കറിവേപ്പ്
കറിവേപ്പ് വളര്‍ത്തുന്നവരുടെ സ്ഥിരം പ്രശ്നമാണ് ഇലകള്‍ക്ക് പച്ചപ്പ് നഷ്ടമാകുന്നതും തളിരിലകള്‍ ഉണ്ടാകാത്തതും. നല്ല പോലെ വളമിട്ടു കൊടുത്താലും നല്ല ഇലകള്‍ വളര്‍ന്നു വരികയില്ല. നിരവധി കാരണങ്ങള്‍ കൊണ്ടു ഈ പ്രശ്നമുണ്ടാകാം. ഇതിനുള്ള ചില പ്രതിവിധികള്‍ പരിശോധിക്കാം.
പ്രശ്‌നക്കാര്‍ ചെറുപ്രാണികള്‍
ചെറുപ്രാണികളുടെ ആക്രമണമാണ് പ്രധാനകാരണം. കറിവേപ്പിന്റെ ഇലയിലും തണ്ടിലും ചെറുപ്രാണികള്‍ ആക്രമിക്കുന്നുണ്ട്. ഇവയെ തുരത്താന്‍ വെര്‍ട്ടിസിലിയം 20 ഗ്രാം ഒരു ലിറ്റര്‍ വെള്ളത്തില്‍ കലക്കി ഇലകളില്‍ തളിക്കുക. തലേ ദിവസത്തെ കഞ്ഞി വെള്ളം തളിക്കുന്നതും ഗുണം ചെയ്യും.
മണ്ഡരിയും മുഞ്ഞയും
മണ്ഡരി, മുഞ്ഞ എന്നിവയുടെ ആക്രമം മൂലവും ഇങ്ങനെ സംഭവിക്കാം. ഇവയെ നിയന്ത്രിക്കാന്‍ 5% വീര്യമുള്ള വേപ്പിന്‍കുരു സത്ത് ലായനിയോ 10% വീര്യമുള്ള കിരിയാത്ത് സോപ്പ് ലായനിയോ രണ്ടാഴ്ച ഇടവിട്ട് ഇലകളില്‍ തളിച്ചുകൊടുക്കണം. പസിലൊമൈസിസ് എന്ന ജീവാണുക്കള്‍ മണ്ഡരികളെ നിയന്ത്രിക്കാന്‍ ഫലപ്രദമാണ്. 15 ഗ്രാം പസിലൊമൈസിസ് ഒരു ലിറ്റര്‍ വെള്ളത്തില്‍ എന്ന കണക്കില്‍ ഇലകളില്‍ തളിച്ചുകൊടുക്കുക. ഇലകളില്‍ പ്രത്യേകിച്ച് അടിഭാഗത്ത് വെള്ളം ശക്തിയായി സ്പ്രേ ചെയ്യുന്നതിലൂടെ മണ്ഡരികളെ ഒഴുക്കിക്കളയാനാകും.
