള്ള 2021-ലോ അതിനുശേഷമോ ഉള്ള മോഡൽ വാഹനങ്ങളാണ് വേണ്ടത്. ക്വട്ടേഷനുകൾ നവംബർ 20 ന് വൈകിട്ട് നാലിനകം ഓഫീസിൽ നൽകണം. ഫോൺ: 04936 203223
2030 ലോകകപ്പിലും അര്‍ജന്റീനക്കൊപ്പം സ്‌കലോണി, റെക്കോര്‍ഡിലേക്കുള്ള കരാറില്‍ ഒപ്പുവെച്ചു, മെസിയില്ലാത്ത അര്‍ജന്റീനയെ വാര്‍ത്തെടുക്കല്‍ വെല്ലുവിളി
2030 ലോകകപ്പ്‌ വരെ അര്‍ജന്റീന ഫുട്‌ബോള്‍ ടീമിന്റെ പരിശീലകനായി ലയണല്‍ സ്‌കലോണി തുടരും. സ്‌കലോണി കരാര്‍ പുതുക്കാന്‍ തീരുമാനിച്ച വിവരം അര്‍ജന്റീന ഫുട്‌ബോള്‍ അസോസിയേഷന്‍ പ്രസിഡന്റ് ക്ലോഡിയോ ടാപിയ വാര്‍ത്താ സമ്മേളനത്തില്‍ അറിയിച്ചു. 2022 ഖത്തര്‍ ലോകകപ്പില്‍ അര്‍ജന്റീനയെ ചാമ്പ്യന്‍മാരാക്കിയ സ്‌കലോണി, നാല്‌ വര്‍ഷങ്ങള്‍ക്ക്‌ ശേഷം ലോകകപ്പ്‌ ഫൈനലില്‍ വീണ്ടുമെത്തിച്ച്‌ വിസ്‌മയം സൃഷ്ടിച്ചു. ഫൈനലില്‍ സ്‌പെയ്‌നിനോടേറ്റ പരാജയത്തോടെ ലയണല്‍ സ്‌കലോണി അര്‍ജന്റീനയുടെ പരിശീലക സ്ഥാനത്ത്‌ നിന്ന് ഒഴിയുമെന്ന അഭ്യൂഹം ശക്തമായിരുന്നു. എന്നാല്‍, നാല്‌ വര്‍ഷം കൂടി ദേശീയ ടീമിന്‌ തന്ത്രമൊരുക്കാന്‍ സ്‌കലോണി തീരുമാനിക്കുകയായിരുന്നു. ഇതോടെ, മൂന്നു ലോകകപ്പുകളില്‍ അര്‍ജന്റീനയെ പരിശീലിപ്പിക്കുന്ന ആദ്യ പരിശീലകനായി സ്‌കലോണി മാറും.ടീമിന്റെ നായകനും നെടുംതൂണുമായ ലയണല്‍ മെസി അന്താരാഷ്ട്ര ഫുട്‌ബോളില്‍ നിന്ന് അടുത്തിടെയാണ്‌ വിരമിച്ചത്‌. മെസിക്ക്‌ പിന്നാലെ, അര്‍ജന്റീന ടീമില്‍ നിന്ന് സ്‌കലോണിയും പടിയിറങ്ങുന്നത്‌ ആരാധകരെ നിരാശപ്പെടുത്തിയേനെ.
പുതിയ ആർട്ടിഫീഷ്യൽ ഇന്റലിജൻസ് സംവിധാനം നടപ്പാക്കുന്നതിനിടെ അമേരിക്കയിൽ പ്രതിസന്ധി, ബാധിച്ചത് 7000 വിമാന സർവീസുകളെ
ഫെഡറൽ ഏവിയേഷൻ അഡ്മിനിസ്‌ട്രേഷൻ രാജ്യവ്യാപകമായി ടേക്ക് ഓഫുകൾക്ക് താൽക്കാലിക വിലക്ക് പ്രഖ്യാപിച്ചതിന് പിന്നാലെ അമേരിക്കയിൽ ഏകദേശം 7,000 വിമാന സർവീസുകൾ വൈകുകയോ റദ്ദാക്കുകയോ ചെയ്തതായി റിപ്പോർട്ട്. ടെലികമ്മ്യൂണിക്കേഷൻ തകരാറാണ് വിമാന സർവീസുകൾ സ്തംഭിക്കാൻ കാരണമെന്ന് ആഭ്യന്തര സുരക്ഷാ സെക്രട്ടറി മാർക്ക്‌വെയ്ൻ മള്ളിൻ പ്രതികരിച്ചിട്ടുള്ളത് . തകരാറിന്റെ യഥാർത്ഥ കാരണം കണ്ടെത്തിയിട്ടില്ല. പ്രശ്നം പരിഹരിക്കാൻ ഏറെ സമയമെടുക്കുമെന്നും ആഭ്യന്തര സുരക്ഷാ സെക്രട്ടറി മാർക്ക്‌വെയ്ൻ മള്ളിൻ കൂട്ടിച്ചേർത്തു.അമേരിക്കയിലെ 22 റീജണൽ എയർ ട്രാഫിക് കൺട്രോൾ സെന്ററുകളെയും ആശയവിനിമയ തകരാർ ബാധിച്ചതായി ഗതാഗത സെക്രട്ടറി ഷോൺ ഡഫി വിശദമാക്കി. സൈബർ ആക്രമണമോ അട്ടിമറിയോ ആണ് സംഭവത്തിന് പിന്നിലെന്ന് സൂചനകളില്ല. ഫെഡറൽ ഏവിയേഷൻ അഡ്മിനിസ്‌ട്രേഷൻ സാങ്കേതിക വിദഗ്ധർ സംഭവത്തിൽ അന്വേഷണം തുടരുകയാണ്. ഫെഡറൽ ഏവിയേഷൻ അഡ്മിനിസ്‌ട്രേഷൻ പുതിയ ആർട്ടിഫീഷ്യൽ ഇന്റലിജൻസ് സംവിധാനം നടപ്പാക്കുന്നതിനിടെയാണ് പ്രതിസന്ധി. തകരാറുമായി ആർട്ടിഫീഷ്യൽ ഇന്റലിജൻസ് സംവിധാനത്തിന് ബന്ധമുണ്ടോയെന്ന് വ്യക്തമല്ല. അമേരിക്കൻ ദേശീയ കാലാവസ്ഥാ വകുപ്പിനെയും രാജ്യവ്യാപക ഇന്റർനെറ്റ്, ആശയവിനിമയ തകരാർ ബാധിച്ചു. കാലാവസ്ഥാ വിവരങ്ങൾ ലഭിക്കുന്നതിന് തടസ്സം; വെബ്സൈറ്റുകളിൽ പഴയ വിവരങ്ങൾ പ്രത്യക്ഷപ്പെടാനും സാധ്യതയുണ്ടെന്നാണ് അധികൃതർ വിശദമാക്കുന്നത്.
