ജൂണ് മാസത്തോടെ പാരിസ് ക്ലബ്ബായ പി.എസ്.ജി വിട്ട് ലയണല് മെസി തന്റെ പഴയ തട്ടകമായ ബാഴ്സലോണയിലേക്ക് പോകുമെന്ന തരത്തിലുളള അഭ്യൂഹങ്ങള് പുറത്ത് വരുന്നുണ്ട്. ജൂണില് പി.എസ്.ജിയുമായുളള കരാര് അവസാനിക്കുന്നതോടെ താരം ഫ്രീ ഏജന്റായി മാറും. ഇതോടെയാണ് മെസി ബാഴ്സയിലെത്തുമെന്ന തരത്തിലുള്ള റിപ്പോര്ട്ടുകള് പുറത്ത് വരുന്നത്.
എന്നാല് മെസി ബാഴ്സയിലേക്കെത്തുന്നതില് നാല് ബാഴ്സ താരങ്ങള്ക്ക് എതിര്പ്പുണ്ടെന്ന റിപ്പോര്ട്ടുകള് പുറത്ത് വിട്ടിരിക്കുകയാണ് സ്പാനിഷ് മാധ്യമമായ എല് നാഷണല്.ബാഴ്സയുടെ സൂപ്പര് താരങ്ങളായ റോബര്ട്ട് ലെവന്ഡോസ്കി, ഒസ്മാന് ഡെമ്പലെ, അന്സുഫാറ്റി, മാര്ക്ക് ആന്ഡ്രേ ടെര് സ്റ്റീഗന് എന്നീ താരങ്ങള്ക്കാണ് മെസി ബാഴ്സയിലേക്കെത്തുന്നതില് എതിര്പ്പുളളത് എന്നാണ് എല് നാഷണല് റിപ്പോര്ട്ട് ചെയ്തിരിക്കുന്നത്.
അന്സു ഫാറ്റിക്ക് തന്റെ പത്താം നമ്പര് ജേഴ്സി നഷ്ടപ്പെടുന്നതിലും ടീമിലെ തന്റെ സ്ഥാനത്തിന് നഷ്ടം വരുമോയെന്ന പേടിയുമാണ് മെസി തിരിച്ചെത്തണ്ട എന്ന ചിന്തയിലേക്ക് അന്സു എത്തിച്ചേരാന് കാരണം എന്നാണ് എല് നാഷണലിന്റെ റിപ്പോര്ട്ട്.ഇടതു വിങ്ങില് ബാഴ്സക്കായി കളിക്കുന്ന ഡെമ്പലെക്ക് മെസി ക്ലബ്ബിലെത്തിച്ചേരാന് ഇടയായാല് തന്റെ സ്ഥിരം പൊസിഷന് സ്ഥാന വ്യത്യാസമുണ്ടാകുന്നുണ്ടോ എന്ന പേടിയുണ്ട്.
മെസി ബാഴ്സയിലെത്തിച്ചേര്ന്നാല് തന്റെ ക്ലബ്ബിലെ സൂപ്പര്താരം എന്ന പദവിക്ക് മാറ്റമുണ്ടാകുമോയെന്നും ടീമിലെ തന്റെ മുന്തൂക്കം നഷ്ടപ്പെടുമോയെന്നും റോബര്ട്ടോ ലെവന്ഡോസ്കി ഭയപ്പെടുന്നുണ്ട് എന്നതാണ് താരത്തിന്റെ ക്ലബ്ബ് പ്രവേശനത്തെ ലെവ ഭയപ്പെടാന് കാരണം എന്നാണ് എല് നാഷണല് പരാമര്ശിക്കുന്നത്.
അതേസമയം മെസി പി.എസ്.ജി വിട്ടാല് താരത്തെ സ്വന്തമാക്കാനായി ഇന്റര് മിലാന്, ഇന്റര് മിയാമി, അല് ഹിലാല് എന്നീ ക്ലബ്ബുകള് രംഗത്തുണ്ട് എന്നാണ് പുറത്ത് വരുന്ന റിപ്പോര്ട്ടുകള്.
അല് ഹിലാലും ഇന്റര് മിയാമിയും മെസിക്കായി പ്രതിഫല തുക സംബന്ധിച്ച തീരുമാനങ്ങളിലും എത്തിച്ചേര്ന്നിട്ടുണ്ട്.എന്നാല് മെസിയുമായുള്ള കരാര് പുതുക്കാനും താരത്തെ ടീമില് പിടിച്ചുനിര്ത്താനുമുളള തീരുമാനങ്ങളാണ് പി.എസ്.ജി കൈകൊണ്ടിരിക്കുന്നതെന്നാണ് ക്ലബ്ബുമായുള്ള അടുത്ത വൃത്തങ്ങളില് നിന്നും പുറത്ത് വരുന്ന സൂചനകള്.
നിലവില് ലാ ലിഗയില് 30 മത്സരങ്ങളില് നിന്നും 24 വിജയങ്ങളുമായി 76 പോയിന്റോടെ ഒന്നാം സ്ഥാനത്താണ് ബാഴ്സ. ഇത്തവണത്തെ ലീഗ് കിരീടത്തിലേക്ക് ഏതാണ്ട് അടുത്ത അവസ്ഥയിലാണ് ബാഴ്സലോണയുളളത്.
