ഒന്നര മാസത്തിനുള്ളിൽ സ്വർണം 1.36 ലക്ഷം കടക്കും! വിലയിൽ 46% മുന്നേറ്റമുണ്ടാകുമെന്ന് ജെ.പി. മോർഗൻ
സമീപകാലത്തെ വിലയിടിവിനും ചാഞ്ചാട്ടങ്ങൾക്കും പിന്നാലെ സ്വർണത്തിൽ വീണ്ടും പ്രതീക്ഷയർപ്പിക്കുകയാണ് ആഗോള നിക്ഷേപകർ. 2026 അവസാനത്തോടെ രാജ്യാന്തര വിപണിയിൽ ഒരു ട്രോയ് ഔൺസ് സ്വർണത്തിന്റെ വില 6,000 ഡോളറിലെത്തിയേക്കുമെന്നാണ് പ്രമുഖ ആഗോള ധനകാര്യ സ്ഥാപനമായ ജെ.പി. മോർഗന്റെ പ്രവചനം. അതായത് വരുന്ന ഒന്നര മാസത്തിനുള്ളിൽ വിലയിൽ വലിയ കുതിപ്പാണ് ബ്രോക്കറേജ് പ്രതീക്ഷിക്കുന്നത്.നിലവിലെ വിലനിലവാരത്തിൽനിന്ന് ഏകദേശം 46 ശതമാനം വരെ വർധനവിനുള്ള സാധ്യതയാണ് ഈ വിലയിരുത്തൽ മുന്നോ ട്ടുവയ്ക്കുന്നത്.ദീപാവലിക്ക് പിന്നാലെ ഇന്ത്യൻ വിപണിയിലും സ്വർണവിലയിൽ വർധന രേഖപ്പെടുത്തിയിരുന്നു. എന്നാൽ സമീപകാലത്തെ ഇടിവ് കണ്ട് സ്വർണം വാങ്ങാൻ കാത്തിരിക്കുന്നവർക്ക് പുതിയ പ്രവചനം ആശയക്കുഴപ്പമുണ്ടാക്കുന്നതാണ്. വില ഇനിയും കുറയുമോ, അതോ വീണ്ടും റെക്കോർഡ് ഉയരങ്ങളിലേക്ക് കുതിക്കുമോ എന്നതാണ് പ്രധാന ചോദ്യം.ആഗോള സാമ്പത്തിക അനിശ്ചിതത്വങ്ങൾ, കേന്ദ്ര ബാങ്കുകളുടെ സ്വർണം വാങ്ങൽ, നിക്ഷേപകരുടെ സുരക്ഷിത നിക്ഷേപങ്ങളോടുള്ള താൽപര്യം തുടങ്ങിയ ഘടകങ്ങളാണ് സ്വർണത്തിന്റെ ദീർഘകാല ആവശ്യകതയെ സ്വാധീനിക്കുന്നത്. ഓഹരി വിപണിയിലെ ചാഞ്ചാട്ടങ്ങളും ഭൗമരാഷ്ട്രീയ സംഘർഷങ്ങളും നിലനിൽക്കുമ്പോൾ സ്വർണത്തിന് സുരക്ഷിത നിക്ഷേപമെന്ന നിലയിൽ കൂടുതൽ പ്രാധാന്യം ലഭിക്കാം.കേന്ദ്ര ബാങ്കുകളുടെ തുടർച്ചയായ വാങ്ങലും വിപണിയിലെ ആവശ്യകതയ്ക്ക് പിന്തുണയാകുന്ന ഘടകമാണ്. എന്നാൽ രാജ്യാന്തര വിപണിയിൽ വില ഉയരുന്നതിന് അനുസരിച്ച് കേരളത്തിലും അതേ തോതിൽ വർധനയുണ്ടാകണമെന്നില്ല. ഡോളറിനെതിരായ രൂപയുടെ മൂല്യം, ഇറക്കുമതി തീരുവ, ജിഎസ്ടി, ആഭ്യന്തര ആവശ്യകത തുടങ്ങിയ ഘടകങ്ങളും ഇന്ത്യയിലെ സ്വർണവിലയെ സ്വാധീനിക്കും.
സ്വർണവില ഇടിയുമ്പോഴും വാങ്ങിക്കൂട്ടി ചൈന; 2 വർഷമായി തുടർച്ചയായ സ്വർണവേട്ട; ഒക്ടോബറിൽ മാത്രം 25.8 ടൺ
അന്താരാഷ്ട്ര വിപണിയിൽ സ്വർണവിലയിൽ ഇടിവ് രേഖപ്പെടുത്തുമ്പോഴും ചൈനയുടെ സ്വർണവാങ്ങൽ തുടരുകയാണ്. വിലയിടിവ് പ്രയോജനപ്പെടുത്തി രാജ്യത്തിന്റെ ഔദ്യോഗിക സ്വർണശേഖരം കൂടുതൽ ശക്തിപ്പെടുത്തുകയാണ് ചൈനീസ് കേന്ദ്ര ബാങ്ക്. 2026 ഒക്ടോബറിൽ മാത്രം 25.8 ടൺ സ്വർണമാണ് ചൈനയുടെ കേന്ദ്ര ബാങ്കായ പീപ്പിൾസ് ബാങ്ക് ഓഫ് ചൈന വാങ്ങിയത്. ഇതോടെ തുടർച്ചയായി 24 മാസമായി സ്വർണം വാങ്ങുന്ന രാജ്യമായി ചൈന മാറി.2024 നവംബറിൽ ആരംഭിച്ച ഈ വാങ്ങൽ തുടർച്ചയായ രണ്ടാം വർഷത്തിലേക്ക് കടന്നിരിക്കുകയാണ്. 2026-ലെ ആദ്യ പത്ത് മാസത്തിനിടെ മാത്രം ഏകദേശം 129 ടൺ സ്വർണം ശേഖരത്തിൽ കൂട്ടിച്ചേർത്തു. ഒക്ടോബറിൽ അന്താരാഷ്ട്ര വിപണിയിൽ സ്വർണവില ഏകദേശം ഏഴ് ശതമാനം ഇടിഞ്ഞ് ഔൺസിന് 4,000 ഡോളറിന് താഴെയെത്തിയപ്പോഴാണ് ചൈനയുടെ ഈ വാങ്ങൽ എന്നതും ശ്രദ്ധേയമാണ്.ലോകമെമ്പാടുമുള്ള കേന്ദ്ര ബാങ്കുകളുടെ സ്വർണം വാങ്ങലിലും ചൈന നിർണായക പങ്കുവഹിക്കുന്നുണ്ട്. വേൾഡ് ഗോൾഡ് കൗൺസിലിന്റെ കണക്കുകൾ പ്രകാരം 2026 മൂന്നാം പാദത്തിൽ ഏറ്റവും കൂടുതൽ സ്വർണം വാങ്ങിയതായി വെളിപ്പെടുത്തിയ കേന്ദ്ര ബാങ്ക് ചൈനയുടേതാണ്. ജൂലൈ മുതൽ സെപ്റ്റംബർ വരെയുള്ള കാലയളവിൽ ആഗോള കേന്ദ്ര ബാങ്കുകൾ ആകെ 321 ടൺ സ്വർണം ശേഖരത്തിൽ കൂട്ടിച്ചേർത്തു.