സർവീസ് കഴിഞ്ഞെത്തുമ്പോൾ കെഎസ്ആർടിസിക്ക് മൈലേജ് കുറവ്, ഒളിക്യാമറയിൽ കണ്ടെത്തിയത് ഡീസൽ മോഷണം, 3 ജീവനക്കാർക്ക് സസ്പെൻഷൻ
ആലപ്പുഴ ചേര്‍ത്തല കെഎസ്ആര്‍ടിസി ഡിപ്പോയില്‍ ബസുകളില്‍ നിന്ന് ഡീസല്‍ മോഷ്ടിച്ചു വിറ്റ സംഭവത്തില്‍ മൂന്നു ജീവനക്കാര്‍ക്ക് സസ്പെന്‍ഷന്‍. മോഷണവുമായി ബന്ധപ്പെട്ട് അസിസ്റ്റന്റ് ട്രാന്‍സ്പോര്‍ട്ട് ഓഫിസര്‍ പൊലീസിനും പരാതി നല്‍കി. ഒളിക്യാമറ ഓപ്പറേഷനിലൂടെയാണ് കെഎസ്ആര്‍ടിസി ആഭ്യന്തര അന്വേഷണ വിഭാഗം ഡീസല്‍ കളളന്‍മാരെ കണ്ടെത്തിയത്. മെക്കാനിക്കല്‍ വിഭാഗത്തിലെ ജീവനക്കാരായ കണ്ണന്‍, ശരത്, ജയേഷ് എന്നിവര്‍ക്കാണ് സസ്പെന്‍ഷന്‍. സര്‍വീസ് കഴിഞ്ഞെത്തുന്ന ബസുകളില്‍ നിന്ന് ഡീസല്‍ മോഷ്ടിച്ചവരെ കഴിഞ്ഞ ദിവസമാണ് സ്റ്റിംഗ് ക്യാമറ ഓപ്പറേഷനിലൂടെ കെഎസ്ആര്‍ടിയിലെ ആഭ്യന്തര അന്വേഷണ സംഘം പിടികൂടിയത്.ആഭ്യന്തര അന്വേഷണ സംഘത്തിലെ ഉദ്യോഗസ്ഥര്‍ സ്വന്തം കൈയില്‍ നിന്ന് പണം മുടക്കി ബസുകളില്‍ ഒളി ക്യാമറ സ്ഥാപിച്ചാണ് ഡീസല്‍ മോഷണം കണ്ടെത്തിയത്. ബസുകളുടെ മൈലേജ് കുറഞ്ഞതിനെ തുടര്‍ന്ന് നടത്തിയ അന്വേഷണത്തിലാണ് പ്രതിദിനം പത്ത് മുതല്‍ ഇരുപത്തിയഞ്ച് ലിറ്റര്‍ ഡീസല്‍ വരെ ബസുകളില്‍ നിന്ന് ചോര്‍ത്തുന്നതായി കണ്ടെത്തിയത്. ഏറെ നാളായി മോഷണം തുടങ്ങിയിട്ടെന്നാണ് അനുമാനം. എടിഒ നല്‍കിയ പരാതിയില്‍ ചേര്‍ത്തല പൊലീസ് ഉടന്‍ കേസെടുക്കും.
സംസ്ഥാന നേതൃത്വത്തിനെതിരായ വിമർശനം, രാജ്മോഹൻ ഉണ്ണിത്താനെതിരെ കാസർഗോഡ് ഡിസിസി പ്രസിഡന്റ്
രാജ്മോഹൻ ഉണ്ണിത്താനെതിരെ കാസർഗോഡ് ഡിസിസി പ്രസിഡന്റ്. കെപിസിസി ഭാരവാഹിയോഗത്തിലാണ് രൂക്ഷ വിമർശനമുണ്ടായത്. സംസ്ഥാന നേതൃത്വത്തിനെതിരായ ഉണ്ണിത്താന്റെ പരസ്യ പ്രതികരണങ്ങൾക്കെതിരെയാണ് വിമർശനം. കെപിസിസി ഭാരവാഹി യോഗത്തിൽ ഉണ്ണിത്താനെതിരായ വിമർശനങ്ങൾക്ക് പിന്തുണയും ലഭിച്ചു. ബോർഡ് കോർപറേഷൻ വിഭജനം വൈകുന്നതിലും കെപിസിസി ഭാരവാഹി യോഗത്തിൽ വിമർശനമുണ്ടായി. ഭരണമാറ്റം ഉണ്ടായെന്ന ഫീൽ ഇല്ലെന്നാണ് വാദം. ബോർഡ് കോർപറേഷൻ വിഭജനം വൈകിയെന്ന് സണ്ണി ജോസഫ് കെപിസിസി ഭാരവാഹി യോഗത്തിൽ സമ്മതിച്ചു. യുഡിഎഫ് സർക്കാരിനെതിരെയും അടൂർ പ്രകാശ്, സണ്ണി ജോസഫ്, കെസി വേണുഗോപാൽ എന്നിവർക്കെതിരെയും കഴിഞ്ഞ ദിവസങ്ങളിൽ രൂക്ഷമായ വിമർശനമാണ് രാജ്മോഹൻ ഉണ്ണിത്താൻ നടത്തിയത്.
