ബത്തേരി നിയോജക മണ്ഡലത്തിന്റെ സമഗ്ര വിദ്യാഭ്യാസ പുരോഗതി ലക്ഷ്യമാക്കി ഐ.സി.ബാലകൃഷ്ണൻ എം.എൽ.എയുടെ നേതൃത്വത്തിൽ ആരംഭിച്ച ഫ്ലയർ ( ഫ്യൂച്ചർ ലേണിംഗ് അഡ്വാൻസ്മെന്റ് ആന്റ് റിജുവനേഷൻ ഇൻ എജ്യൂക്കേഷൻ ) പദ്ധതി ഉദ്ഘാടനം ചെയ്തു. അക്കാദമിക കലാ, കായിക, അടിസ്ഥാന സൗകര്യ മേഖലകളിൽ മികവുറ്റ പ്രകടനം നടത്താൻ ബത്തേരി നിയോജകമണ്ഡലത്തിലെ സ്കൂളുകളേയും വിദ്യാർഥികളേയും പ്രാപ്തരാക്കുകയാണ് പദ്ധതിയുടെ ലക്ഷ്യം.
ഫ്ലയർ പദ്ധതിയുടെ പ്രവർത്തനോദ്ഘാടനവും പ്രദേശിക വികസനഫണ്ടുപയോഗിച്ച് സ്കൂളുകൾക്കും ലൈബ്രറികൾക്കുമായി വാങ്ങിയ പുസ്തകങ്ങളുടെ വിതരണോദ്ഘാടനവും ഐ.സി. ബാലകൃഷ്ണൻ എം.എൽ.എ നിർവഹിച്ചു. ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ അധ്യക്ഷനായി.ഫ്ലയറിന്റെ നേതൃത്വത്തിലാരംഭിക്കുന്ന സിവിൽ സർവീസ് ഫൗണ്ടേഷൻ കോഴ്സിന്റെ ഉദ്ഘാടനം സബ് കളക്ടർ ശ്രീലക്ഷ്മി .ആർ . ഐ .എ .എസ് നിർവഹിച്ചു. എസ്.എസ്.എൽ.സി പരീക്ഷയിൽ നൂറു ശതമാനം നേടിയ സ്കൂളുകളെ നഗരസഭാ ചെയർമാൻ ടി.കെ രമേശ് ആദരിച്ചു. എം.എൽ.എ പദ്ധതിയുടെ ഭാഗമായ പരിശീലനത്തിലൂടെ നാഷണൽ മെരിറ്റ് കം മീൻസ് സ്കോളർഷിപ്പ് കരസ്ഥമാക്കിയ കുട്ടികളെ പനമരം ബ്ലോക്ക് പഞ്ചായത്ത് പ്രസിഡന്റ് ഗിരിജ കൃഷ്ണൻ അനുമോദിച്ചു. ഇരുപത്തൊന്ന് വിദ്യാലയങ്ങളിൽ നിന്നുള്ള പരീക്ഷയെഴുതിയ അറുപത് വിദ്യാർഥികളെയും എൻ.എം.എം.എസിൽ വിജയിപ്പിക്കാൻ കഴിഞ്ഞു. അതിൽ പതിനാറ് പേരാണ് സ്കോളർഷിപ്പിന് അർഹരായത്.
മീനങ്ങാടി ഗ്രാമപഞ്ചായത്ത് പ്രസിഡന്റ് കെ.ഇ. വിനയൻ , നൂൽപ്പുഴ ഗ്രാമപഞ്ചായത്ത് പ്രസിഡന്റ് ഷീജ സതീഷ് , പൂതാടി ഗ്രാമ പഞ്ചായത്ത് പ്രസിഡന്റ് മിനി പ്രകാശ് , എൻ.എ അസൈനാർ , ഹയർ സെക്കന്ററി ജില്ലാ കോർഡിനേറ്റർ ഷിവി കൃഷ്ണൻ , ഡയറ്റ് സീനിയർ ലക്ചറർ സജി, ബത്തേരി എ.ഇ. ഒ ജോളിയാമ്മ മാത്യു എന്നിവർ പ്രസംഗിച്ചു. വ്യത്യസ്ത മേഖലകളിൽ മികവു പുലർത്തിയ ഡോ: സുകന്യ. കെ .എസ് , ഒളിമ്പ്യൻ ജിജോ ജോർജ് ,ആര്യമോൾ സന്തോഷ് എന്നിവരെ ആദരിച്ചു. രഞ്ജിത് വി.ടി പദ്ധതി വിശദീകരണം നടത്തി. ജി.എച്ച്.എസ് . എസ് വടുവൻചാൽ പ്രിൻസിപ്പാൾ മനോജ് കെ.വി സ്വാഗതവും ബീനാച്ചി എച്ച് എം സജി ടി.ജി. നന്ദിയും പറഞ്ഞു.
