ജീവിതചര്യ മാറുന്നതോടെ പല അസുഖങ്ങളും കടന്നു വരാൻ കാരണമാകുന്നു. അതില് പ്രധാനമാണ് വയറിന് ഉണ്ടാകുന്ന പ്രശ്നങ്ങള്. അങ്ങനെ ദൈനംദിന ജീവിതത്തില് ഏറെ അസ്വസ്ഥതകള്ക്ക് കാരണമാകുന്ന ഒരു രോഗാവസ്ഥയാണ് അള്സർ. ഏതൊരു രോഗത്തെ പോലെയും തക്ക സമയത്ത് മതിയായ ചികിത്സ ലഭിച്ചില്ലെങ്കില് ഈ രോഗം കൂടുതല് സങ്കീർണതകള് സൃഷ്ടിക്കുന്നു. ജീവിതചര്യ തന്നെയാണ് അള്സര് പിടിപെടുന്നതിനുള്ള പ്രധാന കാരണം.
എന്താണ് അള്സർ
അന്നനാളത്തേയും ആമാശയത്തേയും ചെറുകുടലിനെയും സംരക്ഷിച്ചുകൊണ്ടു നേരിയ ഒരു ആവരണമുണ്ട്. ഈ ആവരണത്തിലൂടെയാണ് നാം കഴിക്കുന്ന വസ്തുക്കള് സഞ്ചരിക്കുന്നത്. ദഹനപ്രക്രിയയെ സഹായിക്കുന്ന വീര്യമേറിയ ദഹനരസങ്ങളില്നിന്നും ദഹന വ്യവസ്ഥയുടെ ഭാഗങ്ങളെ സംരക്ഷിച്ചു നിര്ത്തുന്നത് ഈ ആവരണമാണ്. ഇതിലുണ്ടാകുന്ന വ്രണമാണ് അള്സര്. വായ്പുണ്ണ് പോലെതന്നെ ഇത് ആമാശയത്തിന്റെയും അന്നനാളത്തിന്റെയും ആവരണത്തില് ചെറിയ പുണ്ണായി രൂപപ്പെട്ട് താഴേക്ക് അരിച്ചിറങ്ങുന്നു. പ്രധാനമായും അള്സര് ഉണ്ടാക്കുന്നത് ഹെലിക്കോ ബാക്ടര് പൈലോറി എന്ന ബാക്ടീരിയയുടെ അണുബാധ കാരണമാണ്. തുടര്ച്ചയായ വേദന സംഹാരിയുടെ ഉപയോഗം, സ്റ്റിറോയ്ഡ്, ആസിഡ് കൂടുതല് ഉല്പാദിപ്പിക്കുന്ന ഭക്ഷണങ്ങള്, മദ്യം, കടുപ്പമുള്ള ചായ, കാപ്പി, കൂടുതല് എരിവുള്ള ഭക്ഷണങ്ങള്, മാനസിക പിരിമുറുക്കം, അസമയത്തുള്ള ഭക്ഷണരീതി എന്നിവയാണ് പൊതുവെ അള്സറിന് കാരണമായി കണ്ടു വരാറുള്ളത്.
ലക്ഷണങ്ങള്
വയറിലെ അള്സറിന് നിരവധി ലക്ഷണങ്ങള് കാണാറുണ്ട്. വയർ എരിച്ചില്, ഛർദ്ദി, വയർ വീർക്കല്, ദഹനക്കുറവ്, അപൂർവമായി രക്തം ഛർദ്ദിക്കല്, വയറിളക്കം എന്നിവയാണ് സാധാരണ കണ്ടുവരാനുള്ള ലക്ഷണങ്ങള്. ഇതില് ബ്ലീഡിങ്, രക്തക്കുറവ്, തൂക്കം കുറയല്, ഭക്ഷണം വിഴുങ്ങാനുള്ള ബുദ്ധിമുട്ട്, ഛർദ്ദി എന്നിവ അപകടകരമായ ലക്ഷണങ്ങളാണ്. കൃത്യസമയത്ത് അള്സർ കണ്ടുപിടിച്ച് ചികിത്സിച്ചാല് രോഗം ഭേദമാക്കാൻ സാധിക്കും.
വയറ്റിലെ അള്സർ
എങ്ങനെ കണ്ടെത്താം
അള്സറിനെ എൻഡോസ്കോപ്പി പരിശോധനയിലൂടെ കണ്ടുപിടിക്കാവുന്നതാണ്. എവിടെയാണ് വ്രണമെന്ന് കൃത്യമായി മനസിലാക്കാനും വ്രണത്തിന്റെ വലിപ്പവും ആഴവും അറിഞ്ഞ് ചികിത്സിക്കാനും ഇതിലൂടെ സാധിക്കുന്നു. ക്യാന്സര് മൂലവും അള്സര് ഉണ്ടാകാം. ഗുരുതരമായ പ്രശ്നങ്ങളാണോയെന്ന് സംശയം തോന്നിയാല് ബയോപ്സി എടുത്ത് പരിശോധിക്കാനും എന്ഡോസ്കോപ്പി സഹായകരമാണ്. ചിട്ടയായ ആഹാരരീതിയിലൂടെ അള്സറിനെ അകറ്റി നിര്ത്താവുന്നതാണ്. പുകവലി, മദ്യം എന്നിവ പരിപൂര്ണമായും ഒഴിവാക്കുകയും വേദനസംഹാരികള് കഴിയുന്നതും വര്ജിക്കുകയും ചെയ്യേണ്ടതാണ്.
