ചൈനീസ് വാക്‌സിനുകള്‍ സ്വീകരിച്ചവർക്ക് സൗദി അറേബ്യ വിലക്കേര്‍പ്പെടുത്തി. ചൈന ഉത്പാദിപ്പിക്കുന്ന സിനോവാക്, സിനോഫാം വാക്‌സിനുകള്‍ എടുത്തവര്‍ക്കാണ് രാജ്യത്ത് പ്രവേശിക്കുന്നതില്‍ വിലക്കേര്‍പ്പെടുത്തിയിരിക്കുന്നത് .
പാകിസ്ഥാനികളെയാണ് ഈ തീരുമാനം ഏറെ ബാധിക്കുന്നത്. ഈ തീരുമാനം പുനപരിശോധിക്കണമെന്നും അംഗീകൃത വാക്സിനുകളുടെ പട്ടികയില്‍ ചൈനീസ് വാക്‌സീനുകളും ഉള്‍പ്പെടുത്തണമെന്നും പാക് വിദേശകാര്യ മന്ത്രാലയം സൗദി അറേബ്യയോട് ആവശ്യപ്പെട്ടു.
ഇതുവരെ ചൈനീസ് വാക്‌സിനേഷന്‍ സര്‍ട്ടിഫിക്കറ്റുകള്‍ സൗദി അറേബ്യ അംഗീച്ചിട്ടില്ല. ഫൈസര്‍, അസ്ട്രസെനെക്ക, മോഡേണ, ജോണ്‍സണ്‍ ആന്‍ഡ് ജോണ്‍സണ്‍ എന്നിവയാണ് സൗദിയുടെ അംഗീകൃത വാക്സിനുകളുടെ പട്ടികയില്‍ ഉൾപ്പെടുത്തിയിട്ടുള്ളത്.
ഐക്യരാഷ്ട്ര ആരോഗ്യ ഏജന്‍സി അനുമതി നൽകിയിട്ടുണ്ട് എങ്കിലും ചൈനീസ് വാക്സിനുകളുടെ ഫലപ്രാപ്തിയെക്കുറിച്ചുള്ള സംശയം ഇപ്പോഴും നിലനിൽക്കുകയാണ്.