ആക്രമണങ്ങൾ അവസാനിപ്പിക്കാനായി ഗൾഫ് രാജ്യങ്ങൾ ആവശ്യപ്പെട്ടു; ഇറാൻ യുദ്ധത്തിൽ അവകാശവാദവുമായി ഡോണൾഡ് ട്രംപ്
ഇറാനെതിരായ ആക്രമണങ്ങള്‍ അവസാനിപ്പിക്കാന്‍ ഗള്‍ഫ് രാജ്യങ്ങള്‍ ആവശ്യപ്പെട്ടെന്ന അവകാശവാദവുമായി ഡോണള്‍ഡ് ട്രംപ്. സൗദി അറേബ്യ, ഖത്തര്‍ തുടങ്ങിയ ഗള്‍ഫ് രാജ്യങ്ങള്‍ ആക്രമണം നിര്‍ത്തണമെന്ന് ആവശ്യപ്പെട്ടെന്നാണ് ട്രംപ് പറയുന്നത്. അല്ലെങ്കില്‍ തനിക്ക് വെറും മൂന്ന് ദിവസത്തിനുള്ളില്‍ ഇറാന്റെ എല്ലാ അടിസ്ഥാന സൗകര്യങ്ങളും തകര്‍ക്കാന്‍ കഴിയുമെന്നും ട്രംപ് അവകാശപ്പെട്ടു. സൗദിക്കും ഖത്തറിനും പുറമെ കുവൈറ്റ്, യുഎഇ തുടങ്ങിയ രാജ്യങ്ങളും സമാന ആവശ്യം ഉന്നയിച്ചെന്നും ട്രംപ് ആവര്‍ത്തിച്ച് പറഞ്ഞു.എന്നാല്‍ ഗള്‍ഫ് രാജ്യങ്ങളുടെ അഭ്യര്‍ത്ഥനകള്‍ പാലിക്കുമെന്ന് ഉറപ്പില്ലെന്നും അമേരിക്കയുടെ ഭാഗത്ത് നിന്ന് ഏത് സമയവും ഇറാനെതിരെ ആക്രമണം ഉണ്ടാകുമെന്നും ട്രംപ് പറഞ്ഞു. കൂടാതെ യുദ്ധം മൂലമുണ്ടായ പെട്രോള്‍ വില വര്‍ദ്ധനവ് ഇടക്കാല തെരഞ്ഞെടുപ്പില്‍ റിപ്പബ്ലിക്കന്‍മാരുടെ പരാജയത്തിന് കാരണമായെന്ന് ട്രംപ് വീണ്ടും സമ്മതിച്ചു.അതിനിടെ യുഎസ് വൈസ് പ്രസിഡന്റ് ജെ ഡി വാന്‍സിന് മുന്നറിയിപ്പുമായി പ്രസിഡന്റ് ഡോണള്‍ഡ് ട്രംപ് രംഗത്ത് വന്നിരുന്നു. ജെ ഡി വാന്‍സ് ഇനി മുതല്‍ ആഭ്യന്തര കാര്യങ്ങളില്‍ മാത്രം ശ്രദ്ധിച്ചാല്‍ മതിയെന്നായിരുന്നു ട്രംപിന്റെ നിര്‍ദേശം. യുദ്ധം അവസാനിപ്പിക്കുന്നതിനായി വാന്‍സ് ഇറാനുമായി നേരിട്ട് ചര്‍ച്ച നടത്താന്‍ പോകുന്നുവെന്ന റിപ്പോര്‍ട്ടുകള്‍ക്ക് പിന്നാലെയാണ് ട്രംപിന്റെ നിര്‍ദേശം വരുന്നത്.
മുഖ്യമന്ത്രിയുമായി നിലവില്‍ വിഷയമൊന്നുല്ല, കെഎസ്ഇബി തെറ്റായ റിപ്പോര്‍ട്ട് നല്‍കിയിട്ടില്ല; സണ്ണി ജോസഫ്
നിലവില്‍ മുഖ്യമന്ത്രിയുമായി വൈദ്യുതി കരാറുമായി ബന്ധപ്പെട്ട് വിഷയമൊന്നുമില്ലെന്നും അദ്ദേഹം പറഞ്ഞു. മാധ്യമങ്ങള്‍ തെറ്റായ വാര്‍ത്തകൊടുത്തു. അക്കാര്യം ഞാന്‍ അറിഞ്ഞു എന്നാണ് പറഞ്ഞത്. ഇപ്പോള്‍ പ്രത്യേകിച്ച് വൈദ്യുതി കരാര്‍ ഒന്നും ഏര്‍പ്പെടുത്തിയിട്ടില്ല. മഴ കിട്ടി, ഇവിടെ അന്തരീക്ഷത്തില്‍ തണുപ്പ് വന്നു. ഉത്തരേന്ത്യയിലും ശൈത്യമാണ്. ദീപാവലി അവധി വന്നു. അതുകൊണ്ട് അങ്ങനെയൊരു പ്രയാസം ഈ ദിവസങ്ങളില്‍ ഉണ്ടായിട്ടില്ല. മുഖ്യമന്ത്രിയും ഞാനും എന്‍ടിപിസി ചെയര്‍മാന്‍ ഉള്‍പ്പടെയുള്ളവരുമായി ഒരു മാസം മുന്‍പ് ചര്‍ച്ച നടത്തിയിരുന്നു. അതിന്റെ ഫലമായി കുറച്ചുകൂടി കുറഞ്ഞ നിരക്കില്‍ സിന്നാര്‍ നമുക്ക് വൈദ്യുതി തരും – അദ്ദേഹം പറഞ്ഞു.
