നമ്മുടെ രാജ്യത്തെ വിവിധ വ്യവസായ മേഖലകളിൽ ഉയർന്ന ആവശ്യകതയുള്ളവരാണ് ചീഫ് ഫിനാൻഷ്യൽ ഓഫീസർമാർ(സിഎഫ്ഒ). സ്റ്റാർട്ടപ്പുകൾ മുതൽ വ്യവസായ ഭീമന്മാർ വരെ, സാമ്പത്തിക സ്ഥിരത ഉറപ്പാക്കാനും നിയന്ത്രിക്കാനുമായി സിഎഫ്ഒമാരെ നിയമിക്കുന്നു. ഇന്ത്യയിൽ മാത്രമല്ല ആഗോള തലത്തിൽ അനുഭവസമ്പന്നരായ ധാരാളം ചീഫ് ഫിനാൻഷ്യൽ ഓഫീസർമാരുണ്ട്. ഇവരെ നിയമിക്കുന്നതിലൂടെ കമ്പനിയെ ആഗോള തലത്തിൽ ഉയർത്താൻ സാധിക്കും.
കമ്പനിയുടെ സാമ്പത്തിക വളർച്ചയ്ക്ക് വേണ്ടിയും സിഎഫ്ഒമാർ മറ്റ് കമ്പനികളിലേയ്ക്ക് പോകാതിരിക്കാൻ വേണ്ടിയും ധാരാളം ആനുകൂല്യങ്ങൾ ഇവർ നൽകുന്നുണ്ട്. ശമ്പളത്തിന് പുറമെയാണ് പല ബോർഡുകളും ഇവർക്ക് കോടികളുടെ ആനുകൂല്യങ്ങൾ നൽകുന്നത്. പല പ്രമുഖ കമ്പനികളിലും സിഇഒമാർ കഴിഞ്ഞാൽ ഏറ്റവും കൂടുതൽ ശമ്പളം കൈപ്പറ്റുന്നത് സിഎഫ്ഒമാരാണ്. ഇപ്പോഴുള്ള ഒട്ടുമിക്ക കമ്പനിയിലും സിഇഒമാരുടെയും സിഎഫ്ഒമാരുടെയും ശമ്പളം ഏകദേശം ഒരുപോലെയായി മാറിയിരിക്കുകയാണ്. അത്രയും പ്രധാന്യമുള്ള ജോലിയാണ് സിഎഫ്ഒമാർ കൈകാര്യം ചെയ്യേണ്ടത്.
ഒരു ദേശീയ മാദ്ധ്യമത്തിൽ വന്ന റിപ്പോർട്ട് പ്രകാരം, നാല് മുതൽ ആറ് കോടി വരെയാണ് സിഎഫ്ഒമാരുടെ ശരാശരി ശമ്പളം. ഇവരെ കമ്പനികളിൽ പിടിച്ചുനിർത്തുന്നതിന് വേണ്ടി മറ്ര് ആനുകൂല്യങ്ങൾ ഉൾപ്പെടെ 12 മുതൽ 16 കോടി വരെയാണ് ഓരോ വർഷവും നൽകുന്നത്. താമസം, യാത്ര തുടങ്ങി ധാരാളം ആനുകൂല്യങ്ങളാണ് ഇവർക്ക് ലഭിക്കുന്നത്. ജോലി ചെയ്യുന്ന കമ്പനിയും അവർ ഏതൊക്കെ ആഗോള കമ്പനികളുമായി കരാറിലേർപ്പെട്ടിരിക്കുന്നു എന്നതെല്ലാം ആശ്രയിച്ചാവും ശമ്പളം നിശ്ചയിക്കുന്നത്.
സിഎഫ്ഒമാരുടെ ശമ്പളത്തിലുണ്ടായ വർദ്ധനവ് അവർക്ക് ജോലിയിൽ ലഭിക്കുന്ന സ്വാതന്ത്ര്യത്തെ കൂടിയാണ് സൂചിപ്പിക്കുന്നത്. ഐപിഒയ്ക്ക് പോകുന്ന കമ്പനികളുടെ എണ്ണം വർദ്ധിച്ചു, ഉയർന്ന മൂലധന വിപണി പ്രവർത്തനം, നിരവധി പൊതു കമ്പനികൾ കടം പുനഃക്രമീകരിക്കുന്നു , കമ്പനികൾ തമ്മിലുള്ള മത്സരം വർദ്ധിക്കുന്നു, ഇവയെല്ലാം സിഎഫ്ഒമാരുടെ മികവുകൊണ്ടാണെന്നാണ് ഇന്ത്യ ആൻഡ് റീജണൽ ചെയർ ഏഷ്യ എം ഡി കെ സുദർശൻ പറയുന്നത്.
