മാനന്തവാടി: ബാവലി മഖാമിലെ ആണ്ട് നേർച്ച 11, 12, 13 തീയതികളില്‍ നടത്തുമെന്ന് ഭാരവാഹികള്‍ വാർത്താസമ്മേളനത്തില്‍ അറിയിച്ചു.
കർണാടക അതിർത്തിയിലെ നൂറ്റാണ്ടുകള്‍ പഴക്കമുള്ള ബാവലി മഖാമില്‍ അന്ത്യവിശ്രമം കൊള്ളുന്ന സയ്യിദ് ബാവ അലി തങ്ങളുടെ പേരിലാണ് വർഷംതോറും ആണ്ട്നേർച്ച നടത്തുന്നത്. 11ന് ഉച്ചയ്ക്ക് ഒന്നിന് മഹല്ല് കമ്മിറ്റി പ്രസിഡന്റ് ഇ.എം. അബ്ദുള്‍ കരിം ഹാജി പതാക ഉയർത്തും.
എടരിക്കോട് ഖാസി സയ്യിദ് സൈനുല്‍ ആബിദീൻ ശിഹാബ് തങ്ങള്‍ മഖാം സിയാറത്തിന് നേതൃത്വം നല്‍കും. രാത്രി എട്ടിന് നടക്കുന്ന മജ്ലിസുന്നൂർ വാർഷികത്തിനും ആത്മീയ സദസിനും പാണക്കാട് സയ്യിദ് ശഹീറലി ശിഹാബ് തങ്ങള്‍ നേതൃത്വം നല്‍കും. 12ന് രാത്രി എട്ടിനുള്ള ദിക്റ് ദുആ മജ്ലിസ് സയ്യിദ് ശഹീർ അലി ശിഹാബ് തങ്ങള്‍ പാണക്കാട് ഉദ്ഘാടനം ചയ്യും.