ട്രെയിനുകളിലെ ആർഎസി സംവിധാനം ഒഴിവാക്കാൻ നീക്കം; മുഴുവൻ നിരക്ക് ഈടാക്കി പകുതി ബെർത്ത് നൽകുന്നതിലെ യാത്രക്കാരുടെ പരാതിക്ക് പരിഹാരമാകും
ദില്ലി: ട്രെയിൻ യാത്രക്കാരുടെ ദീർഘകാലമായുള്ള ആശങ്കകളും പരാതികളും പരിഗണിച്ച് നിലവിലുള്ള ആർ എ സി (RAC) സംവിധാനം ഒഴിവാക്കാൻ ഇന്ത്യൻ റെയിൽവെയുടെ നീക്കം. നിലവിലെ ആർ എ സി സംവിധാനമനുസരിച്ച് രണ്ട് യാത്രക്കാർക്കായി ഒരു ബെർത്ത് മാത്രമാണ് അനുവദിക്കുന്നത്. പകുതി ബെർത്ത് മാത്രമാണ് ലഭിക്കുന്നതെങ്കിലും യാത്രക്കാരിൽ നിന്ന് മുഴുവൻ ടിക്കറ്റ് നിരക്കാണ് ഈടാക്കുന്നത്. ഇത് യാത്രക്കാർക്കിടയിൽ വലിയ പ്രതിഷേധത്തിനും അസൗകര്യങ്ങൾക്കും കാരണമാകുന്ന സാഹചര്യത്തിലാണ് പുതിയ പരിഷ്കരണത്തിന് ആലോചന നടക്കുന്നത്. പണം മുഴുവൻ നൽകുന്ന യാത്രക്കാർക്ക് പൂർണ്ണമായ ബെർത്തുകൾ തന്നെ ഉറപ്പാക്കണമെന്നതാണ് യാത്രക്കാരുടെ ഭാഗത്തുനിന്നുയരുന്ന പ്രധാന ആവശ്യം. ഇനി അഥവാ ആർ എ സി ടിക്കറ്റുകൾ തുടർന്നും നൽകുന്നുണ്ടെങ്കിൽ പകുതി നിരക്ക് മാത്രമേ ഈടാക്കാവൂ എന്നും യാത്രക്കാർ ചൂണ്ടിക്കാട്ടുന്നു. യാത്രക്കാരുടെ ഈ ആവശ്യങ്ങൾ ഗൗരവമായി പരിഗണിച്ചുകൊണ്ടാണ് ആർ എ സി സംവിധാനം നിർത്തലാക്കാനുള്ള നീക്കം റെയിൽവേ മന്ത്രാലയം സജീവമായിരിക്കുന്നത്.
മന്ത്രിമാർക്ക് ഇനി പുതിയ കാറുകൾ എത്തും; 24 ഇന്നോവ വാങ്ങാൻ സർക്കാർ : 9 കോടി 60 ലക്ഷം രൂപയാണ് ചെലവ് വരിക
മന്ത്രിമാർക്ക് പുതിയ കാറുകൾ വാങ്ങാൻ സർക്കാർ. മന്ത്രിമാരുടെ കാലപ്പഴക്കമുള്ള വാഹനങ്ങൾ മാറ്റാനാണ് നിർദ്ദേശം. 24 ഇന്നോവ കാറുകൾ വാങ്ങാൻ ആണ് സർക്കാർ ഉത്തരവിട്ടത്. 9 കോടി 60 ലക്ഷം രൂപയാണ് ചെലവ് വരിക. ടൂറിസം ഡിപ്പാർട്ട്മെന്റിന്റെ പണം ഉപയോഗിച്ചാണ് വാഹനങ്ങൾ വാങ്ങുന്നത്. ഇതിൽ 22 വാഹനങ്ങൾ മന്ത്രിമാർക്കും ബാക്കിയുള്ള രണ്ട് വാഹനങ്ങൾ വി.ഐ.പികളുടെയും വിദേശ അതിഥികളുടെയും സന്ദർശനങ്ങളുമായി ബന്ധപ്പെട്ട പ്രോട്ടോക്കോൾ ആവശ്യങ്ങൾക്കായി ഉപയോഗിക്കും. വാഹനങ്ങൾ മാറ്റണമെന്ന നിർദേശങ്ങൾ നേരത്തെ തന്നെ ഉയർന്നിരുന്നു. പിന്നാലെയാണ് മന്ത്രിമാർക്ക് പുതിയ വാഹനങ്ങൾ വാങ്ങാൻ തീരുമാനിച്ചിരിക്കുന്നത്.
