തിരുവനന്തപുരം: അന്താരാഷ്ട്ര ഫാഷന്‍ മാഗസീനായ വോഗിന്റെ ഇന്ത്യ പതിപ്പിന്റെ കവര്‍ പേജില്‍ സംസ്ഥാന ആരോഗ്യമന്ത്രി കെകെ ശൈലജ. വുമണ്‍ ഓഫ് ദ ഇയര്‍ 2020 എന്ന അടിക്കുറിപ്പോടെയാണ് കവര്‍ ഫോട്ടോ നല്‍കിയിരിക്കുന്നത്. സംസ്ഥാനത്ത് കൊവിഡ് മഹാമാരിയെ നേരിടുന്നതിന് ആരോഗ്യമേഖലയുടെ മുന്നില്‍ നിന്ന് അതിജീവിച്ചതുമായി ബന്ധപ്പെട്ട അഭിമുഖവും മാഗസീനില്‍ പ്രസിദ്ധീകരിച്ചിട്ടുണ്ട്. ഇത് ഭയപ്പെടാനുള്ള സമയം ഇല്ലെന്നും ഭയത്തേക്കാളധികം ഈ പ്രതിസന്ധിയില്‍ ഇടപെടുന്നത് ആവേശകരമായിരുന്നു എന്നും കെകെ ശൈലജ വോഗിനോട് പറഞ്ഞു.
സംസ്ഥാനത്ത് നിപ റിപ്പോര്‍ട്ട് ചെയ്ത സമയത്തുള്ള പ്രവര്‍ത്തനങ്ങളും അഭിമുഖത്തില്‍ വിശദീകരിക്കുന്നു. കെകെ ശൈലജയുമായുള്ള വിശദമായ അഭിമുഖമാണ് വോഗ് പ്രസിദ്ധീകരിച്ചിട്ടുള്ളത്. അതേസമയം, ആരോഗ്യമന്ത്രിയുടെ ഈ നേട്ടത്തെ അഭിനന്ദിച്ച്‌ നിരവധി പേരാണ് രംഗത്തെത്തുന്നത്. സിനിമ താരങ്ങളായ ഫഹദ് ഫാസില്‍, നസ്രിയ നസീം, റിമ കല്ലിങ്കല്‍ തുടങ്ങിയവര്‍ കെകെ ശൈലജയുടെ വോഗിന്റെ കവര്‍ പേജ് പങ്കുവച്ചിട്ടുണ്ട്.
നേരത്തെ, വാഷിംഗ്ടണ്‍ പോസ്റ്റും, ബിബിസി അടക്കമുള്ള അന്താരാഷ്ട്ര മാധ്യമങ്ങളും കൊവിഡിനെതിരായ പ്രതിരോധ പ്രവര്‍ത്തനങ്ങളില്‍ മന്ത്രിയെ അഭിനന്ദിച്ച്‌ റിപ്പോര്‍ട്ടുകളും ലേഖനങ്ങളും പ്രസിദ്ധീകരിച്ചിരുന്നു. ഐക്യരാഷ്ട്ര സംഘടനയും കൊവിഡിനെതിരായ പ്രവര്‍ത്തനങ്ങളില്‍ മന്ത്രിയെ അഭിനന്ദിച്ചിരുന്നു. കൂടാതെ യുഎന്‍ പാനല്‍ ചര്‍ച്ചയിലും ആരോഗ്യമന്ത്രി പങ്കെടുക്കുകയും ചെയ്തിരുന്നു. വിവിധ മേഖലകളില്‍ പ്രാഗല്‍ഭ്യം തെളിയിക്കുകയും നിര്‍ണായക സംഭാവനകള്‍ നല്‍കുകയും ചെയ്യുന്ന വനിതകളെയാണ് വോഗ് പുരസ്‌കാരത്തിനായി തിരഞ്ഞെടുക്കുന്നത്. നേരത്തെ വോഗിന്റെ വാരിയേഴ്‌സ് പട്ടികയിലും കെകെ ശൈലജ ഇടം നേടിയിരുന്നു.
