വയനാട്ടിലെ അതിര്‍ത്തി പ്രദേശങ്ങളില്‍ വരാനിരിക്കുന്നത് വരള്‍ച്ചാകാലമെന്ന് റിപ്പോര്‍ട്ട്. കര്‍ണാടക- തമിഴ്നാട് അതിര്‍ത്തിയോട് ചേര്‍ന്ന് കിടക്കുന്ന വയനാട്ടിലെ എട്ട് പ്രദേശങ്ങളിലാണ് വരള്‍ച്ചാ സാധ്യത പ്രവചിക്കപ്പെടുന്നത്. ഈ മേഖലകളില്‍ ഇത്തവണ പ്രതീക്ഷിച്ചതിലും കുറവ് മഴയാണ് ആകെ ലഭിച്ചത്.
ആഗസ്റ്റ് ഒന്ന് മുതല്‍ ജില്ലയുടെ ചില ഭാഗങ്ങളില്‍ അതിശക്തമായ മഴ ലഭിച്ചപ്പോഴും താരതമ്യേന കുറഞ്ഞ മഴ ലഭിച്ച സുല്‍ത്താന്‍ബത്തേരി താലൂക്കിലും പരിസരങ്ങളിലുമാണ് വിദഗ്ധര്‍ വരള്‍ച്ചാ സാധ്യത മുന്നില്‍ക്കാണുന്നത്. ജില്ലയില്‍ 12 തദ്ദേശസ്ഥാപന പ്രദേശങ്ങളില്‍ ജില്ലാ ശരാശരിയേക്കാള്‍ കൂടുതല്‍ മഴ കിട്ടിയപ്പോള്‍ പതിനാലിടത്ത് മഴ പ്രതീക്ഷിച്ചതിലും ഏറെ കുറഞ്ഞു.സംസ്ഥാന അതിര്‍ത്തിയോട് ചേര്‍ന്നുള്ള സുല്‍ത്താന്‍ബത്തേരി, നൂല്‍പ്പുഴ, നെന്മേനി, പൂതാടി, മുളളന്‍ക്കൊല്ലി, പുല്‍പ്പളളി, ബാവലി മേഖലകളില്‍ ഇത്തവണ മഴയുടെ ലഭ്യത തീരെ കുറവായിരുന്നു. മണ്ണില്‍ നിന്ന് ജലവാര്‍ച്ച കൂടുതലുളള ഈ പ്രദേശം വരള്‍ച്ചയിലേക്ക് നീങ്ങുന്നതിന്റെ ലക്ഷണമാണുളളതെന്ന് ജില്ലാ മണ്ണ് സംരക്ഷണ ഓഫീസര്‍ പിയു ദാസ്. 2131 ചതുരശ്ര കിലോമീറ്റര്‍ മാത്രം വിസ്തൃതിയുളള വയനാട്ടില്‍ മഴയുടെ വിതരണത്തില്‍ ഇത്രയും വ്യത്യാസം വരുന്നത് കാലാവസ്ഥാ വ്യതിയാനത്തിന്റെ ഉദാഹരണമാണെന്നാണ് നിഗമനം. മഴയുടെ അളവിനെ ആസ്പദമാക്കി പഠനം നടത്തിയ സംഘമാണ് വരള്‍ച്ച മുന്നറിയിപ്പ് നല്‍കുന്നത്.
