ഇന്ന് ഭൂരിഭാഗം ആളുകളുടെയും നിത്യജീവിതത്തിന്റെ ഭാഗമാണ് സ്മാര്ട്ട്ഫോണുകള്. വെറുമൊരു ഇലക്ട്രോണിക് ഉപകരണം എന്നതിലുപരി, നമ്മുടെ എല്ലാ വ്യക്തിഗത വിവരങ്ങളും സ്മാര്ട്ട്ഫോണുകളിലാണ് സൂക്ഷിക്കാറുള്ളത്. ഇവയില് ആധാര് അടക്കമുള്ള ഔദ്യോഗിക രേഖകളും ഉള്പ്പെടാറുണ്ട്. എന്നാല്, ഇത്തരത്തിലുള്ള പ്രധാന വിവരങ്ങള് കവരാൻ നമുക്കുചുറ്റും ഹാക്കര്മാരും ഒളിഞ്ഞിരിപ്പുണ്ട്. അതിനാല്, ഫോണിന്റെ സുരക്ഷിതത്വം ഉറപ്പുവരുത്തേണ്ടത് അനിവാര്യമാണ്. ഏതൊക്കെ മാര്ഗ്ഗങ്ങളിലൂടെയാണ് സ്മാര്ട്ട്ഫോണ് സുരക്ഷിതമായി ഉപയോഗിക്കേണ്ടതെന്ന് അറിയാം.
സ്മാര്ട്ട്ഫോണുകളില് വെബ് ആക്ടിവിറ്റി ഓണ് ആയിട്ടുണ്ടെങ്കില്, നമ്മുടെ പ്രവര്ത്തനങ്ങള് എല്ലാം ഫോണ് ചോര്ത്തി എടുക്കുന്നുണ്ടെന്നാണ് അര്ത്ഥം. അതിനാല്, വെബ് ആക്ടിവിറ്റി ഓഫ് ആണെന്ന് ഉറപ്പുവരുത്തുക. ഇവ ഓണ് ആയിരിക്കുന്നത് ഹാക്കിംഗിനുള്ള സാധ്യത വര്ദ്ധിപ്പിക്കുന്നു.
പലപ്പോഴും വിവിധ പാസ്വേഡുകള് എളുപ്പത്തില് ഓര്ത്തെടുക്കാനായി ചാറ്റുകളിലോ, മറ്റോ സൂക്ഷിച്ചു വയ്ക്കാറുണ്ട്. കൂടാതെ, പാസ്വേഡ് ബ്രൗസറില് സേവ് ചെയ്ത് വയ്ക്കുന്നവരുടെ എണ്ണവും കുറവല്ല. ഈ പ്രവണത പരമാവധി കുറയ്ക്കേണ്ടതാണ്. പാസ്വേഡ് ബ്രൗസറില് സേവ് ചെയ്യുന്നതിന് പകരം, പാസ്വേഡ് മാനേജര് ആപ്പുകളുടെ സഹായം തേടാവുന്നതാണ്.
യുപിഐ, ഹെല്ത്ത് ആപ്പുകള്, ഗ്യാലറി, ഷോപ്പിംഗ് ആപ്പുകള് എന്നിവയ്ക്കെല്ലാം ലോക്ക് ഉപയോഗിക്കുക. കൂടാതെ, എല്ലാ പ്ലാറ്റ്ഫോമുകള്ക്കും ഒരേ പാസ്വേഡ് നല്കുന്ന ശീലവും ഒഴിവാക്കേണ്ടതാണ്. പരമാവധി ബയോമെട്രിക് ലോക്ക് നല്കുന്നതാണ് ഉത്തമം.
ആപ്പുകള്ക്ക് പുറമേ, ഫോണുകള്ക്കും ലോക്ക് നിര്ബന്ധമാണ്. ഇതിനായി ആൻഡ്രോയിഡ് ഇൻ-ബില്റ്റ് സെക്യൂരിറ്റി ഫീച്ചറുകള് ഉപയോഗിച്ചുള്ള പാസ്വേഡുകള് നല്കുന്നത് ശ്രദ്ധിക്കുക. എല്ലാ മാസവും ഫോണിലെ ഡാറ്റ ബാക്കപ്പ് ചെയ്യാവുന്നതാണ്. ഇങ്ങനെ ചെയ്യുന്നതിലൂടെ ഫോണിലെ ഡാറ്റ മോഷ്ടിക്കപ്പെട്ടിട്ടില്ലെന്ന് സ്ഥിരീകരിക്കാനാകും.
