മരണത്തിന്റെയും വൈകല്യത്തിന്റെയും പ്രധാന കാരണങ്ങളിലൊന്നാണ് സ്ട്രോക്ക്. ഉയർന്ന കൊളസ്‌ട്രോള്‍, ഉയർന്ന രക്തസമ്മർദ്ദം തുടങ്ങിയ പല സ്ട്രോക്ക് അപകട ഘടകങ്ങളും അപകടകരമായ രീതിയില്‍ നിശ്ശബ്ദമാണ്. എന്നിരുന്നാലും, ജീവിതശൈലിയില്‍ മാറ്റങ്ങള്‍ വരുത്തുന്നതിലൂടെ 80% വരെ സ്‌ട്രോക്കുകളും തടയാനാകുമെന്ന് സെന്റേഴ്സ് ഫോർ ഡിസീസ് കണ്‍ട്രോള്‍ ആൻഡ് പ്രിവൻഷൻ കണക്കാക്കുന്നു. സ്ട്രോക്ക് ഡോക്ടർമാർ വ്യക്തിപരമായി ഒഴിവാക്കുന്ന ചില കാര്യങ്ങളും എന്തുകൊണ്ട് അവ ഒഴിവാക്കണമെന്നും താഴെ പറയുന്നു.
വ്യായാമമില്ലാത്ത ജീവിതശൈലി ഒഴിവാക്കുക
സ്‌ട്രോക്കിനുള്ള പ്രധാന കാരണങ്ങളിലൊന്ന് വ്യായാമമില്ലാത്ത ജീവിതശൈലിയാണ്. കൂടുതല്‍ സമയം ഇരിക്കുകയോ കിടക്കുകയോ ചെയ്യുന്നതും മതിയായ വ്യായാമം ഇല്ലാത്തതുമാണ് ഇതിന്റെ ലക്ഷണം. പതിവായ ശാരീരിക പ്രവർത്തനങ്ങള്‍ രക്തക്കുഴലുകള്‍ക്ക് തടസ്സമുണ്ടാകാതെ സൂക്ഷിക്കാൻ സഹായിക്കുമെന്നും ധമനികളിലെ പ്ലാക്ക് ഉണ്ടാകുന്നത് തടയുമെന്നും കണ്ടെത്തിയിട്ടുണ്ട്. അതിനാല്‍, ആഴ്ചയില്‍ അഞ്ച് ദിവസം 30 മിനിറ്റ് മിതമായ വ്യായാമം ചെയ്യാൻ ഡോക്ടർമാർ പൊതുവെ ശുപാർശ ചെയ്യുന്നു. നടക്കുക, ഓടുക, സൈക്കിള്‍ ഓടിക്കുക അല്ലെങ്കില്‍ ഗ്രൂപ്പ് വർക്ക്‌ഔട്ട് ക്ലാസില്‍ ചേരുക എന്നിങ്ങനെ പല രീതിയിലും വ്യായാമം ചെയ്യാം.
ഉയർന്ന രക്തസമ്മർദ്ദം അവഗണിക്കരുത്
ഉയർന്ന രക്തസമ്മർദ്ദം ഇല്ലാതാക്കിയാല്‍ 60% സ്‌ട്രോക്കുകളും കുറയും. ഉയർന്ന രക്തസമ്മർദം ഒരു ‘നിശബ്ദ കൊലയാളി’ ആണ്. കാരണം പലപ്പോഴും രോഗികള്‍ക്ക് ഇത് അനുഭവപ്പെടില്ല. അതിനാല്‍ രക്തസമ്മർദം പരിശോധിക്കുകയും നിരീക്ഷിക്കുകയും ചികിത്സിക്കുകയും ചെയ്യേണ്ടത് അത്യാവശ്യമാണ്.
