അന്താരാഷ്ട്ര യോഗ ദിനത്തിൽ കുടുംബശ്രീ മിഷൻ, ആരോഗ്യ വകുപ്പ്, ആരോഗ്യ കേരളം, ആയുഷ് മിഷൻ എന്നിവയുടെ സംയുക്ത ആഭിമുഖ്യത്തിൽ കളക്ട്രേറ്റ് ഉദ്യോഗസ്ഥർക്കായി യോഗ ക്ലാസ്സ് സംഘടിപ്പിച്ചു. ജില്ലാ സ്പോർട്സ് കൗൺസിൽ ഹാളിൽ ജില്ലാ കളക്ടർ ഡി ആർ മേഘശ്രീ ഉദ്ഘാടനം ചെയ്തു.
കൂടുതൽ സമയവും ഇരുന്ന് ജോലി ചെയ്യുന്നവരാകയാൽ സർക്കാർ ഉദ്യോഗസ്ഥർ ഭൂരിഭാഗവും ജീവിതശൈലി രോഗങ്ങളുടെ പിടിയിലാണെന്ന് കളക്ടർ പറഞ്ഞു. യോഗ ഒരു ജീവിതചര്യയായി മാറ്റുന്നതിലൂടെ ഇത്തരം പ്രശ്നങ്ങൾക്ക് പരിഹാരമാവുമെന്നും മാനസിക ആരോഗ്യം വീണ്ടെടുക്കാമെന്നും അവർ അഭിപ്രായപ്പെട്ടു.
ദേശീയ ആരോഗ്യ ദൗത്യം ജില്ലാ പ്രൊജക്റ്റ് മാനേജർ ഡോ. സമീഹ സൈതലവി യോഗ ദിന സന്ദേശം നൽകി. യോഗ ഇൻസ്ട്രക്ടർ പ്രീത പി പി യുടെ നേതൃത്വത്തിൽ ഉദ്യോഗസ്ഥർക്കായി യോഗ പരിശീലനം നൽകി. വയനാട് ജില്ലയിൽ ഭൂരിഭാഗം ആളുകൾക്കും രക്താതിമർദ്ദം ഉണ്ടെന്നും യോഗ ശീലമാക്കുന്നതിലൂടെ ഇത് കുറയ്ക്കാമെന്നും ജില്ലാ മെഡിക്കൽ ഓഫീസർ ടി മോഹൻദാസ് ചൂണ്ടിക്കാട്ടി.
അസിസ്റ്റന്റ് കളക്ടർ അർച്ചന പി പി, കുടുംബശ്രീ ജില്ലാ മിഷൻ കോർഡിനേറ്റർ വി കെ റെജീന എന്നിവരും പങ്കെടുത്തു.
