രാവിലെ ഉണരുമ്പോഴേ ക്ഷീണം തുടങ്ങുകയായി. രാത്രി എട്ട്-പത്ത് മണിക്കൂറോളം ഉറങ്ങിയതാണ്. എന്നിട്ടും ദൈനംദിന പ്രവൃത്തികള് ചെയ്യുന്നതിനുള്ള ഉന്മേഷം ചോർന്നു പോകുന്നു. ഇത് തൈറോയ്ഡ് രോഗങ്ങളുടെ സൂചനയാണ്. തൈറോയ്ഡ് ഹോർമോണുകളുടെ പ്രവർത്തനം കൂടിയാലും കുറഞ്ഞാലും ക്ഷീണം അനുഭവപ്പെടും. ഹൈപ്പർ തൈറോയിഡിസം ഉള്ളവരിലാകട്ടെ രാത്രിയില് ഉറക്കം കിട്ടാതെയും വരാറുണ്ട്. പകല് മുഴുവൻ അവർ തളർന്നു കാണപ്പെടുന്നു. ഹൈപ്പർ തൈറോയിഡിസം ഉള്ള ചിലർ പതിവിലേറെ ഉർജസ്വലരായി കാണപ്പെടാറുമുണ്ട്.
ഭാര വ്യതിയാനങ്ങള്
നന്നായി വ്യായാമം ചെയ്യുന്നുണ്ട്. കൊഴുപ്പും കാലറിയും കുറഞ്ഞ ആഹാരമാണ് കഴിക്കുന്നത് എന്നിട്ടും ഭാരം കുറയുന്നതേയില്ല. ഇത് ഹൈപ്പോതൈറോയിഡിസത്തിന്റെ ലക്ഷണമാണ്. തൈറോയ്ഡ് ഹോർമോണുകള് കൂടിയാല് ശരീരഭാരം കുറയും. ഹോർമോണ് കുറഞ്ഞാല് ശരീരഭാരം കൂടും. അതിനാല് ഭാരവ്യതിയാനങ്ങള് ഹൈപ്പോതൈറോയിഡിസത്തിന്റെയും ഹൈപ്പർതൈറോയിഡിസത്തിന്റെയും ലക്ഷണങ്ങളാണ്.
ഉൽകണ്ഠയും വിഷാദവും
മനസ് പെട്ടെന്നു വിഷാദമൂകമാകുന്നു. വല്ലാത്ത ഉൽകണ്ഠയും. മൂഡ്മാറ്റം എന്നു പറഞ്ഞ് തള്ളാൻ വരട്ടെ. ഡിപ്രഷന് പിന്നില് ഹൈപ്പോതൈറോയിഡിസമാകാം. ഉൽകണ്ഠയ്ക്ക് കാരണമാകുന്നത് ഹൈപ്പർ തൈറോയിഡിസവും. തൈറോയ്ഡ് പ്രശ്നം മൂലമുള്ള വിഷാദത്തിന് ആന്റിഡി പ്രസീവുകള്കൊണ്ട് പ്രയോജനമുണ്ടാകില്ല.
കൊളസ്ട്രോള്
ആഹാരത്തിലും വ്യായാമത്തിലും ശ്രദ്ധിക്കുന്നു. കോളസ്ട്രോള് കുറയ്ക്കുന്ന മരുന്നും കഴിക്കുന്നുണ്ട്. എന്നിട്ടും കൊളസ്ട്രോള് ലെവല് ഉയരുന്നു. സൂക്ഷിക്കുക. ഇത് ഹൈപ്പോതൈറോയിഡിസമാകാം. കൊളസ്ട്രോള് ലെവല് കുറയുന്നുണ്ടെങ്കില് അത് ഹൈപ്പർ തൈറോയിഡിസത്തിന്റെ ലക്ഷണമാകാം. ഹൈപ്പോതൈറോയിഡിസത്തില് ചീത്ത കൊളസ്ട്രോളായ എല്ഡിഎല്ലും ട്രൈഗ്ലിസറൈഡുകളും ഉയരുകയും നല്ല കൊളസ്ട്രോളായ എച്ച്ഡിഎല് കുറയുകയും ചെയ്യും. ചിലരില് ട്രൈഗ്ലിസറൈഡ് വളരെ ഉയർന്ന അളവില് കാണപ്പെടാറുണ്ട്. കുടുംബ പാരമ്പര്യത്തില് കോളസ്ട്രോള് ഇല്ലാതിരിക്കെ ചെറുപ്രായത്തില് കൊളസ്ട്രോള് വർധന കണ്ടാല് തൈറോയ്ഡ് ഹോർമോണ് പരിശോധന ചെയ്യണം.
