ബിസിനസ് സംരംഭങ്ങള്ക്ക് പൊതു തിരിച്ചറിയല് കാർഡ് എന്ന ലക്ഷ്യത്തോടെ കേന്ദ്രസർക്കാർ പദ്ധതിയായ ‘പാൻ 2.0’ പ്രാബല്യത്തില്.
സൗജന്യമായി
അപ്ഗ്രേഡ് ചെയ്യാം
ആദായനികുതി വകുപ്പ് നല്കുന്ന പെർമനന്റ് അക്കൗണ്ട് നമ്പർ (പാൻ) പുതിയ ഫീച്ചറുകളോടെ അപ്ഗ്രേഡ് ചെയ്യാൻ കഴിഞ്ഞദിവസം ചേർന്ന മന്ത്രിസഭ യോഗം തീരുമാനിച്ചു. ‘പാൻ 2.0’ എന്ന പേരിലുള്ള പുതിയ കാർഡ് ബിസിനസ് സംരംഭങ്ങള്ക്കുള്ള ‘പൊതു തിരിച്ചറിയല് കാർഡ്’ എന്ന സങ്കല്പത്തിലാണ് പുറത്തിറങ്ങുക. ഉപയോക്താക്കള്ക്ക് നിലവിലുള്ള പത്തക്ക നമ്പർ മാറാതെതന്നെ സൗജന്യമായി ‘പാൻ 2.0’-ലേക്ക് മാറാനാകും. ഓണ്ലൈനായി ഇത് ചെയ്യാനാകുമെന്ന് കേന്ദ്രമന്ത്രി അശ്വിനി വൈഷ്ണവ് വ്യക്തമാക്കിയിട്ടുണ്ട്.
*
എന്താണ് പാൻ 2.0…?
1435 കോടി രൂപ മുടക്കിയുള്ള പദ്ധതിയിലൂടെ സർക്കാർ ലക്ഷ്യമിടുന്നത് ബിസിനസ് ആവശ്യങ്ങള്ക്കായി പൊതു തിരിച്ചറിയല് കാർഡ് തയാറാക്കുക എന്നാണ്. നിലവില് 78 കോടി കാർഡ് ഉടമകളാണുള്ളത്. ഇതില് 90 ശതമാനത്തില് പരം ഉപയോക്താക്കളും തങ്ങളുടെ ആധാറുമായി പാൻ കാർഡ് ബന്ധിപ്പിച്ചിട്ടുണ്ട്. ഡിജിറ്റല് സാങ്കേതിക വിദ്യയുടെ സഹായത്തോടെ കാർഡ് അപ്ഗ്രേഡ് ചെയ്യുന്നതിലൂടെ സൈബർ സുരക്ഷ ഉറപ്പുവരുത്താനും സാധിക്കും. ക്യൂആർ കോഡ് സഹിതമായിരിക്കും പുതിയ കാർഡ്. ആദായനികുതി സംബന്ധിച്ച ഇടപാടുകള് എളുപ്പമാക്കാൻ ഇതുവഴി സാധിക്കും.
*
പ്രയോജനമെന്ത്..?
ഉപയോക്താക്കളുടെ ഡാറ്റ സുരക്ഷിതമാക്കാനാകും എന്നതാണ് ഈ പദ്ധതിയുടെ ഏറ്റവും വലിയ പ്രയോജനം. വ്യക്തിയുടെയും ബിസിനസ് സ്ഥാപനങ്ങളുടെയും സമ്പൂർണ സാമ്പത്തിക ഇടപാട് വിവരങ്ങള് ഒരു കുടക്കീഴില് കൊണ്ടുവരാനും സാധിക്കും. ബാങ്കിങ് സേവനങ്ങള്, നികുതി ഇടപാടുകള് തുടങ്ങിയവക്കെല്ലാം പാൻ അനിവാര്യമാണ്. ആദായനികുതിയിലെ സ്രോതസ്സില്നിന്നുള്ള നികുതി (ടിഡിഎസ്), വില്പന ഇടപാടില്നിന്നുള്ള നികുതി (ടിസിഎസ്), മറ്റ് നികുതി ഇടപാടുകള് എന്നിവ ഒറ്റക്കുടക്കീഴില് കേന്ദ്രീകരിക്കാൻ നികുതിവകുപ്പിന് പാൻ വിവരങ്ങളിലൂടെ കഴിയും.
എങ്ങനെ അപ്ഗ്രേഡ് ചെയ്യാം..?
ഓണ്ലൈനായി ‘പാൻ 2.0’ ലേക്ക് മാറണമെന്ന് കേന്ദ്രമന്ത്രിയും ആദായനികുതി വകുപ്പും പറഞ്ഞുവെങ്കിലും അതിന്റെ വിശദാംശങ്ങള് ഇതുവരെ പുറത്തുവിട്ടിട്ടില്ല. നിലവിലെ കാർഡ് തുടർന്നും ഉപയോഗിക്കാമെന്ന് അവർ വ്യക്തമാക്കിയിട്ടുണ്ട്.
