ഡ്രൈവിംഗ് ലൈസന്‍സ് ഇനി സ്മാര്‍ട്ടല്ല എക്‌സ്ട്രാ സ്മാര്‍ട്ടാകും. സംസ്ഥാനത്ത് കാര്‍ഡ് രൂപത്തില്‍ നല്‍കിവരുന്ന ഡ്രൈവിംഗ് ലൈസന്‍സുകള്‍ ഇനി മുതല്‍ ഡിജിറ്റല്‍ ആയി നല്‍കുമെന്ന് ഗതാഗത വകുപ്പ് മന്ത്രി കെ ബി ഗണേഷ്‌കുമാര്‍. നിലവിലെ കാര്‍ഡ് ലൈസന്‍സിനു പകരം ഓണ്‍ലൈനായി ഡൗണ്‍ലോഡ് ചെയ്യാന്‍ സാധിക്കുന്ന തരത്തില്‍ ഡിജിറ്റല്‍ ലൈസന്‍സിനെ ക്രമീകരിക്കുമെന്നും മന്ത്രി അറിയിച്ചു.
ഡ്രൈവിംഗ് ലൈസന്‍സില്‍ ക്യൂആര്‍ കോഡ് സൗകര്യം ഏര്‍പ്പെടുത്തുമെന്നും ലൈസന്‍സ് പാസാകുന്ന വ്യക്തിയ്ക്ക് ക്യൂ ആര്‍ കോഡും ഫോട്ടോയും അടക്കം വെച്ച് ഡിജിറ്റലാക്കി ഫോണില്‍ സൂക്ഷിക്കാവുന്ന രീതിയിലായിരിക്കും ലൈസന്‍സിന്റെ ഡിജിറ്റലൈസേഷനെന്നും ഗണേഷ്‌കുമാര്‍ വ്യക്തമാക്കി.
കെഎസ്ആര്‍ടിസി ഡ്രൈവിംഗ് സ്‌കൂളുകള്‍ സംസ്ഥാനത്ത് എല്ലാ ജില്ലകളിലും നടപ്പിലാക്കുമെന്നും മന്ത്രി പറഞ്ഞു. സംസ്ഥാനത്ത് 13 സ്ഥലങ്ങളില്‍ കൂടി കെഎസ്ആര്‍ടിസി ഡ്രൈവിംഗ് സ്‌കൂളുകള്‍ ആരംഭിക്കും. എല്ലാ ജില്ലയിലും ഡ്രൈവിംഗ് ട്രെയിനിങ് സെന്ററുകള്‍ സ്ഥാപിക്കുമെന്നും മന്ത്രി അറിയിച്ചു.
ഒരു കോടി രൂപ ചെലവഴിച്ചായിരിക്കും ഡ്രൈവിംഗ് ട്രെയിനിങ് സെന്ററുകള്‍ ആരംഭിക്കുക. കേന്ദ്ര സഹായത്തോടെയാണ് പദ്ധതി തുടങ്ങുന്നതെന്നും ഇതിനായി കേന്ദ്ര സര്‍ക്കാരിനെ സമീപിച്ചിട്ടുണ്ടെന്നും കെബി ഗണേഷ്‌കുമാര്‍ വ്യക്തമാക്കി. അതേസമയം കെഎസ്ആര്‍ടിസിയില്‍ ബ്രെത്ത് അനലൈസര്‍ പരിശോധന ആരംഭിച്ചതോടെ അപകടങ്ങള്‍ കുറഞ്ഞെന്നും മന്ത്രി അറിയിച്ചു.