തലച്ചോറിന്റെ ആരോഗ്യം മെച്ചപ്പെടുത്താൻ കഴിക്കേണ്ട 9 ഭക്ഷണങ്ങൾ
തലച്ചോറിന്റെ ആരോഗ്യം മെച്ചപ്പെടുത്താൻ കഴിക്കേണ്ട 9 ഭക്ഷണങ്ങൾപ്രായമാകുന്നതുമൂലമുണ്ടാകുന്ന ദോഷഫലങ്ങളെ തടയാൻ സഹായിക്കുന്ന തലച്ചോറിന് സംരക്ഷണം നൽകുന്ന പോഷകങ്ങൾ ചില ഭക്ഷണങ്ങളിലുണ്ട്. തലച്ചോറിന്റെ ആരോഗ്യം മെച്ചപ്പെടുത്തുന്നതിനായി കഴിക്കേണ്ട ഭക്ഷണങ്ങൾ കുറിച്ചാണ് ഇനി പറയുന്നത്.ഇലക്കറികൾ പതിവായി കഴിക്കുന്നത് തലച്ചോറിന്റെ ആരോഗ്യം മെച്ചപ്പെടുത്തുംഇലക്കറികൾ പതിവായി കഴിക്കുന്നത് തലച്ചോറിന്റെ വാർദ്ധക്യ പ്രക്രിയയെ 11 വർഷത്തോളം വൈകിപ്പിക്കുമെന്ന് ഒരു പഠനം വ്യക്തമാക്കുന്നു. ദിവസവും ഒരു കപ്പ് പച്ചയായോ അല്ലെങ്കിൽ അര കപ്പ് വേവിച്ചോ ഇലക്കറികൾ കഴിക്കാൻ ശ്രമിക്കുക. ഇലക്കറികളിൽ അടങ്ങിയിട്ടുള്ള, തലച്ചോറിന്റെ പ്രവർത്തനത്തെ മെച്ചപ്പെടുത്തുന്ന പല പോഷകങ്ങളും കൊഴുപ്പിൽ ലയിക്കുന്നവയാണ്. അതിനാൽ, ഒലിവ് ഓയിൽ, അവോക്കാഡോ തുടങ്ങിയ ആരോഗ്യകരമായ കൊഴുപ്പുകൾ അടങ്ങിയ ഭക്ഷണത്തോടൊപ്പം ഇവ കഴിക്കുമ്പോൾ ശരീരത്തിന് ഈ പോഷകങ്ങൾ നന്നായി ആഗിരണം ചെയ്യാൻ സാധിക്കും.ഡിമെൻഷ്യ, അൽഷിമേഴ്സ് രോഗം എന്നിവ തടയാനും ഓർമ്മശക്തി കൂട്ടാനും സഹായിക്കുംമസ്തിഷ്കത്തെ സംരക്ഷിക്കുന്ന ഫൈറ്റോകെമിക്കലുകൾ അടങ്ങിയ ബ്ലൂബെറികൾ കഴിക്കുന്നത് ഡിമെൻഷ്യ, അൽഷിമേഴ്സ് രോഗം എന്നിവ തടയാനും ഓർമ്മശക്തി കൂട്ടാനും സഹായിക്കും.സാൽമൺ പോലുള്ള കൊഴുപ്പുള്ള മത്സ്യങ്ങളിൽ ഒമേഗ-3 ഫാറ്റി ആസിഡുകൾ ധാരാളമായി അടങ്ങിയിട്ടുണ്ട്.ശരീരത്തിലുണ്ടാകുന്ന നീർവീക്കം തലച്ചോറിന് ദോഷകരമാണ്. സാൽമൺ പോലുള്ള കൊഴുപ്പുള്ള മത്സ്യങ്ങളിൽ ഒമേഗ-3 ഫാറ്റി ആസിഡുകൾ ധാരാളമായി അടങ്ങിയിട്ടുണ്ട്. ഇവയ്ക്ക് നീർവീക്കത്തെ തടയാനുള്ള മികച്ച കഴിവുണ്ട്. വിഷാദരോഗം, എ.ഡി.എച്ച്.ഡി (ADHD), ഡിമെൻഷ്യ, അൽഷിമേഴ്സ് രോഗം എന്നിവയെ നേരിടാൻ ഒമേഗ-3 ഫാറ്റി ആസിഡുകൾ സഹായിച്ചേക്കാമെന്ന് സമീപകാല പഠനങ്ങൾ സൂചിപ്പിക്കുന്നു.പയർവർഗ്ഗങ്ങളിൽ ഫോളേറ്റും ബി-വിറ്റാമിനുകളും ധാരാളമായി അടങ്ങിയിട്ടുണ്ട്.പയർവർഗ്ഗങ്ങളിൽ ഫോളേറ്റും ബി-വിറ്റാമിനുകളും ധാരാളമായി അടങ്ങിയിട്ടുണ്ട്. ഇവ തലച്ചോറിന്റെ ചുരുങ്ങൽ തടയാനോ അതിന്റെ വേഗത കുറയ്ക്കാനോ സഹായിക്കുമെന്ന് ഗവേഷണങ്ങൾ സൂചിപ്പിക്കുന്നു. നിങ്ങൾക്ക് ഇഷ്ടമുള്ള ഏത് തരം പയർവർഗ്ഗവും കഴിക്കാം. അവയെല്ലാം ആരോഗ്യത്തിന് വളരെ നല്ലതാണ്. കടല, വെള്ളപ്പയർ, കറുത്ത പയർ എന്നിവ സാലഡുകളിൽ ചേർത്ത് കഴിക്കുക. പയർവർഗ്ഗങ്ങളിൽ അടങ്ങിയിട്ടുള്ള ഉയർന്ന അളവിലുള്ള ലയിക്കുന്ന നാരുകൾ , കുടലിലെ ഗുണകരമായ ബാക്ടീരിയകളെ പോഷിപ്പിക്കുന്നുഡാർക്ക് ചോക്ലേറ്റ് കഴിക്കുമ്പോൾ തലച്ചോറിലേക്കുള്ള രക്തയോട്ടം മെച്ചപ്പെടുത്താൻഡാർക്ക് ചോക്ലേറ്റ് കഴിക്കുമ്പോൾ അതിലുള്ള ഗുണകരമായ പോഷകങ്ങൾ (ഫ്ലേവനോയിഡുകൾ) തലച്ചോറിലേക്കുള്ള രക്തയോട്ടം മെച്ചപ്പെടുത്താൻ ഉടൻ തന്നെ സഹായിക്കുന്നു. രക്തക്കുഴലുകളുടെ ഉൾഭാഗത്തുള്ള കോശങ്ങൾ ഉത്പാദിപ്പിക്കുന്ന നൈട്രിക് ഓക്സൈഡിന്റെ അളവ് വർദ്ധിപ്പിക്കാനും ഇവ സഹായിക്കുന്നു. ഈ നൈട്രിക് ഓക്സൈഡിന് വീക്കം കുറയ്ക്കാനുള്ള കഴിവുണ്ട്.