തിരുവനന്തപുരം: സംസ്ഥാനത്തെ ബാറുകള് അടുത്താഴ്ച തുറന്നേക്കും. അഞ്ചാംതീയതി തദ്ദേശ സ്വയംഭരണ തിരഞ്ഞെടുപ്പ് വിജ്ഞാപനം ഉണ്ടാകും മുമ്പ് ബാറുകള് തുറക്കാമെന്ന ധാരണയുടെ അടിസ്ഥാനത്തിലാണ് തീരുമാനം. കൊവിഡ് മാനദണ്ഡങ്ങള് പാലിക്കുന്നെന്ന് ഉറപ്പുവരുത്താന് എക്സൈസ്,പൊലീസ്, റവന്യൂ വിഭാഗങ്ങള് ബാറുകളില് പരിശോധന നടത്തും.
ബാറുകള് തുറക്കുമെന്ന് സൂചന ലഭിച്ചതോടെ കൗണ്ടര് വഴി വില്ക്കാനായി വിലകുറഞ്ഞ മദ്യങ്ങള് എടുക്കുന്നത് ബാറുകാര് കുറച്ചു. കൊവിഡ് നിയന്ത്രണങ്ങള് പാലിക്കുന്നുണ്ടോയെന്നുളള പരിശോധനകള് കര്ശനമാക്കാന് തീരുമാനിച്ചിട്ടുണ്ട്. ഒരു മേശയ്ക്ക് ഇരുവശവും അകലം പാലിച്ച് രണ്ടുപേരെ മാത്രമേ ഇരിക്കാന് അനുവദിക്കൂ.
ഭക്ഷണം പങ്കുവച്ച് കഴിക്കാന് അനുവദിക്കില്ല. വെയ്റ്റര്മാര് മാസ്കും കൈയുറയും ധരിക്കണം.
ഇതര സംസ്ഥാനങ്ങളില് ബാറുകള് തുറന്നപ്പോള് തന്നെ സംസ്ഥാനത്തും തുറക്കണമെന്നാവശ്യപ്പെട്ട് ബാര് ഓണേഴ്സ് അസോസിയേഷന് സര്ക്കാരിനെ സമീപിച്ചിരുന്നു. തനിക്ക് മാത്രമായി തീരുമാനമെടുക്കാനാവില്ലെന്നായിരുന്നു എക്സൈസ് മന്ത്രിയുടെ നിലപാട്. ബാറുടമകള് പാര്ട്ടി നേതൃത്വത്തെ സമീപിച്ചതിന് പിന്നാലെ സി.പി.എം സംസ്ഥാന സെക്രട്ടറിയേറ്റ് വിഷയം ചര്ച്ച ചെയ്തു. സെക്രട്ടറിയേറ്റില് അനുകൂല നിലപാടുണ്ടായെങ്കിലും കൊവിഡ് വ്യാപനം രൂക്ഷമായി വരുന്ന ഘട്ടമായതിനാല് സാവകാശം മതി ബാര് തുറക്കലെന്ന് തീരുമാനിക്കുകയായിരുന്നു. പിന്നാലെ കൊവിഡ് രൂക്ഷമായേക്കുമെന്ന ആരോഗ്യ സെക്രട്ടറിയുടെ റിപ്പോര്ട്ടും വന്നതോടെയാണ് സര്ക്കാര് ബാര് തുറക്കല് മാറ്റിവച്ചത്.