പതിവായ പരിശോധനകള്‍ ഒഴിവാക്കരുത്
പലപ്പോഴും സ്ട്രോക്ക് അപകട ഘടകങ്ങള്‍ക്ക് ലക്ഷണങ്ങളൊന്നും ഉണ്ടാകാറില്ല. രക്തസമ്മർദ്ദം, ഉയർന്ന കൊളസ്‌ട്രോള്‍ തുടങ്ങിയവ പതിവായി പരിശോധിച്ചാല്‍ മാത്രമേ കണ്ടെത്താനാകൂ. അതിനാല്‍ ഡോക്ടറെ പതിവായി സന്ദർശിക്കേണ്ടത് അത്യാവശ്യമാണ്. ഉയർന്ന കൊളസ്‌ട്രോള്‍, ഉയർന്ന രക്തസമ്മർദ്ദം, രക്തത്തിലെ പഞ്ചസാരയുടെ അളവ്, ശരീരഭാരം തുടങ്ങിയ അപകട ഘടകങ്ങള്‍ ഡോക്ടർമാർ പരിശോധിക്കും. കൂടാതെ, ലിംഗഭേദം (സ്‌ത്രീകളില്‍ സ്ട്രോക്ക് കൂടുതലാണ്), വ്യക്തിഗത ചരിത്രം തുടങ്ങിയ നിയന്ത്രണത്തിന് പുറത്തുള്ള അപകട ഘടകങ്ങളും ഡോക്ടർക്ക് അവലോകനം ചെയ്യാൻ കഴിയും. മുൻപ് സ്ട്രോക്ക് വന്നവർക്കും മാതാപിതാക്കളില്‍ ആർക്കെങ്കിലും സ്ട്രോക്ക് വന്നവർക്കും ഭാവിയില്‍ സ്ട്രോക്ക് വരാനുള്ള സാധ്യത വളരെ കൂടുതലാണ്.
പുകവലി ഒഴിവാക്കുക
പുകവലി സ്‌ട്രോക്കിന്റെയും ഹൃദ്രോഗത്തിൻ്റെയും സാധ്യത വർദ്ധിപ്പിക്കും. പുകവലി രക്തക്കുഴലുകള്‍ കാലക്രമേണ ഇടുങ്ങാൻ കാരണമാവുകയും തലച്ചോറിലേക്കുള്ള രക്തയോട്ടത്തിന് തടസ്സമുണ്ടാക്കുകയും ചെയ്യും.
അമിതമായ മദ്യപാനം ഒഴിവാക്കുക
അമിതമായ മദ്യപാനം ഹൃദയത്തെയും രക്തക്കുഴലുകളെയും പ്രതികൂലമായി ബാധിക്കുകയും ഹൃദ്രോഗം, സ്ട്രോക്ക് തുടങ്ങിയ ഗുരുതരമായ ആരോഗ്യ പ്രശ്നങ്ങളിലേക്ക് നയിക്കുകയും ചെയ്യും.
ആഹാരക്രമം ശ്രദ്ധിക്കുക
പൂരിത കൊഴുപ്പുകള്‍, പഞ്ചസാര, ഉപ്പ് എന്നിവ കൂടുതലുള്ള ഭക്ഷണങ്ങള്‍ ഒഴിവാക്കുക. പഴങ്ങള്‍, പച്ചക്കറികള്‍ എന്നിവ അടങ്ങിയ സമീകൃത ആഹാരം കഴിക്കുക.
ആവശ്യമായ ചികിത്സ അവഗണിക്കരുത്
സ്‌ട്രോക്കിന്റെ ലക്ഷണങ്ങള്‍ തിരിച്ചറിയുകയും എത്രയും വേഗം ചികിത്സ തേടുകയും ചെയ്യേണ്ടത് അത്യാവശ്യമാണ്. ഈ ലക്ഷണങ്ങളില്‍ ഏതെങ്കിലും ഒന്ന് പെട്ടെന്ന് ഉണ്ടായാല്‍ അത് സ്‌ട്രോക്കിന്റെ ലക്ഷണമാകാം. എത്രയും വേഗം ചികിത്സ തേടുന്നത് വളരെ പ്രധാനമാണ്.