കാപ്പിയും ചായയും രക്തക്കുഴലുകളിൽ കാൽസ്യം അടിയുന്ന പ്രക്രിയയെ കുറയ്ക്കാൻ സഹായിക്കുംകാപ്പിയും ചായയും രക്തക്കുഴലുകളിൽ കാൽസ്യം അടിയുന്ന പ്രക്രിയയെ കുറയ്ക്കാൻ സഹായിക്കും. കാപ്പിയെ അപേക്ഷിച്ച് കഫീന്റെ അളവ് കുറവായതിനാൽ ചായ ഇതിന് കൂടുതൽ അനുയോജ്യമാണ്. കൂടാതെ, ചായയിൽ 'തീനൈൻ' (theanine) എന്ന ഫൈറ്റോകെമിക്കൽ അടങ്ങിയിട്ടുണ്ട്. ഇത് മനസ്സിന് ശാന്തതയും അതേസമയം ഉന്മേഷവും നൽകുന്നു. കൂടാതെ, സന്തോഷം നൽകുന്ന തലച്ചോറിലെ രാസവസ്തുവായ 'ഡോപാമൈന്റെ' (dopamine) അളവ് വർദ്ധിപ്പിക്കാനും ഇത് സഹായിക്കുന്നുപ്ലാക്ക് (plaque) നീക്കം ചെയ്യാൻ മഞ്ഞൾ സഹായിക്കുന്നുഅൽഷിമേഴ്സ് രോഗത്തിന് കാരണമാകുന്ന തലച്ചോറിലെ ഒരു പ്രത്യേക തരം പ്ലാക്ക് (plaque) നീക്കം ചെയ്യാൻ മഞ്ഞൾ സഹായിക്കുന്നു. എന്നാൽ, സപ്ലിമെന്റുകൾക്ക് പകരം മഞ്ഞൾ നേരിട്ട് ഭക്ഷണത്തിൽ ഉൾപ്പെടുത്തുക. തലച്ചോറിന്റെ ആരോഗ്യം മെച്ചപ്പെടുത്തുന്നതിൽ ഏറ്റവും ഫലപ്രദമായ ആന്റിഓക്‌സിഡന്റ് ഗുണങ്ങൾ മഞ്ഞളിൽ മാത്രമേ അടങ്ങിയിട്ടുള്ളൂവേവിച്ച തക്കാളിയിൽ ലൈക്കോപീൻ ധാരാളമായി അടങ്ങിയിട്ടുണ്ട്.വേവിച്ച തക്കാളിയിൽ ലൈക്കോപീൻ ധാരാളമായി അടങ്ങിയിട്ടുണ്ട്. ചുവപ്പ്, ഓറഞ്ച്, മഞ്ഞ നിറങ്ങളിലുള്ള പല പഴങ്ങളിലും പച്ചക്കറികളിലും കാണപ്പെടുന്ന ഒരു ആന്റിഓക്‌സിഡന്റാണ് ലൈക്കോപീൻ. തലച്ചോറിന് ദോഷകരമായ 'ഓക്സിഡേറ്റീവ് സ്ട്രെസ്' (oxidative stress) കുറയ്ക്കാൻ ലൈക്കോപീൻ സഹായിക്കുന്നു.നട്സുകളിൽ വിറ്റാമിൻ ഇ ധാരാളമായി അടങ്ങിയിട്ടുണ്ട്.നട്സുകളിൽ വിറ്റാമിൻ ഇ ധാരാളമായി അടങ്ങിയിട്ടുണ്ട്. പിസ്തയിലുള്ള പ്രകൃതിദത്ത എണ്ണ തലച്ചോറിലുണ്ടാകുന്ന നീർക്കെട്ട് തടയാൻ സഹായിക്കും. മാത്രമല്ല, തലച്ചോറിന്റെ മുൻഭാഗം ചുരുങ്ങിപ്പോകുന്നത് കുറയ്ക്കാൻ സഹായിച്ചേക്കാമെന്ന് ചില പഠനങ്ങൾ സൂചിപ്പിക്കുന്നു. ഒരു ചെറിയ പിടി അളവിൽ മാത്രം നട്സ് കഴിക്കാൻ ശ്രദ്ധിക്കുക.
ബസ് ചാര്‍ജും വിദ്യാര്‍ത്ഥി കണ്‍സഷനും വര്‍ധിപ്പിക്കില്ലെന്ന് മന്ത്രി സിപി ജോണ്‍, 'കുട്ടികൾ പ്രതികളായ വാഹനാപകടങ്ങളിൽ രക്ഷകര്‍ത്താക്കള്‍ക്ക് ഉത്തരവാദിത്തം
സംസ്ഥാനത്ത് ബസ് ചാര്‍ജ് വര്‍ധനയില്ല. ബസ് ചാര്‍ജ് വര്‍ധനവെന്ന ബസ് ഉടമകളുടെ ആവശ്യം മന്ത്രി സി പി ജോണ്‍ തള്ളി. വിദ്യാര്‍ത്ഥി കണ്‍സെഷനും വര്‍ധിപ്പിക്കില്ല. ഇതൊഴിച്ച് ബസുടമകളുടെ മറ്റ് ആവശ്യങ്ങള്‍ പരിഗണിക്കുമെന്നും മന്ത്രി വ്യക്തമാക്കി. ബസുടമകളിൽ തന്നെ ഒരു വിഭാഗം നിരക്ക് വര്‍ധനക്ക് എതിരാണെന്നാണ് മന്ത്രിയുടെ ന്യായീകരണം. നിരക്ക് കൂട്ടിയാൽ യാത്രക്കാര്‍ കുറയുമെന്ന് ഒരു വിഭാഗം ബസ് ഉടമകൾ സംശയിക്കുന്നു. ആളുകള്‍ സ്വകാര്യ വാഹനങ്ങളിലേക്ക് മാറും. മുപ്പതിനായിരം ബസുകള്‍ ഉണ്ടായിരുന്നത് 8000 ആയി കുറഞ്ഞു. ഓട്ടോ ടാക്സി നിരക്ക് കൂട്ടണമെന്നാണ് സര്‍ക്കാരിന്‍റെയും അഭിപ്രായം. 2022 ലാണ് അവസാനമായി ഇവരുടെ നിരക്ക് നിശ്ചയിച്ചതെന്നും മന്ത്രി വിശദീകരിച്ചു.
