കൊച്ചി: ഒരു കിലോ എം ഡി എം എ യുമായി യുവതി പൊലീസ് പിടിയില്. ബംഗലൂരു മുനേശ്വര നഗറില് സർമീൻ അക്തർ (26) നെയാണ് ആലുവ റെയില്വേ സ്റ്റേഷനില് വച്ച് റൂറല് ജില്ലാ ഡാൻസാഫ് ടീമും ആലുവ പൊലീസും ചേർന്ന് പിടികൂടിയത്. ഓപ്പറേഷൻ ക്ലീൻ പദ്ധതിയുടെ ഭാഗമായി ജില്ലാ പൊലീസ് മേധാവി ഡോ. വൈഭവ് സക്സേനയ്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന.
വിപണയില് അമ്ബത് ലക്ഷത്തിലേറെ രൂപ വിലവരും രാസലഹരിക്ക്. വാട്ടർ ഹീറ്ററിനുള്ളില് ഒളിപ്പിച്ച നിലയിലാണ് ഡല്ഹിയില് നിന്നും മയക്കുമരുന്ന് കടത്തിക്കൊണ്ടുവന്നത്. കൊച്ചിയില് യുവാക്കള്ക്കിടയിലാണ് വില്പന. ഡല്ഹിയില് നിന്ന് എം.ഡി.എം.എ കൊണ്ടുവന്ന് ഇവിടെ കൈമാറിയ ശേഷം പിറ്റേന്ന് തീവണ്ടിയില്ത്തന്നെ തിരിച്ചു പോവുകയാണ് പതിവ്. യുവതി സ്ഥിരം മയക്കുമരുന്ന് കടത്തുകാരിയാണെന്നാണ് ലഭിക്കുന്ന വിവരം.
കഴിഞ്ഞ വർഷം അവസാനം പറവൂരില് നിന്ന് ഒരു കിലോ എണ്ണൂറ്റിയമ്ബത് ഗ്രാം എം.ഡി.എം.എ വൈഭവ് സക്സേനയുടെ നേതൃത്വത്തില് പിടികൂടിയിരുന്നു. റേഞ്ച് ഡി.ഐ ജി പുട്ട വിമലാദിത്യയുടെ മേല്നോട്ടത്തില് പ്രത്യേക ടീം രൂപീകരിച്ച് അന്വേഷണം നടക്കുകയാണ്.നർക്കോട്ടിക്ക് സെല് ഡി വൈ എസ് പി വി. അനില്, ആലുവ ഡിവൈഎസ്പി എ.പ്രസാദ്, ഇൻസ്പെക്ടർ എം.എം മഞ്ജുദാസ് എസ് ഐ മാമായ എസ്.എസ് ശ്രീലാല്, കെ.നന്ദകുമാർ , എഎസ്ഐ വിനില്കുമാർ , സീനിയർ സി പി ഒ മാരായ അജിത തിലകൻ, പി.എൻ നൈജു ., ദീപ്തി ചന്ദ്രൻ , മാഹിൻഷാ അബൂബക്കർ, കെ.എം മനോജ് തുടങ്ങിയവരും അന്വേഷണ സംഘത്തിലുണ്ടായിരുന്നു.
