ഭോപ്പാൽ: ലൈംഗിക പീഡന ശ്രമത്തിനിടെ യുവാവിന്റെ ജനനേന്ദ്രിയം മുറിച്ച് യുവതി. മദ്ധ്യപ്രദേശിലെ സീധി ജില്ലയിലാണ് കേസിനാസ്പദമായ സംഭവം നടന്നത്. വീട്ടിൽ അതിക്രമിച്ച് കടന്ന് തന്നെ പീഡിപ്പിക്കാൻ ശ്രമിച്ച യുവാവിന്റെ ജനനേന്ദ്രിയം 45 വയസുകാരി അരിവാളിന് മുറിച്ചെടുക്കുകയായിരുന്നു. സംഭവത്തിൽ യുവതിക്കും യുവാവിനും എതിരെ പൊലീസ് കേസ് രജിസ്റ്റർ ചെയ്തിട്ടുണ്ട്.
യുവതിയുടെ ഭർത്താവ് വീട്ടിലില്ലാത്ത സമയത്താണ് സംഭവം നടന്നത്. പ്രതി വീട്ടിൽ അതിക്രമിച്ച് കയറുമ്പോൾ യുവതിയുടെ 13 വയസുളള മകനും അവിടെയുണ്ടായിരുന്നു. മോഷണ ശ്രമമാണെന്ന് കരുതി മകനോപ്പം വീടിനു പുറത്തേക്ക് ഓടി രക്ഷപ്പെട്ടയുവതിയെ പ്രതി മർദ്ദിക്കുകയും അവരെ ലൈംഗികമായി പീഡിപ്പിക്കാൻ ശ്രമിക്കുകയായിരുന്നു. ഇതോടെ സ്വയരക്ഷയ്ക്കായി കട്ടിലിനടിയിൽ സൂക്ഷിച്ചിരുന്ന അരിവാൾ ഉപയോഗിച്ച് യുവതി യുവാവിന്റെ ജനനേന്ദ്രിയം മുറിക്കുകയായിരുന്നു.
സംഭവം നടന്നതിനു പിന്നാലെ യുവതിതന്നെയാണ് പൊലീസിനെ സമീപിക്കുകയും പരാതിനൽകുകയും ചെയ്തത്. പൊലീസ് പ്രതിയെ ആശുപത്രിയിൽ എത്തിക്കുകയും ചികിത്സ ലഭ്യമാക്കുകയും ചെയ്തു.
യുവാവിനെതിരെ ഐപിസി സെക്ഷൻ 354,456,294,506 വകുപ്പുകൾ പ്രകാരം പൊലീസ് കേസ് രജിസ്റ്റർ ചെയ്തതായി വാർത്താ ഏജൻസികൾ റിപ്പോർട്ട് ചെയ്തു. അതേസമയം പ്രതിയും യുവതിക്കെതിരെ പരാതി നൽകി. ഇവർക്കെതിരെ ഐപിസി സെക്ഷൻ 327 വകുപ്പ് പ്രകാരമാണ് കേസ് രജിസ്റ്റർ ചെയ്തിരിക്കുന്നത്.