അമേരിക്കൻ ഡോളറിനെ ആശ്രയിക്കുന്നത് കുറയ്ക്കുക, വിദേശനാണയ ശേഖരത്തിൽ വൈവിധ്യം ഉറപ്പാക്കുക, സാമ്പത്തിക അനിശ്ചിതത്വങ്ങളിൽ നിന്ന് സംരക്ഷണം നേടുക എന്നിവയാണ് കേന്ദ്ര ബാങ്കുകളുടെ സ്വർണശേഖരണത്തിന് പിന്നിലെ പ്രധാന ഘടകങ്ങൾ. ചൈനയുടെ ഈ നീക്കം സാധാരണ നിക്ഷേപകരെയും സ്വാധീനിക്കുന്നുണ്ട്. കേന്ദ്ര ബാങ്ക് തുടർച്ചയായി സ്വർണം വാങ്ങുന്നത് ഭാവിയിൽ വിലയ്ക്ക് പിന്തുണയാകുമെന്ന പ്രതീക്ഷയിൽ ചൈനീസ് നിക്ഷേപകരും സ്വർണം വാങ്ങുന്നുണ്ട്.ചൈനയുടെ വിദേശനാണയ കരുതൽ ശേഖരത്തിൽ സ്വർണത്തിന്റെ വിഹിതം ഇനിയും വർധിപ്പിക്കാൻ സാധ്യതയുണ്ടെന്നാണ് സാമ്പത്തിക നിരീക്ഷകരുടെ വിലയിരുത്തൽ. വേൾഡ് ഗോൾഡ് കൗൺസിലിന്റെ കണക്കുകൾ പ്രകാരം 2026 സെപ്റ്റംബർ അവസാനത്തോടെ ചൈനയുടെ ഔദ്യോഗിക കരുതൽ ശേഖരത്തിൽ സ്വർണത്തിന്റെ പങ്ക് ഏകദേശം 8.5 ശതമാനമായിരുന്നു. അതായത്, രാജ്യത്തിന്റെ ആകെ കരുതൽ ആസ്തികളിൽ ഭൂരിഭാഗവും ഇപ്പോഴും വിദേശനാണയ ആസ്തികളായാണ് നിലനിൽക്കുന്നത്.
പുഞ്ചവയൽ മുതൽ പനമരം ടൗൺ വരെയുള്ള ഗതാഗതം പൂർണമായും നിരോധിക്കാനുള്ള തീരുമാനം പിൻവലിച്ചു.
പഞ്ചായത്ത് പ്രസിഡൻ്റ് വിളിച്ചു ചേർത്ത സർവ്വകക്ഷി യോഗത്തിലാണ് തീരുമാനം. ഡിസംബർ 31 വരെ ഗതാഗതം പൂർണമായും നിരോധിക്കും എന്ന് കെആർഎഫ്ബി അധികൃതർ അറിയിച്ചതിന് പിന്നാലെയുണ്ടായ പ്രതിഷേധങ്ങളും രണ്ടു മാസത്തേക്ക് ഗതാഗത നിരോധനം പ്രതിഷേധം ശക്തം എന്ന മാധ്യമ വാർത്തയെ തുടർന്നാണ് സർവകക്ഷി യോഗം ചേരാനും ഒടുവിൽ തീരുമാനം പിൻവലിക്കാനും കാരണമായത്. റോഡ് അടച്ചിടാതെ ശാസ്ത്രീയമായി പ്രവൃത്തി നടത്താൻ കഴിയുമെന്നിരിക്കെ ജനങ്ങളെ ദുരിതത്തിലാക്കുന്ന രീതിയിൽ ഗതാഗതം പൂർണമായും നിരോധിക്കുന്നതിനെതിരെ ജനങ്ങളും, റോഡ് അക്ഷൻ കമ്മിറ്റിയും വ്യാപാരികളും ഓട്ടോ, ടാക്സി, ബസ് ജീവനക്കാർ, സംഘടനകൾ, വിവിധ രാഷ്ട്രീയ പാർട്ടികൾ ഉൾപ്പെടെ പ്രതിഷേധവുമായി രംഗത്തെത്തിയിരുന്നു. സർവകക്ഷി യോഗത്തിൽ റോഡ് അടച്ചിടാതെ പണികൾ സമയത്ത് പൂർത്തികരിക്കാൻ കഴിയില്ലെന്ന അധികൃതരുടെ വാദത്തെ സർവകക്ഷി യോഗത്തിൽ പങ്കെടുക്കാനെത്തിയവർ ഒറ്റക്കെട്ടായി എതിർത്തതോടെയാണ് തീരുമാനത്തിൽ മാറ്റം വരുത്തിയത്. ഇതിനിടെ ചിലർ പനമരം ചെറിയപാലം മുതൽ ടൗൺ വരെയുള്ള ഭാഗത്തെ കോൺക്രീറ്റ് ഒഴിവാക്കി ടാറിങ് നടത്തണമെന്ന് ആവശ്യപ്പെട്ടതു ബഹളത്തിനിടയാക്കി. ചർച്ചക്കൊടുവിൽ എസ്റ്റിമേറ്റിൽ മാറ്റം വരുത്തില്ലെന്നും എസ്റ്റിമേറ്റ് പ്രകാരമുള്ള കോൺക്രീറ്റ് തന്നെ നടക്കുമെന്നും, റോഡ് അടച്ചിടുന്നതിന് പകരം പനമരം ചെറിയപാലം മുതൽ ടൗൺ വരെയുള്ള ഭാഗത്ത് നിർമാണം നടക്കുമ്പോൾ റോഡിൻ്റെ ഒരു വശത്തുകൂടി നടവയൽ ഭാഗത്തേക്ക് വാഹനങ്ങൾ കടത്തിവിടാം എന്നും നടവയൽ ഭാഗത്തു നിന്ന് വരുന്ന വാഹനങ്ങൾ പാലത്തിന് സമീപത്തെ പഞ്ചായത്ത് റോഡിലൂടെ വഴി തിരിച്ചു വീടാമെന്നും അധികൃതർ സർവകക്ഷി യോഗത്തിന് ഉറപ്പ് നൽകി. പണി വേഗത്തിലാക്കുന്നതിന് കൂടുതൽ ജോലിക്കാരെ എത്തിക്കാനുള്ള നടപടി സ്വീകരിച്ചതായും വേണ്ടി വന്നാൽ രാവും പകലും ജോലിക്കാരെ ഉപയോഗിച്ച് 3 മാസത്തിനുള്ളിൽ പണി പൂർത്തികരിക്കുമെന്നും കാരാറുകാരൻ്റെ പ്രതിനിധി അറിയിച്ചു. പഞ്ചായത്ത് പ്രസിഡൻ്റ് ലക്ഷ്മി ആലക്കമുറ്റം അധ്യക്ഷത വഹിച്ചു. സ്ഥിരം സമിതി അധ്യക്ഷരായ ഷാജി കോവ ,ജോസ് നിലംമ്പനാട്ട്, എൻ.അജീഷ, പഞ്ചായത്തംഗങ്ങളായ വി.വി.രാജൻ, സാബു നിർവാരം, പഞ്ചായത്ത് സെക്രട്ടറി വിനോദ് കുമാർ, എക്സിക്യുട്ടിവ് എൻജിനിയർ ഐ.കെ. മിഥുൻ, അസിസ്റ്റൻ്റ് എൻജീനിയർ എൻ.ജിതിൻ, അസിസ്റ്റൻ്റ് എക്സിക്യൂട്ടീവ് എൻജിനീയർ അബ്ദുൾ അസീസ് കരാർ കമ്പനി പ്രതിനിധി വി.പി.സലീം എന്നിവർ പ്രസംഗിച്ചു.
