കൽപ്പറ്റ: സമസ്ത മേഖലയിലും ദുരിതം വിതച്ച ഇടതു സർക്കാർ തികഞ്ഞ പരാജയമായി മാറിയിരിക്കുകയാണെന്ന് ഡി.സി.സി പ്രസിഡണ്ട് എൻ.ഡി.അപ്പച്ചൻ എക്സ് എം.എൽ.എ അഭിപ്രായപ്പെട്ടു. സാധാരണ ജനവിഭാഗത്തിൻ്റെ ജീവിതം ദുസ്സഹമായിരിക്കുകയാണ്, തൊഴിൽ മേഖലകളെല്ലാം തകർന്നിരിക്കുകയാണ്, ജീവനക്കാരും അധ്യാപകരും നിലവിലുള്ള ആനുകൂല്യങ്ങൾ സംരക്ഷിക്കുന്നതിന് പോലും കോടതി കയറേണ്ട സ്ഥിതി വിശേഷമാണ്. ഈ സാഹചര്യത്തിലാണ് സെറ്റോയുടെ നേതൃത്വത്തിൽ സൂചനാ പണിമുടക്ക് ആഹ്വാനം ചെയ്തിരിക്കുന്നത്. പണിമുടക്കിൻ്റെ മുദ്രാവാക്യങ്ങൾ പ്രചരിപ്പിച്ചു കൊണ്ട് നടത്തുന്ന അതിജീവന യാത്ര എല്ലാവരും ഏറ്റെടുക്കുമെന്ന് കൽപ്പറ്റയിൽ ചേർന്ന സ്വീകരണ സമ്മേളനം ഉദ്ഘാടനം ചെയ്തു കൊണ്ട് അദ്ദേഹം പറഞ്ഞു.
കുടിശ്ശികയായ ആറു ഗഡു ക്ഷാമബത്ത അനുവദിക്കുക, ലീവ് സറണ്ടർ പുനസ്ഥാപിക്കുക, ശമ്പള പരിഷ്കരണ കുടിശ്ശിക അനുവദിക്കുക, പങ്കാളിത്ത പെൻഷൻ പിൻവലിക്കുക, മെഡിസെപ്പിലെ അപാകതകൾ പരിഹരിക്കുക, വിലക്കയറ്റം തടയുക തുടങ്ങിയ ആവശ്യങ്ങൾ ഉന്നയിച്ചു കൊണ്ടാണ് സെറ്റോയുടെ നേതൃത്വത്തിൽ ജീവനക്കാരും അധ്യാപകരും 2024 ജനുവരി 24-ന് പണിമുടക്കുന്നത്. പണിമുടക്ക് മുദ്രാവാക്യങ്ങൾ ഉയർത്തിക്കൊണ്ട് സംസ്ഥാന ചെയർമാൻ ചവറ ജയകുമാർ ക്യാപ്റ്റനും, കെ.അബ്ദുൾ മജീദ് വൈസ് ക്യാപ്റ്റനും, കെ.സി.സുബ്രഹ്മണ്യൻ മാനേജറുമായിട്ടുള്ള അതിജീവന യാത്ര ഡിസംബർ 11-ന് കാസറഗോഡ് നിന്നും ആരംഭിച്ച് ഡിസംബർ 21-ന് തിരുവനന്തപുരം ഗാന്ധി പാർക്കിൽ സമാപിക്കും.
സെറ്റോ ജില്ലാ ചെയർമാൻ മോബിഷ് പി.തോമസിൻ്റെ അധ്യക്ഷതയിൽ ചേർന്ന സ്വീകരണ സമ്മേളനത്തിന് ജില്ലാ കൺവീനർ പി.എസ് ഗിരീഷ്കുമാർ സ്വാഗതം ആശംസിച്ചു. കാസറഗോഡു നിന്നും ആരംഭിച്ച് രണ്ട് ദിവസം പിന്നിടുമ്പോൾ അധ്യാപകരുടേയും ജീവനക്കാരുടേയും സർവാത്മനായുള്ള പിന്തുണ ജാഥക്ക് ലഭിക്കുന്നത് തന്നെ സിവിൽ സർവീസ് മേഖലയിലെ എതിർപ്പിൻ്റെ ആഴം വ്യക്തമാക്കുന്നതാണെന്ന് മറുപടി പ്രസംഗത്തിൽ ജാഥാ ക്യാപ്റ്റൻ ചവറ ജയകുമാർ, വൈസ് ക്യാപ്റ്റൻ കെ.അബ്ദുൾ മജീദ് എന്നിവർ പറഞ്ഞു.
സിവിൽ സർവീസ് മേഖലയുടെ നിലനിൽപ്പിന് അനിവാര്യമായ പണിമുടക്ക് ജീവനക്കാർ ഏറ്റെടുത്തിരിക്കുകയാണെന്നും അവർ അഭിപ്രായപ്പെട്ടു.
സ്വീകരണ സമ്മേളനത്തിൽ മുൻ ഡി.സി.സി പ്രസിഡണ്ട് കെ.എൽ.പൗലോസ്, ഐ.എൻ.ടി.യു.സി ജില്ലാ പ്രസിഡണ്ട് പി.പി. ആലി, കെ.പി.സി.സി അംഗം കെ.ഇ.വിനയൻ എൻ.ജി.ഒ അസോസിയേഷൻ സംസ്ഥാന ജന സെക്രട്ടറി എ.എം ജാഫർഖാൻ, എ.എച്ച്.എസ്.ടി.എ സംസ്ഥാന പ്രസിഡണ്ട് അരുൺകുമാർ, എം.ജെ.തോമസ് ഹെർബിറ്റ്, ജി.എസ്. ഉമാശങ്കർ, എ.പി.സുനിൽ, വി.പി.ദിനേശ്, കെ.കെ.രാജേഷ്ഖന്ന, എം പി.ഷനിജ്, കെ.ആർ.ബിനീഷ്, ഷാജു ജോൺ, വി.സി.സത്യൻ, കബീർ കുന്നമ്പറ്റ, സിജോ പൗലോസ്, റോണി സെബാസ്റ്റ്യൻ, കെ.ടി.നസീർ, സി.എച്ച്.നാസർ, പി. സഫ്വാൻ തുടങ്ങിയവർ സംസാരിച്ചു. ജാഥാ ക്യാപ്റ്റനെ കെ.ശശികുമാർ, ഗിരീഷ് കൽപ്പറ്റ, ഹർഷൽ കോന്നാടൻ, ഡിൻ്റോ ജോസ്, ഹനീഫ ചിറക്കൽ, കെ.എ.മുജീബ്, ടി.എം.അനൂപ്, പി.ജെ.ഷൈജു, കെ.ടി.ഷാജി, എൻ.ജെ. ഷിബു, ടി.അജിത്ത്കുമാർ, പി.സക്കീർ ഹുസൈൻ തുടങ്ങിയവർ ഹാരമണിയിച്ച് സ്വീകരിച്ചു
