ലാ ലിഗയില്‍ റയല്‍ മാഡ്രിഡിനെതിരായ എല്‍ ക്ലാസികോ പോരാട്ടത്തിനിടെ ഇതിഹാസ താരം ക്രിസ്റ്റ്യാനോ റൊണാള്‍ഡോയെ അനുകരിച്ച് ബാഴ്‌സയുടെ യുവതാരം ലാമിന്‍ യമാല്‍. ആദ്യ പകുതിയില്‍ ബാഴ്‌സയുടെ സമനില ഗോള്‍ നേടിയതിന് ശേഷമായിരുന്നു സംഭവം. ഗോളിന് ശേഷം ക്രിസ്റ്റ്യാനോ റൊണാള്‍ഡോയുടെ ഐക്കോണിക്കായ ‘കാല്‍മ സെലിബ്രേഷനാ’ണ് യമാല്‍ കാഴ്ച വെച്ചത്.
32-ാം മിനിറ്റിലായിരുന്നു യമാല്‍ ബാഴ്‌സയുടെ സമനില ഗോള്‍ നേടിയത്. ഒളിംപിക് സ്റ്റേഡിയത്തില്‍ നടന്ന മത്സരത്തില്‍ രണ്ട് ഗോളിന് പിറകില്‍ നിന്ന ശേഷം എറിക് ഗാര്‍ഷ്യയാണ് ബാഴ്‌സയ്ക്ക് വേണ്ടി ആദ്യം ഗോള്‍ മടക്കിയത്, പിന്നാലെ യമാലും റയലിന്റെ വലകുലുക്കി.
ആവേശകരമായ ഗോളിന് ശേഷം കോര്‍ണര്‍ ഫ്‌ളാഗിനടുത്തേക്ക് ഓടിച്ചെന്ന ശേഷമായിരുന്നു യമാലിന്റെ സെലിബ്രേഷന്‍. റയലിന്റെ ഇതിഹാസ താരമായിരുന്ന റൊണാള്‍ഡോയുടെ ആധിപത്യവും ആത്മവിശ്വാസവും പ്രകടിപ്പിക്കുന്ന വൈറല്‍ സെലിബ്രേഷനാണ് ‘കാല്‍മ’. റയലില്‍ തന്നെ എംബാപ്പെയും ഇതേ സെലിബ്രേഷന്‍ അനുകരിച്ചിട്ടുണ്ട്. എന്തായാലും എംബാപ്പെയ്ക്കും റയലിനുമുള്ള മറുപടിയായാണ് യമാല്‍ റൊണാള്‍ഡോയുടെ സെലിബ്രേഷന്‍ അനുകരിച്ചതെന്നാണ് ആരാധകര്‍ പറയുന്നത്.