സംരക്ഷണ ഭിത്തി നിർമാണത്തിനിടെ മണ്ണിടിഞ്ഞ് അപകടം; രണ്ട് പേരെ അഗ്നിരക്ഷാസേന സാഹസികമായി രക്ഷപ്പെടുത്തി.
കൽപ്പറ്റ എസ്.പി. ഓഫീസിന് സമീപം വീടിന്റെ സംരക്ഷണ ഭിത്തി നിർമാണം നടന്നുകൊണ്ടിരിക്കെ മണ്ണിടിഞ്ഞ് വീണ് രണ്ട് പേർക്ക് പരിക്കേറ്റു. നിർമാണപ്രവർത്തനത്തിനിടെ അപ്രതീക്ഷിതമായി മണ്ണിടിഞ്ഞതോടെ രണ്ട് പേർ മണ്ണിനടിയിൽ കുടുങ്ങുകയായിരുന്നു.ഇന്ന് ഉച്ചയ്ക്ക് രണ്ട് മണിയോടെയാണ് അപകടമുണ്ടായത്.ജോലി ചെയ്തുകൊണ്ടിരിക്കെ മണ്ണിടിഞ്ഞുവീണ് കഴുത്തോളം മണ്ണിനടിയിലും കോൺക്രീറ്റ് കമ്പികൾക്കിടയിലും കുടുങ്ങിയ നിലയിലായിരുന്നു ഇവർ .വിവരമറിഞ്ഞ് കൽപ്പറ്റ അഗ്നിരക്ഷാനിലയത്തിൽ നിന്നും ഫയർഫോഴ്സ് സംഘം സ്ഥലത്തെത്തി രക്ഷാപ്രവർത്തനം ആരംഭിച്ചു. ഹൈഡ്രോളിക് ഉപകരണങ്ങളും റസ്ക്യൂ ടൂളുകളും ഉപയോഗിച്ച് കോൺക്രീറ്റ് കമ്പികൾ മുറിച്ചുമാറ്റിയും,JCB ഉപയോഗിച്ച് മണ്ണ് നീക്കം ചെയ്തുമാണ് രക്ഷാപ്രവർത്തനം നടത്തിയത്.കമ്പികൾക്കിടയിൽ തൊഴിലാളികൾ കുടുങ്ങിക്കിടന്നതിനാൽ യന്ത്രങ്ങളുടെ ഉപയോഗം പരിമിതമായിരുന്നു. അഗ്നിരക്ഷാസേനയുടെ ഒരു മണിക്കൂറോളം നീണ്ട സാഹസികവും കഠിനവുമായ പരിശ്രമത്തിനൊടുവിലാണ് ഇരുവരെയും സുരക്ഷിതമായി പുറത്തെടുത്തത്.കൂടുതൽ മണ്ണിടിച്ചിലിനുള്ള സാധ്യത കണക്കിലെടുത്ത് അതീവ ജാഗ്രതയോടെയാണ് രക്ഷാപ്രവർത്തനം മുന്നോട്ടുകൊണ്ടുപോയത്.അപകടത്തിൽപ്പെട്ട സുനിൽ കുമാർ, റക്കീബ് ഷെയ്ഖ് എന്നിവരെ കൈനാട്ടി താലൂക്ക് ആശുപത്രിയിൽ പ്രവേശിപ്പിച്ചു. ഇവർക്ക് ചികിത്സ നൽകി വരികയാണ്.അഗ്നിരക്ഷാസേനയുടെ സമയോചിതവും കാര്യക്ഷമവുമായ ഇടപെടലാണ് രണ്ട് ജീവനുകൾ രക്ഷിക്കാൻ സഹായകമായത്.കൽപ്പറ്റ സ്റ്റേഷൻ ഓഫീസർ ശ്രീ. നിധീഷ് കുമാറിന്റെ നേതൃത്വത്തിൽ അസിസ്റ്റന്റ് സ്റ്റേഷൻ ഓഫീസർ ശ്രീ.സതീഷ്ബാബു ,സീനിയർ ഫയർ ആൻഡ് റെസ്ക്യൂ ഓഫീസർ ശ്രീ. എ വി വിനോദ് കുമാർ ,ഫയർ ആൻഡ് റെസ്ക്യൂ ഓഫീസർ ഡ്രൈവർമാരായ മധു വി ആർ , മോഹനൻ കെ എസ് ഫയർ ആൻഡ് റെസ്ക്യൂ ഓഫീസർമാരായ ഷാഹുൽ ഹമീദ് കെ പി ,ദീപു കെ ആർ , വിഷ്ണു കെ ആർ ,സുജിത്ത് യു , വുമൺ ഫയർ ആൻഡ് റെസ്ക്യൂ ഓഫീസർമാരായ ശ്രീഷ്മ പി എൽ , സിമിൽ ജോസ് , ഹോംഗാർഡ്മാരായ ബിനു ഇ കെ , അഷ്‌റഫ് എന്നിവർ ആണ് രക്ഷാപ്രവർത്തനം നടത്തിയത്
ORC ക്യാമ്പിന് തുടക്കമായി
കേരള സർക്കാർ വനിതാ ശിശു വികസന വകുപ്പ് , ജില്ലാ ശിശു സംരക്ഷണ യൂണിറ്റ് സംയുക്തമായി കുട്ടികൾക്ക് അവരുടെ സാമൂഹികവും മാനസികവുമായ ഉന്നമനം ലക്ഷ്യം വെച്ച് നടപ്പിലാക്കുന്ന 3 ദിവസം നീണ്ടു നിൽക്കുന്ന ORC ക്യാമ്പിന് GVHSS വെള്ളാർമലയിൽ തുടക്കമായി. സ്കൂൾ പിടിഎ പ്രസിഡണ്ട് ബൈജു എം അധ്യക്ഷത വഹിച്ച ചടങ്ങ് പ്രധാനാധ്യാപിക ജസ്ന ജോസ് ഉദ്ഘാടനം ചെയ്തു. സ്റ്റാഫ് സെക്രട്ടറി അനീഷ് ശങ്കർ ആശംസകൾ നേർന്നു.ORC സ്കൂൾ നോഡൽ ഓഫീസർ സുനജ MK സ്വാഗതവും ,സ്കൂൾകൗൺസിലർ റഹീല പി.എസ് നന്ദിയും രേഖപ്പെടുത്തി. അധ്യാപകരായ ഷാഹിന, അനിഷ് ടി കെ എന്നിവർ ക്യാമ്പിന് നേതൃത്വം നൽകുന്നുണ്ട്.അജ്മൽ, തെൽഹത്ത്, ശ്രുതി എന്നിവരാണ് ക്ലാസിനു നേതൃത്വം നൽകുന്നത്.
