പുതിയ പാൻ കാർഡ് പ്രതീക്ഷിച്ച് ഇരിക്കുകയാണോ..? ആദായ നികുതി വകുപ്പിന്റെ പെർമനൻ്റ് അക്കൗണ്ട് നമ്പർ 2.0 പദ്ധതിക്ക് കേന്ദ്ര സര്ക്കാര് അംഗീകാരം നല്കിയതോടെ ക്യുആര് കോഡ് സൗകര്യമുള്ള ഒരു പുതിയ പാന് കാര്ഡ് ഉടന് ലഭിക്കും. ഈ ക്യുആർ കോഡ് വഴി പാൻ കാർഡിലെ വിവരങ്ങള് കൂടുതല് സുരക്ഷിതമായി സ്ഥിരീകരിക്കാൻ കഴിയും.
പാൻ കാർഡിലെ ക്യുആർ കോഡിന്റെ പ്രാധാന്യം
ഒരു ക്യുആർ കോഡ് സ്കാൻ ചെയ്ത് പാൻ കാർഡിലെ വിവരങ്ങള് പരിശോധിക്കുന്നത് വളരെ എളുപ്പമാണ്. ഈ ക്യുആർ കോഡ് വഴി പേര്, ജനനതീയതി, മാതാപിതാക്കളുടെ പേര്, ഫോട്ടോ, ഒപ്പ് എന്നീ വിവരങ്ങള് എളുപ്പത്തില് സ്ഥിരീകരിക്കാൻ കഴിയും. ഇത് നിങ്ങളുടെ പാൻ കാർഡിന്റെ ആധികാരികത തെളിയിക്കുന്നതിന് വളരെ സഹായകമാണ്.
ക്യുആർ കോഡ് ഇല്ലാത്ത പാൻ കാർഡ് ഉപയോഗിക്കാമോ..?
ക്യുആർ കോഡ് ഇല്ലാത്ത പഴയ പാൻ കാർഡ് ഇപ്പോഴും സാധുവാണ്. എന്നാല് ക്യുആർ കോഡ് ഉള്ള പാൻ കാർഡ് ഉപയോഗിക്കുന്നത് കൂടുതല് സുരക്ഷിതവും സൗകര്യപ്രദവുമാണ്.
ക്യുആർ കോഡ് ഉള്ള പാൻ കാർഡ് എങ്ങനെ ലഭിക്കും..?
ക്യുആർ കോഡ് ഉള്ള പാൻ കാർഡ് ലഭിക്കുന്നതിന് എൻഎസ്ഡിഎല് (NSDL) അല്ലെങ്കില് യുടിഐഐടിഎസ്എല് (UTIITSL) വെബ്സൈറ്റുകള് സന്ദർശിക്കാം. ഈ വെബ്സൈറ്റുകളില് പാൻ നമ്പർ, ഫോണ് നമ്പർ, ഇമെയില് ഐഡി എന്നീ വിവരങ്ങള് നല്കി അപേക്ഷിക്കാം.
അപേക്ഷിക്കുമ്പോള് ശ്രദ്ധിക്കേണ്ട കാര്യങ്ങള്
● പാൻ നമ്പർ, ഫോണ് നമ്പർ, ഇ-മെയില് ഐഡി എന്നീ വിവരങ്ങള് ശരിയായി നല്കണം.
● ക്യുആർ കോഡ് ഉള്ള ഇപാൻ അല്ലെങ്കില് ഫിസിക്കല് പാൻ കാർഡ് എന്നിവയില് ഒന്ന് തിരഞ്ഞെടുക്കാം.
● ക്യുആർ കോഡുള്ള ഇപാൻ ഡൗണ്ലോഡ് ചെയ്യാൻ 8.26 രൂപയും ഫിസിക്കല് പാൻ കാർഡ് ലഭിക്കാൻ 50 രൂപയും നല്കേണ്ടി വരും.
● സമയം: കഴിഞ്ഞ മാസത്തിനുള്ളില് പാൻ നല്കിയവർക്ക് ഇ-പാൻ സൗജന്യമായി ലഭിക്കും.
● അപേക്ഷയുടെ സ്ഥിതി അറിയുന്നതിന് മുകളിലെ വെബ്സൈറ്റുകളില് ലോഗിൻ ചെയ്യാം.