കുടുംബ പാരമ്പര്യം
അച്ഛൻ, അമ്മ, സഹോദരങ്ങള് ഇവരിലാർക്കെങ്കിലും തൈറോയ്ഡ് രോഗങ്ങളുണ്ടെങ്കില് നിങ്ങള്ക്കും വരാൻ ഉയർന്ന സാധ്യതയുണ്ട്. അതിനാല് തൈറോയ്ഡ് രോഗങ്ങളെക്കുറിച്ച് സ്വയം ബോധവാന്മാരായിരിക്കണം.
ആർത്തവ ക്രമക്കേടുകളും വന്ധ്യതയും
തുടരെ അമിത രക്തസ്രാവത്തോടു കൂടിയും അസഹ്യ വേദനയോടെയും ആർത്തവം… ഇവ ആർത്തവ പ്രശ്നങ്ങള് മാത്രമാണെന്ന് കരുതിയെങ്കില് തെറ്റി. ഹൈപ്പോതൈറോയിഡിസമുള്ളവരില് ഈ ലക്ഷണങ്ങള് വരാം. സമയം തെറ്റി വരുന്ന ആർത്തവം, ശുഷ്കമായ ആർത്തവദിനങ്ങള്, നേരിയ രക്തസ്രാവം എന്നിവ ഹൈപ്പർതൈറോയിഡിസവുമായി ബന്ധപ്പെട്ടിരിക്കുന്നു. തൈറോയ്ഡ് രോഗം വന്ധ്യതയ്ക്ക് കാരണമാകാം. തൈറോയ്ഡ് ഹോർമോണ് കൂടിയാല് ഗർഭമലസുന്നതിനുള്ള സാധ്യത കൂതുടലാണ്. ഭ്രൂണത്തിന് വളർച്ചക്കുറവും വരാം.
ഉദര പ്രശ്നങ്ങള്
നിങ്ങള്ക്ക് ദീർഘകാലമായി നീണ്ടു നില്ക്കുന്ന, കടുത്ത മലബന്ധ പ്രശ്നമുണ്ടോ..? അത് ഹൈപ്പോതൈറോയിഡിസം കൊണ്ടാകാം. വയറിളക്കം, ഇറിറ്റബിള് ബവല് സിൻഡ്രോം എന്നിവയും ഹൈപ്പർതൈറോയിഡിസവുമായി ബന്ധപ്പെട്ടിരിക്കുന്നു.
മുടി-ചർമ്മ വ്യതിയാനങ്ങള്
മുടിയുടെയും ചർമ്മത്തിന്റെയും സ്വാഭാവിക ആരോഗ്യത്തിന് തൈറോയ്ഡ് ഹോർമോണ് ആവശ്യമാണ്. ഹൈപ്പോതൈറോയിഡിസമുള്ളവരില് മുടി കൂടെക്കൂടെ പൊട്ടിപ്പോവുക, വരണ്ടതാകുക എന്നീ പ്രശ്നങ്ങള് കാണാറുണ്ട്. ചർമ്മം കട്ടിയുള്ളതും വരണ്ടതുമാകുന്നു. ഹൈപ്പർ തൈറോയിഡിസത്തില് കനത്ത മുടി കൊഴിച്ചിലുണ്ടാകുന്നു. ചർമ്മം നേർത്തു ദുർബലമാകുന്നു.
കഴുത്തിന്റെ അസ്വാസ്ഥ്യം
കഴുത്തില് നീർക്കെട്ടുപോലെ തോന്നുക, ടൈയും മറ്റും കെട്ടുമ്പോള് അസ്വാസ്ഥ്യം, കാഴ്ചയില് കഴുത്തില് മുഴപോലെ വീർപ്പ് കാണുക, അടഞ്ഞ ശബ്ദം എന്നിവയെല്ലാം തൈറോയ്ഡ് പ്രശ്നങ്ങളുടെ സൂചനകളാണ്. തൈറോയ്ഡ് ഹോർമോണ് കൂടിയാലും കുറഞ്ഞാലും ഈ ലക്ഷണങ്ങളുണ്ടാകാം.
പേശീസന്ധി വേദനകള്
പേശികള്ക്കും സന്ധികള്ക്കും വേദന, ബലക്ഷയം, ഇവ തൈറോയ്ഡ് രോഗ സുചനകളാണ്. തൈറോയ്ഡ് ഹോർമോണ് കൂടുന്നതിന്റെയും കുറയുന്നതിന്റെയും ഭാഗമായി ഇവ പ്രത്യക്ഷപ്പെടാം.
