കൽപ്പറ്റ: എറണാകുളം ജില്ലാ മഹല്ല് കൂട്ടായ്മയുടെ നേതൃത്വത്തിൽ വയനാട് ദുരന്തബാധിതര്ക്കായി നിർമ്മിച്ച് നൽകുന്ന ഭവനങ്ങൾ കൈമാറുവാൻ അർഹരായവരെ കണ്ടെത്തുന്നതിന് വേണ്ടി അപേക്ഷ സ്വീകരിച്ചു.
മുണ്ടക്കൈ, ചൂരൽമല, പുഞ്ചിരിമട്ടം പ്രദേശവാസികളിൽ നിന്നാണ് അപേക്ഷകൾ സ്വീകരിച്ചത്.
കൊല്ലം ജില്ലക്കാരനായ പ്രവാസി വ്യവസായി അൻസാർ സാഹിബ് സൗജന്യമായി നൽകിയ കൽപ്പറ്റയിൽ കോട്ടത്തറ പഞ്ചായത്തിലെ പത്താം വാർഡിൽ വാളലിലുളള ഒരേക്കർ എട്ട് സെൻറ് സ്ഥലത്താണ് ഭവന നിർമ്മാണം പൂർത്തിയാകുന്നത്. പുനരധിവാസ പദ്ധതിയുടെ ഭാഗമായി 20 ഭവനങ്ങളാണ് മഹല്ല് കൂട്ടായ്മ നിർമ്മിച്ചു നൽകുന്നത്. ഭവന നിർമ്മാണ പദ്ധതിയിലേക്ക് കോട്ടയം ജില്ലയിലെ കങ്ങഴ മുസ്ലിം ജമാഅത്ത് ഒരു ഭവനം നിർമ്മിച്ചു നൽകി. പദ്ധതി കുടിവെള്ള വിതരണത്തിത്തിന് വാട്ടർടാങ്ക് നിർമ്മാണത്തിലേക്ക് പത്തനംതിട്ട ജില്ലാ മഹല്ല് കൂട്ടായ്മ സാമ്പത്തിക സഹായവും നൽകി സഹകരിച്ചു. ഒന്നാം ഘട്ടമെന്ന നിലയിൽ പണി പൂർത്തിയായിട്ടുള്ള പന്ത്രണ്ട് വീടുകളും, പണി നടന്നുകൊണ്ടിരിക്കുന്ന രണ്ട് വീടുകളും ഉൾപ്പെടെ പതിനാല് വീടുകളിലേക്കുള്ള ഗുണഭോക്താക്കളെ കണ്ടെത്തുന്നതിന് വേണ്ടിയുള്ള അപേക്ഷകളാണ് സ്വീകരിച്ചത്.
രാവിലെ പത്ത് മാണിക്ക് മേപ്പാടി വ്യാപാര ഭവനിൽ മഹല്ല് കൂട്ടായ്മ ട്രഷറർ സി.വൈ.മീരാൻ ഹാജിയുടെ അധ്യക്ഷതയിൽ ചൂരൽമല ജുമാ മസ്ജിദ് ചീഫ് ഇമാം ഹാഫിള് ജുനൈദ് അസ്ഹരിയുടെ പ്രാർത്ഥനയോടെ അപേക്ഷ സമർപ്പണ സംഗമം ആരംഭിച്ചു. സംഗമം ജീവകാരുണ്യ പ്രവർത്തകൻ നാസർ മാനു ഉദ്ഘാടനം ചെയ്തു. മഹല്ല് കൂട്ടായ്മ ജനറൽ സെക്രട്ടറി സി.കെ.അമീർ സ്വാഗതം പറഞ്ഞു, മഹല്ല് കൂട്ടായ്മ ചീഫ് കോ-ഓർഡിനേറ്റ്റർ ടി.എ.മുജീബ് റഹ്മാൻ വിഷയാവതരണം നടത്തി. ലത്തീഫ് അഹ്സനി മുഖ്യപ്രഭാഷണം നടത്തി. മേപ്പാടി ഗ്രാമപഞ്ചായത്ത് പ്രസിഡന്റ് ബാബു, മേപ്പാടി മഹല്ല് പ്രസിഡന്റ് മുഹമ്മദ് കുട്ടി, വ്യാപാരി വ്യവസായി ഏകോപനസമ്മതി മേപ്പാടി യൂണിറ്റ് പ്രസിഡന്റ് അഷറഫ്, അബ്ദു ഹാജി ചെന്നലോട്, കുഞ്ഞുട്ടി ഹാജി കാടാമ്പുഴ, മഹല്ല് കൂട്ടായ്മ വൈസ് ചെയർമാൻമാരായ ജബ്ബാർ പുന്നക്കാടൻ, കെ.എ. അലിക്കുഞ്ഞ് ഹാജി വല്ലം, മഹല്ല് കൂട്ടായ്മ ജില്ലാ സെക്രട്ടറി എം.എം.തോട്ടക്കാട്ടുകര, മഹല്ല് കൂട്ടായ്മ ഭാരവാഹികളായ പി.എസ്.അബ്ദുൽ നാസർ വെണ്ണല, അൻവർ ഫിറോസ് ആലുവ, എ.എസ്.അബ്ദുൽ സലാം വടക്കുംപുറം, മുഹമ്മദ് പാറപ്പുറം, ഷബീർ കുറ്റിക്കാട്ടുകര, ശരീഫ് കുറുപ്പാലി, ബെൻഫിഷറി കമ്മിറ്റി കൺവീനർ നിസാർ മുനമ്പം തുടങ്ങിയവർ സംസാരിച്ചു.
