താരങ്ങളുടെ ബാല്യകാല ഓർമ്മകളും മറ്റും പങ്കുവയ്ക്കുന്ന ത്രോബാക്ക് തേഴ്സ്ഡേ ചിത്രങ്ങള് കാണാൻ ആരാധകർക്ക് എന്നും ഇഷ്ടമാണ്. മലയാളത്തിന്റെ പ്രിയപ്പെട്ട താരങ്ങളിലൊരാളുടെ കുട്ടിക്കാലചിത്രമാണ് ഇപ്പോള് ശ്രദ്ധ നേടുന്നത്.
സ്കൂള്കാലത്ത് ഒരു ഡാൻസ് മത്സരത്തിനിടയില് നിന്നുള്ള ചിത്രമാണിത്. ഡാൻസ് കോസ്റ്റ്യൂമില് ചിരിയോടെ നില്ക്കുകയാണ് കൊച്ചു ബ്രേക്ക് ഡാൻസർ.യുവതാരങ്ങളില് ശ്രദ്ധേയനായ നിവിൻ പോളിയുടെ ചിത്രമാണിത്. ആ ചിരിയ്ക്ക് യാതൊരു മാറ്റവുമില്ല ഇന്നും.
ചുരുങ്ങിയ വർഷങ്ങള് കൊണ്ട് മലയാളി പ്രേക്ഷകരുടെ ശ്രദ്ധ നേടിയ ഒരാളാണ് മലയാളികള്ക്ക് നിവിൻ.’മലർവാടി ആർട്സ് ക്ലബ്ബ്’ എന്ന ചിത്രത്തിലൂടെ സിനിമയില് അരങ്ങേറ്റം കുറിച്ച നിവിൻ വളരെ കുറഞ്ഞ കാലങ്ങള് കൊണ്ടാണ് മലയാളസിനിമയിലെ ശ്രദ്ധേയ താരമായി ഉയർന്നത്. അല്പ്പം കുസൃതിയും ഉഴപ്പും തമാശകളും ചിരികളികളുമൊക്കെയുള്ള അയല്പ്പക്ക പയ്യൻ എന്ന ഇമേജില് നിന്നും ശക്തമായ കഥാപാത്രങ്ങളിലൂടെ കരിയറിനെ മറ്റൊരു ലെവലിലേക്ക് കൊണ്ടുപോവുകയാണ് നിവിൻ ഇപ്പോള്.
തട്ടത്തില് മറയത്ത്, നേരം, 1983, ഓം ശാന്തി ഓശാന, ബാംഗ്ലൂർ ഡേയ്സ്, പ്രേമം, ഒരു വടക്കൻ സെല്ഫി, ആക്ഷൻ ഹീറോ ബിജു, ജേക്കബിന്റെ സ്വർഗ്ഗരാജ്യം, ഞണ്ടുകളുടെ നാട്ടില് ഒരിടവേള, കായം കുളം കൊച്ചുണ്ണി, ലവ് ആക്ഷൻ ഡ്രാമ, മിഖേയല്, ഹേയ് ജൂഡ്, തുറമുഖം, പടവെട്ട് എന്നിവയെല്ലാം ഏറെ ജനപ്രീതി നേടിയ നിവിൻ ചിത്രങ്ങളാണ്. ‘മൂത്തോൻ’ എന്ന ചിത്രത്തിലെ അഭിനയം അന്താരാഷ്ട്രതലത്തില് ശ്രദ്ധ നേടാൻ നിവിനെ സഹായിച്ചു.
വിനീത് ശ്രീനിവാസന്റെ ‘വർഷങ്ങള്ക്ക് ശേഷം’ എന്ന ചിത്രത്തിലെ നിവിന്റെ അതിഥി വേഷം അടുത്തിടെ വലിയ രീതിയില് ശ്രദ്ധ നേടിയിരുന്നു. ഡിജോ ജോസ് ആന്റണി സംവിധാനം ചെയ്ത മലയാളി ഫ്രം ഇന്ത്യയാണ് നിവിന്റെ ഏറ്റവും പുതിയ റിലീസ്. വ്യാഴാഴ്ച തിയേറ്ററുകളിലെത്തിയ ചിത്രം തിയേറ്ററുകളില് പ്രദർശനം തുടരുകയാണ്.