അച്ഛനായി തുടങ്ങിവെച്ച സംരംഭം, അതായിരുന്നു വർഷങ്ങളായി ഞങ്ങളുടെ ഏക ജീവിത മാർഗ്ഗം. കുട്ടികളില്ലാത്തതിൻ്റെ വിഷമം ഞാനും സിനിയും മറന്നിരുന്നത് ജോലി തിരക്കുകൾക്കിടയിലാണ്. വീടിനോടു ചേർന്ന സംരംഭത്തിന് ലൈസൻസ് ലഭിക്കുന്നതിലെ സാങ്കേതിക തടസ്സം കാരണം പൂട്ടേണ്ടി വരുമോയെന്ന ആശങ്കയിലായിരുന്നു സുരേഷ്. ആറു മാസത്തോളമായി പരിഹരിക്കാത്ത ജീവിത പ്രശ്നം മന്ത്രി എം.ബി രാജേഷ് പരിഹരിച്ചത് 10 മിനുട്ടിനകം. സുൽത്താൻ ബത്തേരിയിലെ ജില്ലാതല തദ്ദേശ അദാലത്ത് വേദിയിൽ പൂമല കൃഷ്ണ പൊയിൽ വീട്ടിൽ സുരേഷിന് നഗരസഭാ അനുവദിച്ച ലൈസൻസ് മന്ത്രി എം. ബി രാജേഷ് അദാലത്തിൻ്റെ തുടക്കത്തിൽ തന്നെ നേരിട്ട് കൈമാറിയപ്പോൾ സുരേഷിൻ്റെ മുഖത്ത് നിറചിരി. ഏറെ ആശ്വാസവും സന്തോഷവുമുണ്ടായ നിമിഷം. മന്ത്രിയിൽ നിന്ന് ലൈസൻസ് ഏറ്റുവാങ്ങി സുരേഷ് പറഞ്ഞു.
പൂമലയിലെ മൂന്നര സെൻ്റിലെ വീടിനോട് ചേർന്ന് കഴിഞ്ഞ 16 വർഷമായി കെ. എസ് ടീ സ്റ്റാൾ നടത്തുകയാണ് സുരേഷും ഭാര്യ സിനിയും. ഇത്തവണ നഗരസഭാ ലൈസൻസ് പുതുക്കി നൽകാൻ അപേക്ഷിച്ചപ്പോൾ ഒക്യുപെൻസി മാറ്റണമെന്നത് സംബന്ധിച്ച സാങ്കേതികത്വം തടസമായി. ഇതോടെ ഇനിയെന്തന്നറിയാതെ വിഷമത്തിലായ സുരേഷ് ഡിവിഷൻ അംഗം സലീം മടത്തിലിനോട് കാര്യം പറഞ്ഞു. ഒടുവിൽ അദ്ദേഹത്തിൻ്റെ കൂടി സഹായത്തോടെയാണ് ജില്ലാതല തദ്ദേശ അദാലത്തിൽ അപേക്ഷ നൽകിയത്. സംരംഭം നിലനിർത്താനുള്ള ജീവിത മാർഗ്ഗം മുടങ്ങാതിരിക്കാൻ മന്ത്രി കൈക്കൊണ്ട അനുഭാവ പൂർവ്വമായ തീരുമാനത്തിൽ നന്ദിയും സന്തോഷവുമുണ്ടെന്ന് സുരേഷ് പറഞ്ഞു. തന്നെ പോലെ സംരംഭം നടത്തുന്നവർക്ക് ഇത്തരം നടപടികൾ ഏറെ ആശ്വാസകരമാണെന്നും ഇതിന് മുൻ കൈയ്യെടുക്കുന്ന മന്ത്രിയെയും സർക്കാറിനെയും അഭിനന്ദിക്കുന്നതായും സുരേഷ് കൂട്ടിച്ചേർത്തു. പൂമലയിലെ കുമാരൻ്റെയും പരേതയായ ജാനകിയുടെയും മകനായ സുരേഷ് ഭക്ഷ്യ സുരക്ഷാ വകുപ്പിൻ്റെ ലൈസൻസ്, ഹെൽത്ത് കാർഡ് തുടങ്ങി എല്ലാ രേഖകളുമായാണ് ടീ സ്റ്റാൾ നടത്തുന്നത്.