2030-ഓടെ റോഡപകടങ്ങൾ പകുതിയായി കുറയ്ക്കും, പുതിയ പദ്ധതിയുമായി ഗതാഗത വകുപ്പ്; മമ്മൂട്ടി ബ്രാൻഡ് അംബാസിഡറാകും
തിരുവനന്തപുരം: റോഡ് അപകടങ്ങൾ കുറയ്ക്കാൻ പുതിയ പുതിയ പദ്ധതിയുമായി ഗതാഗത വകുപ്പ്. 2030-ഓടെ റോഡപകട മരണങ്ങളും പരുക്കുകളും പകുതിയായി കുറയ്ക്കുക എന്ന ലക്ഷ്യം മുൻനിർത്തിയാണ് ഈ പദ്ധതി നടപ്പിലാക്കുന്നത്. ജീവ-സുയാത്ര മിഷൻ എന്ന പേരിലുള്ള പദ്ധതിയുടെ ഉദ്ഘാടനം ഞായറാഴ്ച മുഖ്യമന്ത്രി നിർവഹിക്കും.പദ്ധതിയുടെ ബ്രാൻഡ് അംബാസിഡറായി നടൻ മമ്മൂട്ടിയെത്തും. പദ്ധതി നടപ്പിലാക്കുക 5 അടിസ്ഥാന ലക്ഷ്യങ്ങൾ മുൻനിർത്തി. റോഡ് അപകടങ്ങളുടെ പശ്ചാത്തലത്തിലാണ് പുതിയ പദ്ധതിക്ക് രൂപം നൽകിയത്. മിഷന്റെ പ്രവർത്തനങ്ങൾ പ്രധാനമായും അഞ്ച് അടിസ്ഥാന ലക്ഷ്യങ്ങളെ കേന്ദ്രീകരിച്ചാണ് മുന്നോട്ട് പോകുന്നത്.
ബെംഗളൂരു മെട്രോയുടെ പിങ്ക് ലൈൻ നാടിന് സമർപ്പിച്ച് പ്രധാനമന്ത്രി; 15,600 കോടിയുടെ വികസന പദ്ധതികളുടെ ഉദ്ഘാടനവും നിർവഹിച്ചു
ബെംഗളൂരു മെട്രോയുടെ പിങ്ക് ലൈൻ നാടിന് സമർപ്പിച്ച് പ്രധാനമന്ത്രി നരേന്ദ്ര മോദി. എസ് ജി പാളയ എന്ന് പുനർനാമകരണം ചെയ്ത താവരക്കരെ സ്റ്റേഷനിലാണ് മുഖ്യമന്ത്രി ഡി കെ ശിവകുമാറിനൊപ്പം പ്രധാനമന്ത്രി ഫ്ലാഗ് ഓഫ് നിർവഹിച്ചത്. എസ് ജി പാളയത്ത് നിന്ന് ബെംഗളൂരു ഐ ഐ എമ്മിലേക്ക് പ്രധാനമന്ത്രി മെട്രോയിൽ യാത്ര ചെയ്തു. പണം നൽകി ടിക്കറ്റ് എടുത്താണ് പ്രധാനമന്ത്രി യാത്ര നടത്തിയത്.രാവിലെ 10.10ന് ബെംഗളൂരുവിൽ എത്തിയ പ്രധാനമന്ത്രിയെ മുഖ്യമന്ത്രി ഡി കെ ശിവകുമാർ എച്ച് എ എൽ വിമാനത്താവളത്തിൽ സ്വീകരിച്ചു. തുടർന്ന് ജിഗിണിയിലെ എസ് വ്യാസ ക്യാമ്പസിൽ സുവർണ ജൂബിലി ആഘോഷത്തിന്റെ ഉദ്ഘാടനം അദ്ദേഹം നിർവഹിച്ചു. ബെംഗളൂരു - മംഗളൂരു - ഗോവ വന്ദേഭാരത് എക്സ്പ്രസും മോദി ഫ്ലാഗ് ഓഫ് ചെയ്തു. തുടർന്ന് 15,600 കോടി രൂപയുടെ വികസന പദ്ധതികളുടെ ഉദ്ഘാടനവും പ്രധാനമന്ത്രി നിർവഹിച്ചു.തുടർന്ന് മൈസൂരുവിലേക്ക് പോയ മോദി, രാജ്യത്തെ ആദ്യത്തെ എൽ ഇ ഡി ഡോം പ്ലാനറ്റോറിയം ഉദ്ഘാടനം ചെയ്തു. ബെംഗളൂരു മെട്രോ പിങ്ക് ലൈൻ സമർപ്പണത്തിന് എത്തിയ പ്രധാനമന്ത്രിയെ ബിജെപി പ്രവർത്തകർ ആർപ്പുവിളികളോടെ എതിരേറ്റപ്പോൾ മറുഭാഗത്ത് രാഹുൽ, രാഹുൽ എന്ന് വിളിച്ചാണ് കോൺഗ്രസ് പ്രവർത്തകർ പ്രതികരിച്ചത്.