ശ്രേയസ് കാരുണ്യ സ്പർശം പദ്ധതി സമർപ്പണം നടത്തി.
ബത്തേരി രൂപതയുടെ സാമൂഹ്യ സേവന വിഭാഗമായ ശ്രേയസ് "കാരുണ്യ സ്പർശം" പദ്ധതിയുടെ ഭാഗമായി ചീരാൽ യൂണിറ്റിലെ നമ്പിക്കൊല്ലി കാരുണ്യ പുരുഷ സ്വാശ്രയ സംഘത്തിന് അനുവദിച്ച സൗജന്യ ഉപകരണങ്ങളുടെ സമർപ്പണം എക്സിക്യൂട്ടീവ് ഡയറക്ടർ ഫാ.ഡേവിഡ് ആലിങ്കൽ നിർവഹിച്ചു.ബത്തേരി മേഖല പ്രോഗ്രാം ഓഫീസർ പോൾ പി. എഫ്.അധ്യക്ഷത വഹിച്ചു.സുൽത്താൻ ബത്തേരി ബ്ലോക്ക് പഞ്ചായത്ത് പ്രസിഡന്റ് പ്രസന്ന ശശീന്ദ്രൻ മുഖ്യസന്ദേശം നൽകി.നൂൽപ്പുഴ ഗ്രാമപഞ്ചായത്ത് മെമ്പർ വിജയൻ തീണൂർ, ഹായ് പ്രൊജക്റ്റ്‌ കോർഡിനേറ്റർ ലനീഷ്,പെയിൻ ആന്റ് പാലിയേറ്റീവ് പ്രസിഡന്റ് ബിജു നമ്പിക്കൊല്ലി,സി ഡി ഒ മാരായ സ്കറിയ പി.പി.,റഷീദ ലത്തീഫ് എന്നിവർ സംസാരിച്ചു.സംഘം സെക്രട്ടറി ബിനു സ്വാഗതവും,വൈസ് പ്രസിഡന്റ് വി.പി.സജി നന്ദിയും രേഖപ്പെടുത്തി.
മുള്ളന്‍ക്കൊല്ലിയില്‍ പെണ്‍മ വനിതാ സംഗമം നടത്തി
ഐസിഡിഎസിന്റെ ആഭിമുഖ്യത്തില്‍ മുള്ളന്‍ക്കൊല്ലി ഗ്രാമപഞ്ചായത്ത് വാര്‍ഷിക പദ്ധതിയുടെ ഭാഗമായി വനിതാ ഐക്യവും ശാക്തീകരണവും ലക്ഷ്യമിട്ട് പെണ്‍മ' വനിതാ സംഗമം സംഘടിപ്പിച്ചു. ഗ്രാമപഞ്ചായത്തിലെ 19 വാര്‍ഡുകളില്‍ നിന്നുള്ള 800 ഓളം വനിതകള്‍ സംഗമത്തില്‍ പങ്കെടുത്തു. വനിതാ സംഗമം പനമരം ബ്ലോക്ക് പഞ്ചായത്ത് പ്രസിഡന്റ് ടി.എസ് ദിലീപ് കുമാര്‍ ഉദ്ഘാടനം ചെയ്തു. വ്യക്തിഗത, ഗ്രൂപ്പ് വിഭാഗങ്ങളിലായി വിവിധ കലാപരിപാടികളും മത്സരങ്ങളും നടന്നു. ഗ്രാമപഞ്ചായത്ത് പ്രസിഡന്റ് ലിസി സാബുവിന്റെ അധ്യക്ഷതയില്‍ നടന്ന പരിപാടിയില്‍ വൈസ് പ്രസിഡന്റ് ഷിനു കച്ചിറയില്‍, ക്ഷേമകാര്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ മുനീര്‍ ആച്ചിക്കുളത്ത്, ബ്ലോക്ക് പഞ്ചായത്ത് വികസന സ്റ്റാന്റിങ് കമ്മിറ്റി ചെയര്‍പേഴ്‌സണ്‍ വര്‍ഗീസ് മുരിയന്‍കാവിങ്കല്‍, ജില്ലാ പഞ്ചായത്ത് ക്ഷേമകാര്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ ഗിരിജ കൃഷ്ണന്‍, ഗ്രാമപഞ്ചായത്ത് സെക്രട്ടറി ഷൂജ സലാം, ഐസിഡിഎസ് സൂപ്പര്‍വൈസര്‍ ഇ.എ സീത എന്നിവര്‍ പങ്കെടുത്തു.
മെഡിക്കല്‍ കോളേജില്‍ കരാര്‍ നിയമനം
വയനാട് ഗവ മെഡിക്കല്‍ കോളേജിലെ വിവിധ വകുപ്പുകളിലെ ട്യൂട്ടര്‍/ഡെമോണ്‍സ്‌ട്രേറ്റര്‍, ജൂനിയര്‍ റസിഡന്റ് തസ്തിക ഒഴിവുകളിലേക്ക് കരാര്‍ നിയമനം നടത്തും. എം.ബി.ബി.എസ് ബിരുദവും, ടി.സി.എം.സി/ കേരള സ്റ്റേറ്റ് മെഡിക്കല്‍ കൗണ്‍സില്‍ സ്ഥിരം രജിസ്‌ട്രേഷനുള്ള യോഗ്യരായ ഉദ്യോഗാര്‍ഥികള്‍ക്ക് വാക്ക്-ഇന്‍-ഇന്റര്‍വ്യൂവില്‍ പങ്കെടുക്കാം. പ്രതിമാസം 52,000 രൂപ ഏകീകൃത ശമ്പളത്തില്‍ ഒരു വര്‍ഷത്തേക്കാണ് നിയമനം. ഉദ്യോഗാര്‍ത്ഥികള്‍ യോഗ്യത സര്‍ട്ടിഫിക്കറ്റിന്റെ അസല്‍, മാര്‍ക്ക് ലിസ്റ്റുകള്‍, പ്രവൃത്തി പരിചയ സര്‍ട്ടിഫിക്കറ്റ്, ആധാര്‍ കാര്‍ഡ്, പാന്‍ കാര്‍ഡ്, വയസ് തെളിയിക്കുന്ന രേഖകളുമായി നവംബര്‍ 19 ന് രാവിലെ 11 ന് മെഡിക്കല്‍ കോളേജ് പ്രിന്‍സിപ്പലിന്റെ ഓഫീസില്‍ നടക്കുന്ന അഭിമുഖത്തില്‍ പങ്കെടുക്കണം. ഫോണ്‍- 04935-299424 .
