അടുക്കളയില്‍ നിത്യവും ഉപയോഗിക്കുന്നതാണ് മുളക്. പച്ചമുളകില്ലാത്ത അടുക്കള തന്നെയുണ്ടാകില്ല. ഇതിനാല്‍ അടുക്കളത്തോട്ടത്തില്‍ രണ്ടോ മൂന്നോ ചുവട് മുളക് വളര്‍ത്തുന്നവരാണ് എല്ലാ കര്‍ഷകരും. എന്നാല്‍ കീടങ്ങളും രോഗങ്ങളും മുളകിനെ എളുപ്പം ബാധിക്കും. ഇതില്‍ പ്രധാനമാണ് മുരടിപ്പ്.
മുരടിപ്പ് ലക്ഷണങ്ങള്‍
മുളക് ചെടി വളര്‍ന്ന് ഇലകള്‍ വന്നു തുടങ്ങിയാല്‍ മുരടിക്കല്‍ രോഗവും ബാധിക്കും. ഇലകള്‍ ചുരുണ്ട് ചെടി വളര്‍ച്ചയില്ലാതെ നില്‍ക്കും. കായ് പിടുത്തമുണ്ടാകില്ല, ഉണ്ടെങ്കില്‍ തന്നെ ചെറിയ കായ്കളായിരിക്കും. നിരവധി ജൈവകീടനാശിനികള്‍ പ്രയോഗിച്ചാലും രോഗം വിട്ടുമാറാന്‍ പ്രയാസമായിരിക്കും.
ചികിത്സ തുടക്കം മുതല്‍
മുരടിപ്പ് കാണുമ്പോള്‍ തന്നെ ഇതിനെതിരേയുള്ള കീടനാശിനികള്‍ പ്രയോഗിച്ചു തുടങ്ങണം. രോഗം ബാധിച്ചു ദിവസങ്ങള്‍ കഴിഞ്ഞു പ്രതിരോധ പ്രവര്‍ത്തനങ്ങള്‍ സ്വീകരിച്ചാല്‍ വലിയ ഫലം ചെയ്യില്ല. കീടനാശിനികള്‍ തളിക്കുമ്പോള്‍ ഇലയുടെ രണ്ടു ഭാഗത്തും തണ്ടിലുമെത്തുന്ന തരത്തില്‍ വേണം ചെയ്യാന്‍. വൈകുന്നേരമാണ് കീടനാശിനികള്‍ പ്രയോഗിക്കാന്‍ നല്ലത്.
വേപ്പെണ്ണയും വെളുത്തുള്ളിയും
വേപ്പെണ്ണ – വെളുത്തുള്ളി മിശ്രിതമാണ് മുരടിപ്പിനെതിരേ പ്രയോഗിക്കാന്‍ മികച്ച ജൈവകീടനാശിനി. നിഷ് പ്രയാസം ഇതു വീട്ടിലുണ്ടാക്കാം. വെളുത്തുള്ളി ഒരു പിടിയെടുത്ത് അരച്ച് 50 മില്ലി ലിറ്റര്‍ വേപ്പെണ്ണയില്‍ ചേര്‍ത്ത് അരിച്ചെടുക്കുക. ആവശ്യത്തിന് വെള്ളം ചേര്‍ത്ത് ചെടിയില്‍ തളിക്കാം. ഇതു പോലെ വേപ്പെണ്ണയും ബാര്‍സോപ്പും ചേര്‍ത്തുള്ള ലായനിയും നല്ലതാണ്. മുളക് തൈകള്‍ ഗ്രോബാഗിലേക്കും തടത്തിലേക്കും പറിച്ചു നട്ട് പത്താം ദിവസം മുതല്‍ ഈ ലായനികള്‍ തളിക്കുന്നത് നല്ലതാണ്, മുരടിപ്പ് രോഗം വരാതെയിരിക്കും. രണ്ടാഴ്ചയിലൊരിക്കല്‍ തളിക്കുന്നതാണ് നല്ലത്.
നന്മയും നല്ലതാണ്
കൃഷി വിജ്ഞാന കേന്ദ്രങ്ങള്‍ വഴി ലഭിക്കുന്ന നന്മ എന്ന ജൈവമിശ്രിതവും മുരടിപ്പിനെതിരേ ഉപയോഗിക്കാം. നന്മ അഞ്ച് മില്ലി ലിറ്റര്‍ ഒരു ലിറ്റര്‍ വെള്ളത്തില്‍ എന്ന തോതില്‍ കലര്‍ത്തി പ്രയോഗിക്കാം. ലെക്കാനിസീലിയം ലെക്കാനി എന്ന ജൈവമിത്ര കുമിള്‍ പ്രയോഗിക്കുന്നതും നല്ലതാണ്. പൊടിരൂപത്തിലുള്ള ലെക്കാനിസീലിയം 20 ഗ്രാം ഒരു ലിറ്റര്‍ വെള്ളത്തില്‍ കലക്കിയെടുത്ത് തളിക്കാം.
