കേരളത്തില് ഇന്ന് അർധരാത്രി മുതല് ട്രോളിങ് നിരോധനം. ഉപരിതല മത്സ്യങ്ങളുടെ പ്രജനനകാലം കണക്കിലെടുത്താണ് ഇനിയുള്ള 52 ദിവസത്തേക്ക് ട്രോളിങ് എന്ന മത്സ്യബന്ധനരീതി (കുത്തിക്കോരി മീൻപിടിത്തം)ക്ക് നിരോധനം ഏർപ്പെടുത്തുന്നത്.ഇന്ന് രാത്രി 12 മണിക്ക് നീണ്ടകര പാലത്തിന്റെ സ്പാനുകളെ ബന്ധിച്ച് ചങ്ങലയിടുന്നതോടെയാണ് ട്രോളിങ് നിരോധനത്തിന് തുടക്കമാകുക. അതേസമയം, കന്യാകുമാരി മുതല് ഗുജറാത്തുവരെ ജൂണ് ഒന്നുമുതല് കേന്ദ്രസർക്കാരും ട്രോളിങ് നിരോധനം നടപ്പാക്കിയിരിക്കുകയാണ്. രണ്ടു മാസത്തേക്കാണ് ഈ നിരോധനം.
ഇന്നു രാവിലെമുതല് തീരപ്രദേശങ്ങളില് നിരോധനം സംബന്ധിച്ച് മൈക്കിലൂടെ അറിയിപ്പ് നല്കും. ഇതരസംസ്ഥാന ബോട്ടുകള് തീരംവിട്ടുപോകണമെന്ന് നിർദേശമുണ്ട്. ഇതുറപ്പാക്കാൻ കടലില് പട്രോളിങ് ശക്തമാക്കും. പരമ്ബരാഗത യാനങ്ങള്ക്കുമാത്രമാണ് ട്രോളിങ് നിരോധനകാലയളവില് കടലില്പ്പോകാൻ അനുമതിയുള്ളത്.
മറൈൻ എൻഫോഴ്സ്മെന്റും ഫിഷറീസ് വകുപ്പും ചേർന്നാണ് നിരോധനം ഫലപ്രദമായി നടപ്പാക്കുന്നത്. കളക്ടറുടെ നേതൃത്വത്തില് തഹസില്ദാർമാർ, സബ് കളക്ടർമാർ, ഫിഷറീസ് വകുപ്പ് ഉദ്യോഗസ്ഥർ എന്നിവരടങ്ങിയ സമിതി സ്ഥിതിഗതികള് വിലയിരുത്തും. പരമ്ബരാഗത മത്സ്യത്തൊഴിലാളികള്ക്ക് കടലില് പോകുന്നതിനിടെ എന്തെങ്കിലും അപകടമുണ്ടായാല് ബന്ധപ്പെടാൻ കണ്ട്രോള് റൂം സജ്ജമാക്കിയിട്ടുണ്ട്. നിരോധനകാലയളവില് തീവ്രപ്രകാശമുള്ള ബള്ബുകള് ഉപയോഗിച്ചുള്ള ‘ലൈറ്റ് ഫിഷിങ്’ അടക്കമുള്ളവയ്ക്കെതിരേ കർശന നടപടിയുണ്ടാകും.
പടിഞ്ഞാറൻ തീരക്കടലില് കന്യാകുമാരിമുതല് ഗുജറാത്തുവരെ കേന്ദ്രസർക്കാർ ട്രോളിങ് നിരോധനം നടപ്പാക്കിയിട്ടുണ്ട്. ജൂണ് ഒന്നുമുതല് രണ്ടുമാസത്തേക്കാണ് ഈ നിരോധനം. കേന്ദ്രത്തിന്റെ അധികാരപരിധിയിലുള്ള ഉള്ക്കടലിലും പരമ്ബരാഗത യാനങ്ങള്ക്ക് കടക്കാനാകില്ല.
കൊല്ലം തീരത്തുമാത്രം പ്രതിദിനം 35,000 ടണ്ണോളം മത്സ്യം ലഭിക്കുന്നുണ്ടെന്നാണ് കണക്ക്. പരമ്ബരാഗത യാനങ്ങള്മാത്രം കടലില് പോകുന്നതോടെ മത്സ്യലഭ്യതയില് വലിയ കുറവുണ്ടാകും. ട്രോളിങ് നിരോധനംമൂലം ദുരിതത്തിലാകുന്ന മത്സ്യത്തൊഴിലാളികള്ക്ക് ആറുകിലോ വീതം സൗജന്യ റേഷൻ നല്കും. മത്സ്യത്തൊഴിലാളി സമ്ബാദ്യ സമാശ്വാസ പദ്ധതിയില്നിന്നുള്ള ആദ്യ രണ്ടുഗഡു തുകയും ജൂണ്, ജൂലായ് മാസങ്ങളില് നല്കും.
മത്തി, അയല, ചൂര, നെത്തോലി, വാള, പാര, പരവ തുടങ്ങിയ ഉപരിതല മത്സ്യങ്ങളുടെ പ്രജനനകാലമാണിത്. ആഴക്കടലിലാണ് കാണുന്നതെങ്കിലും കരിക്കാടി, പൂവാലൻ ചെമ്മീൻ ഇനങ്ങളുടെ പ്രജനനവും ഈ സമയത്താണ്. മീനുകളുടെ മുട്ട വിരിഞ്ഞുവരുന്ന സമയത്തെ പ്രധാന ആഹാരമായ പ്ലവഗങ്ങള്, മണ്സൂണ്കാലത്ത് നദികള് വഴി ധാരാളമായി കടലില് എത്തിച്ചേരുന്നതിനാലാണ് മത്സ്യങ്ങള് ഈസമയം പ്രജനനത്തിന് തിരഞ്ഞെടുക്കുന്നത്. ഈസമയത്ത് കടലിന്റെ അടിത്തട്ട് ഇളകാതിരിക്കാൻവേണ്ടിയാണ് ട്രോളിങ് എന്ന മത്സ്യബന്ധനരീതി നിരോധിക്കുന്നത്.