ചര്‍ച്ച വിജയത്തിലേക്കോ? ഇറാനുമായുള്ള യുദ്ധം ഫലത്തില്‍ അവസാനിച്ചെന്ന് ഡോണള്‍ഡ് ട്രംപ്
തെഹ്‌റാന്‍: ഇറാനെതിരായ യുദ്ധം അവസാനിപ്പിക്കുന്നതിലേക്ക് കാര്യങ്ങള്‍ അനുകൂലമായി നീങ്ങുന്നുണ്ടെന്ന് വ്യക്തമാക്കി യുഎസ് പ്രസിഡന്റ് ഡൊണള്‍ഡ് ട്രംപ്. ഖത്തര്‍ പ്രധാനമന്ത്രിയുമായുള്ള ചര്‍ച്ചകള്‍ക്ക് ശേഷമാണ് പ്രതികരണം. ആക്രമണങ്ങള്‍ വീണ്ടും ഉണ്ടാകാന്‍ സാധ്യത വളരെ കുറവാണെന്നും, സംഘര്‍ഷം ഫലത്തില്‍ അവസാനിച്ചുവെന്നും ട്രംപ് പ്രഖ്യാപിച്ചു. ഇറാനെതിരെ യു എസും ഇസ്രായേലും നടത്തുന്ന യുദ്ധം നയതന്ത്ര ചര്‍ച്ചകളിലൂടെ അവസാനിപ്പിക്കാന്‍ കഴിയുമെന്ന പ്രതീക്ഷ വീണ്ടും ഉയര്‍ന്നതോടെ, എണ്ണ വിലയിലും വലിയ ഇടിവുണ്ടായിട്ടുണ്ട്.ഇത് പണപ്പെരുപ്പത്തെക്കുറിച്ചുള്ള ആശങ്കകള്‍ കുറയ്ക്കുകയും, വാള്‍സ്ട്രീറ്റില്‍ ഓഹരി വിപണിയില്‍ വലിയ മുന്നേറ്റത്തിന് വഴിയൊരുക്കുകയും ചെയ്തു. ഖത്തര്‍ പ്രധാനമന്ത്രി മുഹമ്മദ് ബിന്‍ അബ്ദുല്‍റഹ്‌മാന്‍ അല്‍ താനി വാഷിംഗ്ടണ്‍ ഡിസിയില്‍ വെച്ച് ട്രംപിനെയും യു എസ് വൈസ് പ്രസിഡന്റ് ജെ ഡി വാന്‍സിനെയും കണ്ടിരുന്നു. ഒരു കരാറിലെത്തുന്നതിനും മേഖലയില്‍ സമാധാനം കൊണ്ടുവരുന്നതിനുമുള്ള അനുകൂലമായ ചര്‍ച്ചകള്‍ നടന്നതായി അദ്ദേഹം അറിയിച്ചു. അതേസമയം ഇറാന്‍ മുന്നോട്ടുവെച്ച ഏഴ് നിബന്ധനകള്‍ക്ക് മുന്നില്‍ യു എസ് കീഴടങ്ങണമെന്ന് ഇറാനിലെ ഉന്നത സുരക്ഷാ ഉദ്യോഗസ്ഥനായ മൊഹ്സെന്‍ റെസായി ആവശ്യപ്പെട്ടു. സാങ്കല്‍പ്പിക ചര്‍ച്ചകളെക്കുറിച്ച് യു എസ് വ്യാജ വാര്‍ത്തകള്‍ പ്രചരിപ്പിക്കുകയാണെന്നും അദ്ദേഹം ആരോപിച്ചു.
അമേരിക്ക ഇല്ലായിരുന്നെങ്കിൽ ഇസ്രയേൽ ഇന്നുണ്ടാകില്ല'; ഇറാൻ യുദ്ധച്ചെലവ് ഇസ്രായേൽ തിരികെ നൽകണമെന്ന് ട്രംപ്
വാഷിംഗ്ടൺ: ഇറാൻ യുദ്ധകാലത്ത് അമേരിക്ക സംരക്ഷണം നൽകിയ ഇസ്രയേൽ ഉൾപ്പെടെയുള്ള സഖ്യ രാജ്യങ്ങൾ യുദ്ധച്ചെലവുകൾ പൂർണ്ണമായും തിരികെ നൽകണമെന്ന് യുഎസ് പ്രസിഡന്റ് ഡൊണാൾഡ് ട്രംപ്. യുദ്ധത്തിനായി അമേരിക്ക ചെലവാക്കിയ വലിയ തുക ഈ രാജ്യങ്ങളിൽ നിന്ന് ഈടാക്കുമെന്നും അദ്ദേഹം വ്യക്തമാക്കി. യുദ്ധച്ചെലവുകളെച്ചൊല്ലി അമേരിക്കയ്ക്കുള്ളിൽ വലിയ വിമർശനങ്ങൾ ഉയരുന്നതിനിടെയാണ് സഖ്യരാജ്യങ്ങൾ പണം നൽകണമെന്ന ട്രംപിന്റെ പുതിയ ആവശ്യം. ഞായറാഴ്ച സംപ്രേഷണം ചെയ്ത സിബിഎസ് ന്യൂസിന്റെ '60 മിനിറ്റ്സ്' പരിപാടിയിൽ മാധ്യമപ്രവർത്തകൻ റോസ് ഡൗത്താറ്റുമായുള്ള അഭിമുഖത്തിലാണ് ട്രംപ് ഇക്കാര്യങ്ങൾ തുറന്നടിച്ചത്.'യുദ്ധത്തിനായി ഞങ്ങൾക്കുണ്ടായ മുഴുവൻ ചെലവുകളും സംരക്ഷണം ലഭിച്ച രാജ്യങ്ങൾ തിരികെ നൽകും. ആ പണം മുഴുവൻ ഞങ്ങൾ തിരികെ വാങ്ങും' എന്നായിരുന്നു ട്രംപ് പറഞ്ഞു. ഇക്കാര്യം ബന്ധപ്പെട്ട സർക്കാരുകളെ അറിയിച്ചിട്ടുണ്ടെന്നും അവർ അത് പാലിക്കുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേർത്തു. അമേരിക്കൻ സഹായമില്ലായിരുന്നെങ്കിൽ ഇസ്രയേൽ എന്നൊരു രാജ്യം ഇന്ന് നിലനിൽക്കില്ലായിരുന്നുവെന്നും ട്രംപ് ചൂണ്ടിക്കാട്ടി. ഇറാന്റെ ആണവ കേന്ദ്രങ്ങൾക്ക് നേരെ അമേരിക്കൻ ബി-2 ബോംബറുകൾ നടത്തിയ ആക്രമണമാണ് ഇസ്രയേലിനെ രക്ഷിച്ചതെന്നും, ഈ ആക്രമണങ്ങളിലൂടെ ഇറാന്റെ ആണവ ശേഷി പൂർണ്ണമായും തകർത്തുവെന്നും ട്രംപ് വീണ്ടും അവകാശപ്പെട്ടു. ഹോർമുസ് കടലിടുക്കിലെ കപ്പൽ ഗതാഗതത്തിന് സംരക്ഷണം നൽകുന്ന അമേരിക്കൻ സേനയെ പിൻവലിക്കുന്നതിനെക്കുറിച്ചുള്ള ചോദ്യത്തിന്, അത് വലിയ ചെലവുള്ള കാര്യമല്ലെന്നും പണം തിരികെ ലഭിക്കുമെന്നുമായിരുന്നു ട്രംപിൻ്റെ മറുപടി. എന്നാൽ പണം തിരികെ നൽകുന്നതുമായി ബന്ധപ്പെട്ട കരാറുകളോ മറ്റ് തെളിവുകളോ ട്രംപ് നിരത്തിയില്ല. ട്രംപിന്റെ പ്രസ്താവനയോട് വൈറ്റ് ഹൗസ് ഇതുവരെ പ്രതികരിച്ചിട്ടില്ല.
