എൻഎസ്എസ് “സമർപ്പൺ ” പദ്ധതിയുടെ ജില്ലാതല ഉദ്ഘാടനം നടന്നു

നടവയൽ:ഹയർസെക്കൻഡറി നാഷണൽ സർവീസ് സ്കീം സമർപ്പൺ പദ്ധതിയുടെ ജില്ലാതല ഉദ്ഘാടനം കൽപ്പറ്റ നിയോജകമണ്ഡലം എംഎൽഎ അഡ്വക്കറ്റ് ടി സിദ്ദിഖ് നിർവഹിച്ചു.
കേരളത്തിന്റെ ആരോഗ്യമേഖലയുടെ അടിസ്ഥാന വിഭാഗമായ മാതൃശിശു സംരക്ഷണം, പാലിയേറ്റീവ് കെയർ, പകർച്ചവ്യാധി നിയന്ത്രണം, പ്രതിരോധ വാക്സിനേഷൻ തുടങ്ങിയ മേഖലകളിൽ പ്രവർത്തിക്കാനുള്ള ശേഷി എൻഎസ്എസ് വോളണ്ടിയർമാരിൽ വളർത്താൻ ഉതകുന്ന എൻഎസ്എസ് പദ്ധതിയാണ് സമർപ്പൺ.
നടവയൽ സെന്റ് തോമസ് ഹയർ സെക്കൻഡറി സ്കൂളിൽ വച്ച് നടന്ന ചടങ്ങിൽ ആർച്ച് പ്രീസ്റ്റ് ഗർവാ സിസ് മറ്റം അധ്യക്ഷത വഹിച്ചു. വരദൂർ പി എച്ച് സി ഹെൽത്ത് ഇൻസ്പെക്ടർ മനോജ് എകെക്ക് എൻഎസ്എസ് വൊളണ്ടിയർമാർ വീൽ ചെയറുകൾ കൈമാറി. അതോടൊപ്പം പെയിൻ ആൻഡ് പാലിയേറ്റീവ് പ്രവർത്തകർക്ക് ഉപകരണങ്ങൾ നൽകി. ലഹരി വിരുദ്ധ ക്യാമ്പയിൻ അസിസ്റ്റന്റ് എക്സൈസ് കമ്മീഷണർ ജിമ്മി ജോസഫ് ഉദ്ഘാടനം ചെയ്തു. ഹൈഡ്രജൻ ബലൂണുകൾ പറത്തിക്കൊണ്ട് ലഹരി വിരുദ്ധ സന്ദേശം നൽകി.കണിയാമ്പറ്റ ബ്ലോക്ക് പഞ്ചായത്ത് മെമ്പർ അന്നക്കുട്ടി ജോസ്, വാർഡ് മെമ്പർ സന്ധ്യ ലിഷു, സ്കൂൾ പ്രിൻസിപ്പൽ തോമസ് മാത്യു, പിഎസ്‌സി അംഗം സുദർശൻ കെ ഡി, എൻഎസ്എസ് പ്രോഗ്രാം ഓഫീസർ രജനി റോസ് എന്നിവർ സംസാരിച്ചു.