തിരുവനന്തപുരം:
സാമ്പത്തിക തട്ടിപ്പുകള്‍ ഓരോ ദിവസവും പുതിയ രീതിയിലാണ്. അക്കൗണ്ടുകളില്‍ പണം നഷ്ടമാകാതെ ഇരിക്കാൻ ജാഗ്രത പാലിക്കേണ്ടത് പ്രധാനമാണ്. ഇപ്പോഴിതാ പുതിയ തട്ടിപ്പിനെ കുറിച്ച്‌ സർക്കാർ മുന്നറിയിപ്പ് നല്‍കിയിട്ടുണ്ട്. ക്രെഡിറ്റ് കാർഡ് തട്ടിപ്പ് കാരണം നിങ്ങളുടെ ബാങ്ക് അക്കൗണ്ട് ബ്ലോക്ക് ചെയ്യപ്പെടുമെന്ന് മുന്നറിയിപ്പ് നല്‍കി റിസർവ് ബാങ്ക് ഓഫ് ഇന്ത്യയില്‍ നിന്നെന്ന പേരില്‍ ഫോണ്‍ കോള്‍ അല്ലെങ്കില്‍ വോയ്‌സ്‌ മെയില്‍ വന്നേക്കാം. ഇത് ലഭിച്ചാല്‍ പരിഭ്രാന്തരാകരുത് എന്നാണ് മുന്നറിയിപ്പ്. ഇത്തരം വ്യാജ കോളുകള്‍ക്കെതിരെ ജനങ്ങള്‍ ജാഗ്രത പാലിക്കാൻ സർജിക്കാർ നിർദേശമുണ്ട്.
ഈ കോളുകള്‍ വ്യാജമാണെന്ന് പ്രസ് ഇൻഫർമേഷൻ ബ്യൂറോയുടെ (പിഐബി) ഫാക്റ്റ് ചെക്ക് ടീം എക്‌സില്‍ കുറിപ്പ് പോസ്റ്റ് ചെയ്തിരുന്നു.
തട്ടിപ്പിന്റെ രൂപം ഇങ്ങനെ…
നിങ്ങളുടെ ക്രെഡിറ്റ് കാർഡ് തട്ടിപ്പ് പ്രവർത്തങ്ങളില്‍ ഭാഗമായിട്ടുണ്ട് എന്നും അടുത്ത രണ്ട് മണിക്കൂറിനുള്ളില്‍ നിങ്ങളുടെ പേരിലുള്ള എല്ലാ ബാങ്ക് അക്കൗണ്ടുകളും ബ്ലോക്ക് ചെയ്യപ്പെടും എന്ന രീതിയിലാണ് ഫോണ്‍ കോള്‍ വരിക. കൂടുതല്‍ വിവരങ്ങള്‍ക്ക് ഒൻപത് അമർത്താൻ ആവശ്യപ്പെടും. അത്തരമൊരു കോള്‍ ലഭിക്കുകയാണെങ്കില്‍, നമ്പറുകളൊന്നും അമർത്തുകയോ കോളറുമായി ഇടപഴകുകയോ ചെയ്യരുത്. പകരം, നമ്പർ ഉടൻ ബ്ലോക്ക് ചെയ്യുക. ആർബിഐയോ ഏതെങ്കിലും നിയമാനുസൃത ബാങ്കോ ഒരിക്കലും ആവശ്യപ്പെടാത്ത കോളുകളോ ഇ-മെയിലുകളോ മുഖേന വ്യക്തിഗത വിശദാംശങ്ങള്‍ ആവശ്യപ്പെടില്ല. നിങ്ങള്‍ക്ക് സംശയങ്ങളുണ്ടെങ്കില്‍, അവരുടെ ഔദ്യോഗിക ഹെല്പ് ലൈൻ വഴി നിങ്ങളുടെ ബാങ്കുമായി നേരിട്ട് ബന്ധപ്പെടുക. ഇത്തരം സംഭവങ്ങള്‍ ഉണ്ടായാല്‍ സൈബർ ക്രൈം പോർട്ടലിലോ നിങ്ങളുടെ പ്രാദേശിക അധികാരികളിലോ റിപ്പോർട്ട് ചെയ്യാം.