മികച്ച യുവകർഷകനുള്ള പുരസ്കാര ജേതാവ്, ലഹരി കടത്തിയത് വാഴക്കുലയിൽ, സൂക്ഷിച്ചത് പക്ഷിക്കൂട്ടിൽ, ആലുവ എംഡിഎംഎ കേസിൽ കൂടുതൽ വിവരങ്ങൾ പുറത്ത്
എറണാകുളം ആലുവയിൽ 185 ഗ്രാം എംഡിഎംഎ പിടികൂടിയ കേസിലെ പ്രതികൾ ലഹരി കടത്തിയതിന്‍റെയും ഒളിപ്പിക്കുന്നതിന്റെയും കൂടുതൽ വിവരങ്ങൾ പുറത്ത്. വാഴക്കുലയിൽ പൊതിഞ്ഞയക്കുന്ന ലഹരിമരുന്ന് പ്രതികൾ ഒളിപ്പിച്ചിരുന്നത് വീട്ടിലെ പക്ഷിക്കൂട്ടിലായിരുന്നു. പൊലീസെത്തിയാലും ലഹരിമരുന്ന് കണ്ടെത്താതിരിക്കാനാണ് പ്രതികൾ പുതുവഴികൾ കണ്ടെത്തിയത്. പക്ഷികൾക്ക് തീറ്റ നൽകിയിരുന്ന പാത്രത്തിൽ അടക്കം ഇവർ രഹസ്യ അറകൾ സൃഷ്ടിച്ചിരുന്നതായും അന്വേഷണത്തിൽ വ്യക്തമായിട്ടുണ്ട്. ഹരിപ്പാട് സ്വദേശി ധനേഷ്, എറണാകുളം സ്വദേശികളായ ഷിനു, ഹരികൃഷ്ണൻ എന്നിവരാണ് കേസിൽ പിടിയിലായത്.ഇതിൽ ഡാനി എന്ന് വിളിപ്പേരുള്ള ധനേഷ് മികച്ച യുവകർഷകനുള്ള ഹരിപ്പാട് കൃഷിഭവന്റെ പുരസ്കാരം നേടിയ വ്യക്തിയാണ്. പൊലീസ് എത്തിയാലും കണ്ടെത്തുക പ്രയാസമെന്നതിനാലാണ് ഇതരസംസ്ഥാനത്ത് നിന്നെത്തിക്കുന്ന ലഹരി പ്രതികൾ വീട്ടിലെ പക്ഷിക്കൂട്ടിൽ സൂക്ഷിച്ചിരുന്നത്. മുഖ്യപ്രതി ധനേഷിന് നൈജീരിയൻ സംഘങ്ങളുമായി അടുത്തബന്ധമെന്നാണ് പൊലീസ് വ്യക്തമാക്കുന്നത്. കേസിൽ ഇതുവരെ പിടിയിലായത് മൂന്നുപേർ. സംസ്ഥാനത്ത് ലഹരി മരുന്നിനെതിരെ ഓപ്പറേഷൻ തൂഫാൻ ശക്തമായി മുന്നോട്ട് പോവുന്നതിനിടയിലാണ് ഈ അറസ്റ്റ്. പൊലീസിനേയും എക്സൈസിനേയും വെട്ടിക്കാൻ ലഹരി കടത്തുകാർ എത് മാർഗവും സ്വീകരിക്കുന്നുവെന്നതിന്റെ സൂചനയാണ് പുറത്ത് വന്ന സംഭവം.
ഡ്രോപ്പ്ഔട്ട് വിമുക്ത വിദ്യാലയം: പരിഹാരമാർഗങ്ങളും തുടർപ്രവർത്തനങ്ങളും ചർച്ച ചെയ്തു
കോട്ടത്തറ: സെന്റ് ആന്റണീസ് യു.പി. സ്കൂൾ കോട്ടത്തറയുടെ നേതൃത്വത്തിൽ 'ഡ്രോപ്പ്ഔട്ട് വിമുക്ത വിദ്യാലയം – പരിഹാരമാർഗങ്ങളും തുടർപ്രവർത്തനങ്ങളും' എന്ന വിഷയത്തിൽ ചർച്ച സംഘടിപ്പിച്ചു. വെങ്ങപ്പള്ളി ഗ്രാമപഞ്ചായത്ത് സ്റ്റാൻഡിങ് കമ്മിറ്റി ചെയർമാൻ രാമൻ ചർച്ചയ്ക്ക് നേതൃത്വം നൽകി. പി.ടി.എ. പ്രസിഡന്റ് വിൽസൺ പാറയിൽ അധ്യക്ഷത വഹിച്ചു.ഗോത്രവിഭാഗത്തിൽപ്പെട്ട കുട്ടികളുടെ വിദ്യാഭ്യാസ പുരോഗതി ലക്ഷ്യമിട്ട് വൈവിധ്യമാർന്ന പ്രവർത്തനങ്ങൾ സംഘടിപ്പിക്കുന്നതിനെക്കുറിച്ച് യോഗത്തിൽ വിശദമായ ചർച്ച നടന്നു. കുട്ടികളുടെ പഠനപങ്കാളിത്തം ഉറപ്പാക്കുന്നതിനും വിദ്യാലയവുമായി കൂടുതൽ അടുപ്പിക്കുന്നതിനുമായി നിരവധി ആശയങ്ങൾ ഉയർന്നുവന്നു. ഇതിന്റെ ഭാഗമായി എല്ലാവരെയും ഒരുമിച്ചുചേർക്കുന്ന ഗോത്ര ഫെസ്റ്റ് നവംബർ 24-ന് സ്കൂളിൽ സംഘടിപ്പിക്കാൻ യോഗം തീരുമാനിച്ചു.വെങ്ങപ്പള്ളി ഗ്രാമപഞ്ചായത്ത് TEO അനിൽകുമാർ, വാർഡ് മെമ്പർമാരായ മിഥില എം.കെ., ഷമീറ, നിതിൻ ഒ.ബി., വിവിധ ഉന്നതികളിലെ പ്രമോട്ടർമാർ, JHI രാജേഷ് എം.പി., പി.ടി.എ. എക്സിക്യൂട്ടീവ് അംഗങ്ങൾ, രക്ഷിതാക്കൾ, അധ്യാപകർ എന്നിവർ ചർച്ചയിൽ പങ്കെടുത്തു.സ്കൂൾ ഹെഡ്മിസ്ട്രസ് ലിസി ടി.ജെ. സ്വാഗതവും സ്റ്റാഫ് സെക്രട്ടറി വിനീത ജോസഫ് നന്ദിയും പറഞ്ഞു.
