മാനന്തവാടി ∙ ലോക വനിതാ ദിനത്തിൽ വനിതാ രക്തദാന വാരാചരണം തുടങ്ങി.
ജില്ലയിലെ ആതുരാലയങ്ങളിൽ ആവശ്യമായ രക്തം എത്തിക്കുക, വനിതകളെ കൂടുതലായി
രക്തദാനത്തിന് സന്നദ്ധരാക്കുക തുടങ്ങിയ ലക്ഷ്യങ്ങളോടെ വേയ്‌വ്സ്
ചാരിറ്റബിൾ സൊസൈറ്റിയുടെ നേതൃത്വത്തിലാണ് സന്നദ്ധ രക്തദാന വാരാചരണം
നടക്കുന്നത്. മാർച്ച് 8 മുതൽ 15 വരെയുള്ള ദിവസങ്ങളിൽ മെഡിക്കൽ കോളാജായി
ഉയർത്തിയ മാനന്തവാടി ജില്ലാ ആശുപത്രി ബ്ലഡ് ബാങ്ക്, ബത്തേരി താലൂക്ക്
ആശുപത്രി ബ്ലഡ് ബാങ്ക്, മേപ്പാടി വിംസ് മെഡിക്കൽ കോളജ് ബ്ലഡ് ബാങ്ക്
എന്നിവിടങ്ങളിലായി രക്തംദാനം നടക്കും. 18നും 65നും ഇടയിൽ പ്രായമുള്ള 50
കിലോഗ്രാമിലേറെ ശരീരഭാരമുള്ള മറ്റ് അസുഖങ്ങളില്ലാത്ത വനിതകൾക്ക് രക്തം
ദാനം നടത്താം.
വയനാട് മെഡിക്കൽ കോളജിലടക്കം അനുദിനം രക്തം ആവശ്യമായവരുടെ എണ്ണം കൂടി
വരികയാണ്. സ്വയം ബ്ലഡ് ബാങ്കിൽ എത്തി രക്തം നൽകുന്നവരിലൂടെയും വിവിധ
സ്ഥലങ്ങളിൽ നടക്കുന്ന രക്തദാന ക്യാംപുകളിലൂടെയുമാണ് രക്തം
സമാഹരിക്കുന്നത്. എന്നാൽ ഗോത്രവിഭാഗങ്ങളിൽ പെട്ടവർക്ക് കൂടുതൽ ആവശ്യമായി
വരുന്ന എ പോസറ്റീവ് രക്തത്തിന് അടക്കം പലപ്പോഴും ക്ഷാമം നേരിടുന്ന
സാഹചര്യമാണ് നിലവിലുള്ളത്. കോവജുകളിൽ സാധാരണ പോലെ ക്ലാസുകൾ
ആരംഭിക്കാത്തതിനാൽ രക്തദാനത്തിനായി പഴയതുപോലെ വിദ്യാർഥികളെ കിട്ടാത്തതും
പ്രയാസം ഉണ്ടാക്കുന്നുണ്ട്. കോവിഡ് ഭീതിയെ തുടർന്ന് പലരും രക്തദാനത്തിന്
വിമുഖത കാണിക്കുന്ന സാഹചര്യത്തിലാണ് വിദ്യാർഥിനികളും യുവതികളും അടക്കം
സന്നദ്ധ രക്തദാനത്തിന് സന്നദ്ധരായി രംഗത്ത് എത്തിയത്.
മാനന്തവാടി ബ്ലഡ് ബാങ്കിൽ നടത്തിയ ചടങ്ങിൽ തൊണ്ടർനാട് പഞ്ചായത്ത് സ്ഥിരം
സമിതി അധ്യക്ഷ മൈമൂനത്ത് ഉദ്ഘാടനം ചെയ്തു. വേയ്‌വ്സ് ചാരിറ്റബിൾ സൊസൈറ്റി
ചെയർമാൻ കെ.എം. ഷിനോജ് അധ്യക്ഷത വഹിച്ചു. ബ്ലഡ് ബാങ്ക് മെഡിക്കൽ ഒാഫിസർ
ഡോ. ബിനിജ മെറിൻ ജോയി, വേയ്‌വ്സ് പിആർഒ ജസ്റ്റിൻ ചെഞ്ചട്ട, മാനന്തവാടി
ശ്രീശങ്കര കംപ്യൂട്ടർ സെന്റർ മാനേജർ ആഷിഖ് പിലാക്കാവ്, ഷീജ ഫ്രാൻസിസ്,
എന്നിവർ പ്രസംഗിച്ചു. ശരണ്യ സുമേഷ്, ട.പി. ലിബി, ഷീജ ഫ്രാൻസിസ്, ടി.സി.
റിനിമോൾ, കെ.എൻ. നിഖില, ഷിന്റ മാത്യു തുടങ്ങിയവർ ആദ്യ ദിനം രക്തം ദാനം
ചെയ്തു.
