ആധാർ, പാൻ, വോട്ടർ ഐഡി കാർഡുകൾ തുടങ്ങിയ രേഖകൾ കൈവശം വച്ചാൽ മാത്രം ഇന്ത്യൻ പൗരനാകില്ല: ബോംബെ ഹൈക്കോടതി

മുംബൈ: ആധാർ കാർഡ്, പാൻ കാർഡ്, വോട്ടർ ഐഡി കാർഡ് തുടങ്ങിയ രേഖകൾ കൈവശം വച്ചതുകൊണ്ട് മാത്രം ഒരാൾ ഇന്ത്യൻ പൗരനാകില്ലെന്ന് ബോംബെ ഹൈക്കോടതി. ആരോപണ വിധേയനായ ബംഗ്ലാദേശി പൗരന് ജാമ്യം നിഷേധിച്ചു കൊണ്ടായിരുന്നു ബോംബെ ഹൈക്കോടതിയുടെ ഈ സുപ്രധാന ഉത്തരവ്. ഇന്ത്യൻ അധികാരികളെ തെറ്റിദ്ധരിപ്പിച്ചുകൊണ്ട് ആധാർ കാർഡ്, പാൻ കാർഡ്, വോട്ടർ ഐഡി കാർഡ്, ആദായനികുതി രേഖകൾ, ഗ്യാസ്, വൈദ്യുതി കണക്ഷനുകൾ എന്നിവ വ്യാജമായി നേടിയ ബം​ഗ്ലാദേശി പൗരൻ്റെ ജാമ്യമാണ് കോടതി നിഷേധിച്ചത്. കഴിഞ്ഞ വർഷമാണ് ഇയാൾക്കെതിരെ താനെ പോലീസ് കേസെടുത്തത്.
അയൽരാജ്യമായ പാകിസ്താനിൽ നിന്ന് കുടിയേറിയവരിൽ നിന്ന് ഇന്ത്യൻ പൗരന്മാരെ തിരിച്ചറിയുന്നതിന് തുടക്കത്തിൽ ഒരു ‘താൽക്കാലിക’ ക്രമീകരണം ഏർപ്പെടുത്തിയിരുന്നത് വിശദീകരിച്ചു കൊണ്ടായിരുന്നു ജഡ്ജിയുടെ വിധിന്യായം. 1955-ൽ പാർലമെന്റ് പ്രാബല്യത്തിൽ കൊണ്ടുവന്ന പൗരത്വ നിയമം ഇന്നും ഇന്ത്യക്കാരുടെ ദേശീയത തീരുമാനിക്കുന്നതിനുള്ള പ്രധാനവും നിയന്ത്രിക്കുന്നതുമായ നിയമമാണെന്നും ജഡ്ജി അഭിപ്രായപ്പെട്ടു. നിയമാനുസൃത പൗരന്മാർക്കും നിയമവിരുദ്ധ കുടിയേറ്റക്കാർക്കും ഇടയിൽ ഈ നിയമം വ്യക്തമായ ഒരു അതിർവരമ്പ് സൃഷ്ടിക്കുന്നുണ്ടെന്നും ജഡ്ജി ചൂണ്ടിക്കാണിച്ചു