കാവുംമന്ദം: കുട്ടികളുടെ കാര്യക്ഷമത വർദ്ധിപ്പിക്കുന്നതിനും ബാലസഭാ പ്രവർത്തനങ്ങൾക്ക് പുതിയ ദിശാബോധം നൽകുന്നതിനും വേണ്ടി തരിയോട് ഗ്രാമപഞ്ചായത്ത് കളിക്കൂട്ടം എന്ന പേരിൽ ബാലസഭ സംഗമം സംഘടിപ്പിച്ചു. തരിയോട് ഗ്രാമപഞ്ചായത്ത് ഹാളിൽ വച്ച് നടന്ന പരിപാടി തരിയോട് ഗ്രാമപഞ്ചായത്ത് പ്രസിഡണ്ട് ഷമീം പാറക്കണ്ടി ഉദ്ഘാടനം ചെയ്തു. ക്ഷേമകാര്യ സ്ഥിരം സമിതി അധ്യക്ഷ രാധ പുലിക്കോട് അധ്യക്ഷതവഹിച്ചു. ഐസിഡിഎസ് സൂപ്പർവൈസർ എൻ ജി ജിഷ പദ്ധതി വിശദീകരണം നടത്തി. ദിശ ഡയറക്ടർ സാജിദ് മച്ചിങ്ങൽ ക്ലാസ് എടുത്തു.
പാഠ്യ പാഠ്യേതര രംഗങ്ങളിലും സാമൂഹിക ജീവിതക്രമണത്തിലും പുതിയ ആത്മവിശ്വാസം നൽകുന്നതിനും അതിക്രമങ്ങൾക്ക് ഇരയാവാതെയുള്ള ശാരീരിക മാനസിക വളർച്ചക്കും കുട്ടികളെ പ്രാപ്തരാക്കുക എന്നതാണ് ഈ പരിപാടിയിലൂടെ ഗ്രാമപഞ്ചായത്ത് ലക്ഷ്യമിട്ടത്. ബോധവൽക്കരണ ക്ലാസുകൾ, വിവിധ കലാപരിപാടികൾ, വിവിധ വിഷയങ്ങളിൽ സംവാദം എന്നിവ പരിപാടിയുടെ ഭാഗമായി നടത്തപ്പെട്ടു. ഗ്രാമപഞ്ചായത്ത് അംഗങ്ങളായ കെ വി ഉണ്ണികൃഷ്ണൻ, സിബിൽ എഡ്വാർഡ് തുടങ്ങിയവർ സംസാരിച്ചു. ജനപ്രതിനിധികൾ, സിഡിഎസ് എക്സിക്യൂട്ടീവ് അംഗങ്ങൾ, സപ്പോർട്ടിംഗ് കമ്മിറ്റി അംഗങ്ങൾ തുടങ്ങിയവർ പങ്കെടുത്തു. സിഡിഎസ് ചെയർപേഴ്സൺ രാധാമണിയൻ സ്വാഗതവും വൈസ് ചെയർപേഴ്സൺ ജെസ്സി തോമസ് നന്ദിയും പറഞ്ഞു..
