തന്റെ സൂപ്പർകാർ ശേഖരത്തിലേക്ക് പുതിയ മോഡല് ചേർത്ത് തമിഴ് സൂപ്പർസ്റ്റാർ അജിത്ത് കുമാർ. മക്ലാരൻ സെന്ന എന്ന ഹൈപ്പർ കാറാണ് പ്രൊഫഷണല് റേസർ കൂടിയായ അജിത്ത് സ്വന്തമാക്കിയത്.വാഹനത്തിന്റെ ഡെലിവറി വീഡിയോ ‘അജിത്ത് കുമാർ റേസിങ്ങ്’ എന്ന ഇൻസ്റ്റാഗ്രാം പേജില് അദ്ദേഹം പോസ്റ്റ് ചെയ്തിട്ടുണ്ട്.
റേസിനിടെയുണ്ടായ അപകടത്തില് മരിച്ച ഇതിഹാസ ഫോർമുല വണ് (എഫ്1) ഡ്രൈവർ അയർട്ടണ് സെന്നയോടുള്ള ആദരസൂചകമായാണ് മക്ലാരൻ ഈ മോഡല് പുറത്തിറക്കിയത്. ഈ ഹൈപ്പർകാറില് അയർട്ടണ് സെന്നയുടെ കൈയ്യൊപ്പോടുകൂടിയ ഐക്കോണിക് മാള്ബോറോ ലിവറിയുണ്ട്.
മക്ലാരൻ സെന്നയുടെ 500 യൂണിറ്റുകള് മാത്രമാണ് മക്ലാരൻ നിർമിച്ചത്. 789 എച്ച്പി പവറും 800 എൻഎം ടോർക്കും ഉത്പാദിപ്പിക്കുന്ന 4.0-ലിറ്റർ ട്വിൻ-ടർബോചാർജ്ഡ് വി8 എൻജിനാണ് വാഹനത്തെ കുതിപ്പിക്കുന്നത്. 7-സ്പീഡ് ഡ്യുവല്-ക്ലച്ച് ഓട്ടോമാറ്റിക് ട്രാൻസ്മിഷൻ ആണ് ട്രാൻസ്മിഷൻ കൈകാര്യം ചെയ്യുന്നത്. ഏകദേശം 12 കോടി രൂപയാണ് ഈ വാഹനത്തിന്റെ വില. ഫെരാരി എസ്എഫ്90, പോർഷെ 911 ജിടി3 ആർഎസ്, മക്ലാരൻ 750എസ് തുടങ്ങിയ മോഡലുകളും അജിത് കുമാറിനുണ്ട്.
