മസ്ക്കറ്റ്: ഒമാനിൽ ഹെവി പിക്കപ്പ് വാഹനം മറിഞ്ഞ് മലയാളി മെഡിക്കല് വിദ്യാര്ത്ഥി മരിച്ചു. കണ്ണൂര് കുടുക്കിമൊട്ട് സ്വദേശി റാഹിദ് മുഹമ്മദ് റഫീഖ്(20)ആണ് മരിച്ചത്.
പിതാവിന്റെ സഹോദരി പുത്രനുമായി ഒമാനിലെ ഖസബിൽ പോയി മടങ്ങും വഴിയിൽ ഖസബിൽ നിന്നും ഏതാണ്ട് പത്തു കിലോമീറ്റർ അകലെ ഹറഫിൽ വച്ചാണ് അപകടം. ഞായറാഴ്ച പുലർച്ചെ 12.30നായിരുന്നു അപകടം നടന്നത്.
ഈജിപ്തില് എംബിബിഎസിന് പഠിച്ചുകൊണ്ടിരിക്കുകയായിരുന്ന റാഹിദ് പിതാവിനെ കാണാനാണ് ഖസബിലെത്തിയത്. പിതാവിനെ കണ്ട് മടങ്ങുന്ന വഴിയിൽ ഇവർ സഞ്ചരിച്ച ഹെവി പിക്കപ്പ് വാഹനം നിയന്ത്രണം വിട്ട് മറിയുകയായിരുന്നു. റോഡിലേക്ക് തെറിച്ച് വീണ റാഹിദ് സംഭവസ്ഥലത്ത് വച്ച് തന്നെ മരിച്ചു.
റാഹിദിൻ്റെ മൃതദേഹം ഖസബിൽ ഖബറടക്കം നടത്തുന്നതിനായുള്ള നടപടികൾക്കായുള്ള ശ്രമങ്ങൾ നടന്നുവരികയാണെന്ന് കെഎംസിസി പ്രസിഡൻ്റ് സിദ്ദീഖ് കണ്ണൂർ പറഞ്ഞു
വിവരം ലഭിച്ചതിനെ തുടർന്ന് റോയൽ ഒമാൻ പൊലീസ് ഉടൻ അപകട സ്ഥലത്തെത്തി നടപടികൾ സ്വീകരിച്ചു. മൃതദേഹം ഖസബ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.
