തിരുവനന്തപുരം: സാമൂഹ്യ മാധ്യമങ്ങളില് മില്മയുടെ പേരില് വലിയ രീതിയില് പ്രചരിക്കുന്ന സമ്മാന പദ്ധതി സന്ദേശങ്ങള് വ്യാജമാണെന്ന് അധികൃതർ അറിയിച്ചു.
വാട്സ്ആപ്പില് വന്ന ലിങ്കില് ക്ലിക്ക് ചെയ്യുകയും തുടർന്ന് ചോദിച്ച വ്യക്തിഗത വിവരങ്ങള് കൈമാറുകയും ചെയ്ത ചിലർക്ക് ബാങ്ക് അക്കൗണ്ടുകളില് നിന്ന് പണം നഷ്ടപ്പെട്ടതായാണ് റിപ്പോർട്ട്. പണം നഷ്ടമായെന്ന് കാണിച്ച് ഇരകളായവർ മില്മയ്ക്ക് നേരിട്ട് പരാതി നല്കിയതോടെയാണ് ഔദ്യോഗിക വിശദീകരണവുമായി അധികൃതർ രംഗത്തെത്തിയത്. നിലവില് വിവിധ വാട്സ്ആപ്പ് ഗ്രൂപ്പുകള് വഴിയും വ്യക്തികള് വഴിയും തട്ടിപ്പ് ലിങ്ക് വ്യാപകമായി ഷെയർ ചെയ്യപ്പെടുന്നുണ്ട്.
വ്യാജ സന്ദേശങ്ങളും ലിങ്കുകളും സാമൂഹ്യ മാധ്യമങ്ങളില് നിന്നും അടിയന്തരമായി നീക്കം ചെയ്യാനുള്ള നിയമനടപടികള് ആരംഭിച്ചതായി മില്മ അറിയിച്ചു. സൈബർ തട്ടിപ്പിനെതിരെയും കുറ്റവാളികളെ കണ്ടെത്തണമെന്നും ആവശ്യപ്പെട്ട് മില്മ അധികൃതർ പോലീസിനും സൈബർ സെല്ലിനും ഔദ്യോഗികമായി പരാതി കൈമാറിയിട്ടുണ്ട്.
