തന്റെ പുതിയ സിനിമയായ ‘രേഖ’യ്ക്ക് വേണ്ടത്ര ഷോകള് ലഭിക്കാത്തതിന്റെ നിരാശ പങ്കുവച്ച് വിന്സി അലോഷ്യസ്. സോഷ്യല് മീഡിയയിലൂടെയാണ് വിന്സി പ്രതികരിച്ചിരിക്കുന്നത്. ഒരു പോസ്റ്റര് പോലും സിനിമയുടെതായി തിയേറ്ററുകളില് ഇല്ല. ഒരു സിനിമയ്ക്കും ഈ ഗതി വരുത്തരുതെ എന്നാണ് വിന്സി പറയുന്നത്.
”ഞങ്ങളുടെ സിനിമ രേഖ, വലിയ തിയറ്ററുകളോ ഷോസോ ഒന്നും ഇല്ല. ഒരുപാട് കഷ്ടപ്പെട്ട് ചെയ്ത സിനിമയാണ്. ആളുകള് ചോദിക്കുന്നു ഷോകള് കുറവാണല്ലോ, ഞങ്ങളുടെ നാട്ടില് ഇല്ലല്ലോ, പോസ്റ്റര് ഇല്ലല്ലോ എന്നൊക്കെ. സത്യം പറഞ്ഞാല് നല്ല വിഷമം ഉണ്ട്. ഇങ്ങനെ ആവും എന്ന് വിചാരിച്ചില്ല.”
”ആകെയുള്ളത് ഞങ്ങളുടെ സിനിമയിലുള്ള വിശ്വാസം മാത്രം. വലിയ സ്റ്റാര് കാസ്റ്റ് ഒന്നും ഇല്ലാത്തതിനാല് ഞങ്ങള് ഇത്രയൊക്കെ പ്രതീക്ഷിച്ചാല് മതി. ഇനി നിങ്ങളുടെ കയ്യിലാണ്. ഉള്ള തിയേറ്ററില് ഉള്ള ഷോസ് കാണാന് ശ്രമിക്കണം. ഇല്ലെങ്കില് നാളെ ഞങ്ങളുടെ സിനിമ അവിടെ കാണില്ല.”
”നല്ല അഭിപ്രായങ്ങള് വരുന്നുണ്ട്. ഒരുപാട് പ്രതീക്ഷയോടെ കാത്തിരിക്കുന്നു. ഒരു പോസ്റ്റര് പോലും ഇല്ലാത്ത സിനിമ അത് ഒരുപക്ഷെ ഞങ്ങളുടെ ആയിരിക്കും. കളിക്കുന്ന തിയേറ്ററില് പോലും പോസ്റ്റര് ഇല്ല, ഒരു സിനിമയ്ക്കും ഈ ഗതി വരരുത്” എന്നാണ് വിന്സി ഇന്സ്റ്റഗ്രാമില് പങ്കുവച്ച കുറിപ്പില് പറയുന്നത്.