സംസ്ഥാന സ്പെഷ്യൽ സ്കൂൾ കലോത്സവം; ഹൈസ്കൂൾ വിഭാഗം സംഘനൃത്തം ഒന്നാം സ്ഥാനം വയനാടിന്
ബത്തേരി : 27-ാമത് സംസ്ഥാന സ്പെഷ്യൽ സ്കൂൾ കലോത്സവത്തിൽ വയനാട് ജില്ലയ്ക്ക് അഭിമാനനേട്ടം. സുൽത്താൻ ബത്തേരി സെന്റ് റോസല്ലോ സ്പീച്ച് ആൻഡ് ഹിയറിംഗ് സ്കൂളിലെ വിദ്യാർത്ഥികളാണ് സംഘനൃത്തത്തിൽ മികച്ച പ്രകടനം കാഴ്ചവെച്ച് ഹൈസ്കൂൾ വിഭാഗത്തിൽ ഒന്നാം സ്ഥാനം കരസ്ഥമാക്കിയത്.കുട്ടികളെ സംസ്ഥാനതല മത്സരത്തിന് പ്രാപ്തരാക്കുന്നതിൽ എചോം സ്വദേശിയായ ഡാൻസ് ടീച്ചർ നിമിത എൻ.കെ.യുടെ പരിശീലനവും കഠിനാധ്വാനവും നിർണായകമായി.ഇതോടൊപ്പം നിമിത എൻ.കെ പരിശീലിപ്പിച്ച നാടോടിനൃത്തത്തിൽ ഹൈസ്കൂൾ വിഭാഗത്തിൽ ഒന്നാം സ്ഥാനവും ഹയർ സെക്കൻഡറി വിഭാഗത്തിൽ രണ്ടാം സ്ഥാനവും കരസ്ഥമാക്കാൻ സാധിച്ചു. ഈ നേട്ടം സ്കൂളിനും വയനാട് ജില്ലയ്ക്കും അഭിമാനമായി.
ജില്ലാ ശാസ്ത്രമേളയിൽ തുടർച്ചയായി രണ്ടാം തവണയും ഒന്നാം സ്ഥാനം നേടി ജിഷ ഇ.എസ്
ജില്ലാ ശാസ്ത്രമേളയിൽ യു.പി വിഭാഗം അധ്യാപകർക്കായുള്ള ടീച്ചിംഗ് എയ്ഡ് നിർമ്മാണ മത്സരത്തിൽ ഗണിത ശാസ്ത്ര വിഭാഗത്തിൽ സെന്റ് ആന്റണീസ് യു.പി. സ്കൂൾ കോട്ടത്തറയിലെ അധ്യാപിക ജിഷ ഇ.എസ്. ഒന്നാം സ്ഥാനം നേടി.തുടർച്ചയായി രണ്ടാം തവണയാണ് ഈ നേട്ടം സ്വന്തമാക്കുന്നത്. ഗണിതപഠനം കൂടുതൽ ലളിതവും ആകർഷകവുമാക്കുന്നതിനായി തയ്യാറാക്കിയ പഠനോപകരണങ്ങളാണ് ഈ വിജയത്തിന് വഴിയൊരുക്കിയത്.
പ്രവാസി കോൺഗ്രസ് നൂൽപുഴ മണ്ഡലയോഗം നടത്തി
പ്രവാസി കോൺഗ്രസ് ജില്ല പ്രസിഡന്റ് സജി മണ്ഡലത്തിൽ ഉദ്ഘാടനം നിർവഹിച്ചു.പ്രവാസി കോൺഗ്രസ് ബത്തേരി ബ്ലോക്ക് പ്രസിഡന്റ് അബ്ദുൽ റഷീദ് അധ്യക്ഷത വഹിച്ചു. ചടങ്ങിൽ മുടങ്ങിക്കിടക്കുന്ന ക്ഷേമ പെൻഷൻ കൃത്യമായി വിതരണം ചെയ്യണമെന്ന് യോഗം ആവശ്യപ്പെട്ടു. പ്രവാസി കോൺഗ്രസ് നൂൽപുഴ മണ്ഡലം ഭാരവാഹികൾ രാജീവൻ കലൂർ(പ്രസിഡന്റ്), അലി അക്ബർ കെ. സി(ജനറൽ സെക്രട്ടറി),വത്സരാജ് എം. കെ(ട്രഷറര്‍) എന്നിവരെ തിരഞ്ഞെടുത്തു.മറ്റ് ഭാരവാഹികൾ വൈസ് പ്രസിഡന്റ്‌മാരായി ആലി കലൂരിനെയും, കാസിം കെ. സിയേയും, ജോയിന്റ് സെക്രട്ടറിമാരായി ബഷീർ വി. സി, അബ്ദുൽ മജീദ് എന്നിവരെയും എക്‌സിക്യുട്ടീവ് അംഗങ്ങളായി അലി വി. സി, സലീം കലൂർ, രാജു കെ. എസ്, ബൈജു വി.ടി എന്നിവരെയും തിരഞ്ഞെടുത്തു
വയനാട്ടിൽ വിമാനത്താവളവും റെയിൽ പാതയും വേണം:ആർ. എസ്.പി
വയനാടിൻ്റെ വികസനത്തിനും ഗതാഗതകുരുക്കിനും ശാശ്വത പരിഹാരമായി റെയിൽ പാതയും വിമാനതാവളവും നിർമ്മിച്ച് പരിഹാരം കാണണമെന്ന് ആർ.എസ് പി കൽപ്പറ്റ ലോക്കൽ സമ്മേളനം ആവശ്യപ്പെട്ടു.ആർ.എസ്.പി ജില്ലാ സെക്രട്ടറി പ്രവീൺ തങ്കപ്പൻ സമ്മേളനം ഉദ്ഘാടനം ചെയ്തു. കൽപ്പറ്റ മണ്ഡലം സെക്രട്ടറി കുഞ്ഞിമുഹമ്മദ് കൈതപ്പള്ളി അദ്ധ്യക്ഷത വഹിച്ചു. ജില്ലാ കമ്മറ്റി അംഗങ്ങളായ മനു മാനന്തവാടി, അഷ്‌റഫ് പിണങ്ങോട് , എം.കെ രാമകൃഷ്ണൻ വി വി പ്രകാശൻ , സി . എം ബാലൻ എന്നിവർ പ്രസംഗിച്ചു കൽപ്പറ്റ മണ്ഡലം കമ്മറ്റി അംഗം ഹനീഫ വെള്ളാരംകുന്ന് സ്വാഗതം പറഞ്ഞ ചടങ്ങിന് പ്രസാദ് മാളിയേക്കൽ നന്ദി പ്രകാശിപ്പിച്ചു.കൽപ്പറ്റ ലോക്കൽ സെക്രട്ടറിയായി എം പ്രസാദിനെ തിരത്തെടുത്തു