ട്രെയിൻ യാത്രക്കാർ ശ്രദ്ധിക്കാൻ; കൺഫേം ടിക്കറ്റുണ്ടെങ്കിലും സീറ്റ് നഷ്ടപ്പെടാൻ ചാൻസ് ഉണ്ട്; എങ്ങനെയെന്നല്ലേ
ട്രെയിനില്‍ യാത്ര ചെയ്യുമ്പോള്‍ കണ്‍ഫേം ടിക്കറ്റ് ലഭിക്കുക എന്നത് പലപ്പോഴും പ്രയാസമുള്ള കാര്യമാണ്. എന്നാല്‍ ടിക്കറ്റ് കണ്‍ഫേമാണെങ്കിലും ചില സാഹചര്യങ്ങളില്‍ ലഭിച്ച സീറ്റ് നഷ്ടപ്പെട്ടുപോകാന്‍ സാധ്യതയുണ്ട്. ഇന്ത്യന്‍ റെയില്‍വേയുടെ 'നോട്ട് ടേണ്‍ഡ് അപ്' (Not Turned Up - NT) നടപടിയെക്കുറിച്ചാണ് ഇതുമായി ബന്ധപ്പെട്ട് യാത്രക്കാര്‍ അറിഞ്ഞിരിക്കേണ്ടത്.എന്താണ് നോട്ട് ടേണ്‍ഡ് അപ് നിയമം?കണ്‍ഫേം ടിക്കറ്റ് എടുത്ത യാത്രക്കാരന് താന്‍ കയറേണ്ട സ്റ്റേഷനില്‍നിന്ന് ട്രെയിനില്‍ കയറാതിരിക്കുകയോ ടിക്കറ്റ് പരിശോധിക്കുന്ന സമയത്ത് സീറ്റില്‍ യാത്രക്കാരനെ കണ്ടെത്താന്‍ കഴിയാതിരിക്കുകയോ ചെയ്താല്‍ പരിശോധനയ്ക്കുശേഷം ടിടിഇക്ക് ആ യാത്രക്കാരനെ 'നോട്ട് ടേണ്‍ഡ് അപ്' ആയി രേഖപ്പെടുത്താന്‍ കഴിയും. തുടര്‍ന്ന് ഒഴിവുള്ള സീറ്റ് അര്‍ഹരായ ആര്‍എസി (RAC), വെയിറ്റിങ് ലിസ്റ്റ് യാത്രക്കാര്‍ക്ക് അനുവദിച്ചുകൊടുക്കാവുന്നതാണ്.അതുകൊണ്ടുതന്നെ കണ്‍ഫേം ടിക്കറ്റ് എടുത്തവര്‍ യാത്രയ്ക്കിടെ ചില കാര്യങ്ങള്‍ പ്രത്യേകം ശ്രദ്ധിക്കണം.കണ്‍ഫേം സീറ്റ് നഷ്ടപ്പെടാതിരിക്കാന്‍ എന്തുചെയ്യണം?കൃത്യസമയത്ത് ട്രെയിനില്‍ കയറുകടിക്കറ്റില്‍ രേഖപ്പെടുത്തിയിരിക്കുന്ന ബോര്‍ഡിങ് സ്റ്റേഷനില്‍നിന്ന് തന്നെ യാത്ര ആരംഭിക്കാന്‍ ശ്രദ്ധിക്കുക. അവസാന നിമിഷം സ്റ്റേഷനിലെത്തുന്നത് ഒഴിവാക്കണം. നിങ്ങള്‍ ട്രെയിനില്‍ കയറാത്തതായി രേഖപ്പെടുത്തിയാല്‍ സീറ്റ് മറ്റൊരു അര്‍ഹനായ യാത്രക്കാരന് ലഭിച്ചേക്കാം.അനുവദിച്ച സീറ്റില്‍ തന്നെ ഇരിക്കാന്‍ ശ്രദ്ധിക്കുകകുടുംബാംഗങ്ങളുടെയോ സുഹൃത്തുക്കളുടെയോ സീറ്റ് മറ്റൊരു കോച്ചിലാണെങ്കില്‍ അവിടേക്ക് പോകുന്ന സാഹചര്യമുണ്ടാകാം. എന്നാല്‍ ടിടിഇ ടിക്കറ്റ് പരിശോധിക്കുമ്പോള്‍ സ്വന്തം സീറ്റില്‍ നിങ്ങളെ കണ്ടെത്താനാകാത്തത് ആശയക്കുഴപ്പമുണ്ടാക്കാം. അതിനാല്‍ താല്‍ക്കാലികമായി മറ്റൊരു സീറ്റിലേക്ക് മാറേണ്ടിവന്നാല്‍ ടിടിഇയെ വിവരം അറിയിക്കുക.മറ്റൊരു സ്റ്റേഷനില്‍നിന്നാണ് കയറുന്നതെങ്കില്‍ ബോര്‍ഡിങ് സ്റ്റേഷന്‍ മാറ്റുകടിക്കറ്റില്‍ രേഖപ്പെടുത്തിയിരിക്കുന്ന സ്റ്റേഷനില്‍നിന്നല്ല യാത്ര ആരംഭിക്കുന്നതെങ്കില്‍, റെയില്‍വേയുടെ ചട്ടങ്ങള്‍ക്കനുസരിച്ച് മുന്‍കൂട്ടി ബോര്‍ഡിങ് സ്റ്റേഷന്‍ മാറ്റേണ്ടതുണ്ടോ എന്ന് പരിശോധിക്കുക. മാറ്റം വരുത്താതിരുന്നാല്‍ സീറ്റ് ഒഴിവുള്ളതായി കണക്കാക്കപ്പെടാനുള്ള സാധ്യതയുണ്ട്.
