ബിയർ ഇഷ്ടപ്പെടുന്ന നിരവധി ആളുകൾ നമുക്ക് ചുറ്റുമുണ്ട്. എന്നാൽ അത്തരക്കാർക്ക് ആഗ്രഹിക്കുമ്പോൾ തന്നെ ഞൊടിയിടയിൽ ബിയർ കുടിക്കാനൊരു മാർഗമാണ് ഇപ്പോൾ തെളിഞ്ഞിരിക്കുന്നത്. ഇനി എല്ലാവർക്കും ഹോം ബ്രൂവറി ഉണ്ടാക്കാൻ സാധിക്കും. ബിയറിനെ പൊടി രൂപത്തിൽ വികസിപ്പിച്ചെടുത്തിരിക്കുകയാണ് ജർമൻ കമ്പനിയായ ന്യൂസെല്ലെ ക്ളോസ്ററർ ബ്രൂവറി.
കേൾക്കുമ്പോൾ ആശ്ചര്യം തോന്നുമെങ്കിലും സംഗതി സത്യമാണ്. ഈ പൊടിയുണ്ടെങ്കിൽ വളരെ വേഗത്തിൽ ഇൻസ്റ്റന്റായി ബിയർ ഉണ്ടാക്കാൻ സാധിക്കും. ഇത്തരത്തിലുള്ള ഒരു ബിയർ ലോകത്താദ്യമായിട്ടാണ് ഇറക്കുമതി ചെയ്യുന്നതെന്നും കമ്പനി അവകാശമുന്നയിക്കുന്നുണ്ട്. ഇൻസ്റ്റന്റ് കോഫി ഉണ്ടാക്കുന്നതുപോലെ തന്നെ ലളിതമായി ബിയറും ഉണ്ടാക്കാൻ സാധിക്കുമെന്നാണ് ഇവരുടെ വാദം.
നിലവിൽ ജർമനിയിലാണ് ഈ ബിയർ പൊടി ലഭിക്കുക. വരും വർഷങ്ങളിൽ ആഗോളതലത്തേയ്ക്ക് വികസിപ്പിക്കാനാണ് കമ്പനിയുടെ തീരുമാനം. ബിയർ പ്രേമികൾക്ക് ഒരു കോഫിയോ പ്രോട്ടീൻ ഷെയ്ക്കോ ഉണ്ടാക്കുന്ന എളുപ്പത്തിൽ ബിയറും ഉണ്ടാക്കാൻ കഴിയുമെന്നത് ചെറിയ കാര്യമല്ല. ഒരു ഗ്ലാസിലേയ്ക്ക് രണ്ട് സ്പൂൺ ബിയർ പൊടി ചേർക്കുക. വെള്ളം ചേർത്ത് നന്നായി കുലുക്കിയെടുത്താൻ ബിയർ തയ്യാർ.
നോൺ ആൽക്കഹോളിക് ബിയറാണ് നിലവിൽ ഇത്തരത്തിൽ പൊടി രൂപത്തിൽ ലഭ്യമായിരിക്കുന്നത്. ആഗോളാടിസ്ഥാനത്തിൽ വാണിജ്യം ചെയ്യാനുള്ള ആൽക്കഹോളിക് പതിപ്പ് ബിയർ പൊടി ഉടൻ പുറത്തിറക്കാനാണ് കമ്പനിയുടെ തീരുമാനം.
ബിയർ പൊടി വിപണിയിൽ സജീവമാകുന്നതോടെ ബിയറിന്റെ ഭാരം ഗണ്യമായി കുറച്ച് ചരക്ക് നീക്കം കൂടുതൽ എളുപ്പത്തിലാകുമെന്നും ബ്രൂവറി ജനറൽ മാനേജർ സ്റ്റെഫാൻ ഫ്രിറ്റ്ഷെ മാധ്യമങ്ങളോട് പ്രതികരിച്ചു. ഒരു കിലോ ഭാരമുള്ള ബിയർ 45 ഗ്രാമായി കുറച്ചുകൊണ്ടുവരാൻ സാധിക്കും. 42 തരം ബിയറുകളാണ് കമ്പനി നിലവിൽ നിർമ്മിക്കുന്നത്. അതിൽ ഗ്ലൂട്ടൺ ഫ്രീ ബിയറും നോൺ ആൽക്കഹോളിക് ബിയറും ഉൾപ്പെടുന്നുണ്ട്.
