തരിയോട്: സാമൂഹിക പ്രതിബദ്ധതയോടെ പരിസ്ഥിതി വികസന പരിപാടിയുടെ ഭാഗമായി ചെന്നലോട് വാർഡിലെ ഗോത്ര വിഭാഗം ഉൾക്കൊള്ളുന്ന ശാന്തിനഗർ ക്ലബ്ബിന് വനം വകുപ്പ് ഓണസമ്മാനമായി ഫുട്ബോൾ കിറ്റ് വിതരണം ചെയ്തു. തരിയോട് എട്ടാം മൈൽ വനസംരക്ഷണ സമിതി ഒരുക്കിയ പരിപാടിയിൽ വച്ച് കൽപ്പറ്റ റെയിഞ്ച് ഫോറസ്റ്റ് ഓഫീസർ കെ നീതു വിതരണ ഉദ്ഘാടനം നിർവഹിച്ചു. തരിയോട് ഗ്രാമപഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷൻ ഷമീം പാറക്കണ്ടി അധ്യക്ഷത വഹിച്ചു. ചടങ്ങിൽ വെച്ച് മറ്റ് ആനുകൂല്യങ്ങളും വിതരണം ചെയ്തു. ഗ്രാമപഞ്ചായത്ത് അംഗം സിബിൽ എഡ്വേർഡ്, വനം വകുപ്പ് ഉദ്യോഗസ്ഥരായ എം പി സജീവ്, ടി എൻ രാജേഷ്, റോസ് മേരി ജോസ്, കെ ബീരാൻകുട്ടി, പി കെ ഷിബു, ഡൊമിനിക് ഡിസിൽവ തുടങ്ങിയവർ സംസാരിച്ചു. വന സംരക്ഷണ സമിതി പ്രസിഡൻറ് റോബി നെല്ലിക്കാട്ടിൽ സ്വാഗതവും ഓഫീസർ എം രവിശങ്കർ നന്ദിയും പറഞ്ഞു.
സൗജന്യ വയറിങ് പരിശീലനം
മീനങ്ങാടി ഗവ. പോളിടെക്നിക് കോളേജിലെ തുടർ വിദ്യാഭ്യാസ കേന്ദ്രത്തിൽ പട്ടികവർഗ വിഭാഗത്തിൽപ്പെടുന്നവർക്ക് സൗജന്യ ഇലക്ട്രിക്കൽ വയറിങ് ആന്റ് ഹോം അപ്ലയൻസസ് സർവ്വീസിങ്ങ് കോഴ്സിലേക്ക് അപേക്ഷ ക്ഷണിച്ചു. 10 മാസമാണ് വയർമാൻ ലൈസൻസിങ് കോഴ്സിന്റെ കാലാവധി.
