നിങ്ങളുടെ ആധാര്‍ ലോക്ക് ചെയ്തിട്ടുണ്ടോ..?

ആധാർ നമ്പർ എന്നത് വളരെ പ്രധാനമാണ്. ബാങ്ക് അക്കൗണ്ടുകളിലേക്കടക്കം നമ്മുടെ സ്വകാര്യതയിലേക്ക് കയറാനുള്ള താക്കോല്‍ കൂടിയാണ് ആധാർ. ആധാർ സുരക്ഷിതമാക്കിയില്ലെങ്കില്‍ ജീവിതത്തിലെ മുഴുവൻ സാമ്പാദ്യവും നഷ്ടമാകാൻ കാരണമാകും. അതില്‍ നിന്നെല്ലാം സംരക്ഷിക്കാനുള്ള ഏക വഴി ആധാർ സുരക്ഷിതമാക്കുക എന്നതാണ്. നമ്മുടെ ആധാർ നമ്മുക്ക് നിരവധി സൗകര്യങ്ങള്‍ നല്‍കുന്നുണ്ടെങ്കിലും അത് മറ്റുള്ളവരിലെത്തിയാല്‍ സംഭവിക്കാൻ സാധ്യതയുള്ളത് വലിയ അപകടങ്ങളാണ്.

ആധാർ നമ്പർ ചോർന്നാല്‍ അത് ലഭിക്കുന്നവർക്ക് സിംകാർഡുകള്‍ പരിശോധിക്കുന്നത് മുതല്‍ നമ്മുടെ പേരില്‍ മറ്റുള്ളവർക്ക് ബാങ്ക് അക്കൗണ്ടുകള്‍ തുടങ്ങാൻവരെ സാധിക്കും. അനധികൃത യുപിഐ പേയ്‌മെന്റുകള്‍ നടത്തുക, അക്കൗണ്ടില്‍ നിന്ന് പണം പിൻവലിക്കുക തുടങ്ങിയ കാര്യങ്ങള്‍ക്കും ഉപയോഗിക്കാനാകും.

*ഇടപാടുകള്‍ നടക്കുമ്പോള്‍*

ഒടിപി വരും എന്ന് നിങ്ങള്‍ കരുതി ആശ്വസിക്കുന്നുണ്ടെങ്കില്‍ ഓർക്കുക പല ഗ്രാമീണ ബാങ്കുകളില്‍ ഫോണ്‍ നമ്പർ പോലും ആവശ്യമില്ല. അവിടെയാണ് യഥാർത്ഥ അപകടസാധ്യത. പണം പോകുന്നതും വരുന്നതും അറിയില്ല. കാരണം എസ്‌എംഎസോ കോളുകളോ ലഭിക്കില്ല. എടിഎമ്മുകളിലും ബ്രാഞ്ചുകളിലും സിസിടിവി ക്യാമറകള്‍ ഇല്ലെങ്കില്‍ ആരാണ് പണമെടുത്തതെന്ന് കണ്ടെത്താൻ പ്രയാസമാണ്. ഉത്തരേന്ത്യൻ സംസ്ഥാനങ്ങളില്‍ ഇത് വ്യാപകമായി സംഭവിച്ചുകൊണ്ടിരിക്കുകയാണ്. ജാർഖണ്ഡ്, യുപി, ബിഹാർ, ഛത്തീസ്ഗഡ്, ഒഡീഷ എന്നിവിടങ്ങളിലെ നഗരങ്ങളില്‍ പോലും ഇത്തരം സംഭവങ്ങള്‍ റിപ്പോർട്ട് ചെയ്തിട്ടുണ്ട്. ലോക്ക് ചെയ്യാത്ത ആധാറാണ് ഇത്തരം അപകട സാധ്യതകള്‍ ഉണ്ടാക്കുന്നതെന്നാണ് വിദഗ്ദ്ധർ നല്‍കുന്ന മുന്നറിയിപ്പ്. ഇതിന് പരിഹാരമായി നമ്മള്‍ എന്താണ് ചെയ്യേണ്ടത്. ആധാർ ബയോമെട്രിക്സ് സുരക്ഷിതമാക്കുകയെന്നതാണ് അതിന് യാതൊരു ചെലവുമില്ല, ഒരു മിനിറ്റ് മാത്രം മതി, ബയോമെട്രിക് വഴിയുള്ള തട്ടിപ്പില്‍ നിന്ന് ഒരു പരിധിവരെ സംരക്ഷിക്കാൻ അതുമതിയാകും.

*എങ്ങനെ*,
*സുരക്ഷിതമാക്കാം*

UIDAI-യുടെ ഔദ്യോഗിക വെബ്സൈറ്റ് സന്ദർശിക്കുക .
‘My Aadhaar’ വിഭാഗത്തിലേക്കും തുടർന്ന് Aadhaar Services എന്നതിലേക്കും പോകുക. Lock/Unlock Aadhaar അല്ലെങ്കില്‍ Lock/Unlock Biometrics തിരഞ്ഞെടുക്കുക.
Lock UID അല്ലെങ്കില്‍ Enable Biometric Lock എന്ന ഓപ്ഷൻ തിരഞ്ഞെടുക്കുക.
ആധാർ നമ്പറും മറ്റ് ആവശ്യമായ വിശദാംശങ്ങളും നല്‍കുക.
ലോക്കിംഗ് പ്രക്രിയ പൂർത്തിയാക്കാൻ തുടർന്നുള്ള നിർദ്ദേശങ്ങള്‍ പാലിക്കുക. നിങ്ങളുടെ വിരലടയാളവും ഐറിസ് ഡാറ്റയും സുരക്ഷിതമാണ്. അണ്‍ലോക്ക് ചെയ്യുന്നതുവരെ നിങ്ങള്‍ക്ക് അത് വീണ്ടും ഉപയോഗിക്കാൻ കഴിയില്ല. mAadhaar ആപ്പ് ഉപയോഗിച്ച്‌ ഫോണിലും ഇത് ചെയ്യാൻ കഴിയും. ബയോമെട്രിക്സ് ഉപയോഗിക്കേണ്ടി വരുമ്പോള്‍ അണ്‍ലോക്ക് ചെയ്ത് ഉപയോഗിക്കുക. തുടർന്ന് വീണ്ടും ലോക്ക് ചെയ്യുക. അണ്‍ലോക്ക് ചെയ്ത ആധാർ എന്നത് എടിഎം കാർഡിന് പിന്നില്‍ പിൻ എഴുതിയ ശേഷം റോഡില്‍ ഉപേക്ഷിക്കുന്നത് പോലെയാണ്.