വയനാടിന്റെ സമഗ്ര വികസനത്തിന് ടൂറിസം രംഗത്ത് വിവിധ പദ്ധതികൾ ആവിഷ്കരിക്കണം : ഗവ: ചീഫ് വിപ്പ് അപൂ ജോൺ ജോസഫ്
കാലാവസ്ഥ വ്യതിയാനം, വന്യമൃഗങ്ങളുടെ ശല്യം , വിവിധ രോഗങ്ങൾ കാർഷിക ഉത്പന്നങ്ങളുടെ വിലയിടിവ്, എന്നിവ മൂലം തകർച്ച നേരിടുന്ന വയനാടിന്റെ ഭാവി വികസനത്തിന് ടൂറിസം രംഗത്ത് സമഗ്ര പദ്ധതികൾ ആവിഷ്കരിക്കണമെന്ന് അദ്ദേഹം ആവശ്യപ്പെട്ടു.വയനാടിന്റെ വികസനത്തിന് ടൂറിസം രംഗത്ത് വമ്പിച്ച പുരോഗതി ആവശ്യമാണെന്ന് അദ്ദേഹം ചൂണ്ടിക്കാട്ടി. വയനാട്ടിലേക്കുള്ള ബദൽ പാതകൾ, തുരംഗ പാത, പടിഞ്ഞാറത്തറ പൂഴിത്തോട് ബദൽ റോഡ്, മൈസൂർ പുറക്കാട്ടിരി ദേശീയപാത, നിർദിഷ്ട നിലമ്പൂർ നഞ്ചങ്ങോട് റെയിൽവേ, അടുത്തകാലത്ത് ഇ ശ്രീധരൻ നിർദ്ദേശിച്ച കോഴിക്കോട് ബത്തേരി അതിവേഗ റെയിൽവേ, എന്നിവ യാഥാർത്ഥ്യമാക്കുവാൻ കർമ്മപദ്ധതികൾക്ക് രൂപം കൊടുക്കണമെന്നും അദ്ദേഹം സൂചിപ്പിച്ചു.കർഷകർക്ക് ഇ എസ് എ വിഷയത്തിൽ ആശങ്ക വേണ്ടെന്നും ജനവാസ മേഖലയെ പൂർണമായും E S A യിൽ നിന്ന് ഒഴിവാക്കി കർഷകർക്ക് സംരക്ഷണം നൽകുവാൻ ഈ ഗവൺമെൻറ് പ്രതിജ്ഞാബദ്ധമാണെന്നും അദ്ദേഹം പറഞ്ഞു.കേരള കോൺഗ്രസ് കൽപ്പറ്റ നിയോജക മണ്ഡലം കൺവെൻഷൻ ഹോളിഡേ ഓഡിറ്റോറിയത്തിൽ ഉദ്ഘാടനം ചെയ്തുകൊണ്ട് പ്രസംഗിക്കുകയായിരുന്നു അദ്ദേഹം. കൺവെൻഷനിൽ നിയോജക മണ്ഡലം പ്രസിഡൻറ് പി കെ രാജൻ അധ്യക്ഷത വഹിച്ചു . വയനാട് ജില്ലാ പ്രസിഡണ്ട് ജോസഫ് കളപ്പുര, കോഴിക്കോട് ജില്ല പ്രസിഡന്റ് പി എം ജോർജ്, കണ്ണൂർ ജില്ലാ പ്രസിഡണ്ട് റോജസ് സെബാസ്റ്റ്യൻ, തിരുവനന്തപുരം ജില്ലാ പ്രസിഡണ്ട് ജോണി ചക്കിട്ട , പാർട്ടി ഉന്നത അധികാര സമിതി അംഗം കെ. എ ആന്റണി, കെ.ജി റോബർട്ട് , ജിതേഷ് കുര്യാക്കോസ്, സണ്ണി കടവൻ , പി.കെ. രവി , അഗസ്റ്റ്യൻ മറ്റക്കാട്ടിൽ, അഡ്വ: ജോർജ് വാത്തുപറമ്പിൽ, കെ എസ് രവീന്ദ്രൻ. സച്ചിൻ സുനിൽ ഷാൻ്റി നടവയൽതുടങ്ങിയവർ സംസാരിച്ചു.ചീഫ് വിപ്പായതിനുശേഷം ആദ്യമായി വയനാട്ടിലെത്തിയ അദ്ദേഹത്തിന് ഊഷ്‌മളമായ സ്വീകരണം നൽകി.
കൽപ്പറ്റ വൈ.എം.സി.എയിൽ അഖിലലോക പ്രാർത്ഥനാവാരത്തിന് തുടക്കമായി
വൈ.എം.സി.എയുടെ നേതൃത്വത്തിൽ സംഘടിപ്പിക്കുന്ന അഖിലലോക പ്രാർത്ഥനാവാരത്തിന് കൽപ്പറ്റ വൈ.എം.സി.എയിൽ തുടക്കമായി. നവംബർ 8 മുതൽ 14 വരെ ഒരാഴ്ച നീണ്ടുനിൽക്കുന്ന പ്രാർത്ഥനാവാരം "ഇത്തരമൊരു കാലഘട്ടത്തിനായി നാം വിളിക്കപ്പെട്ടിരിക്കുന്നത്" (Called for Such a Time as This) എന്ന പ്രമേയത്തെ ആസ്പദമാക്കിയാണ് സംഘടിപ്പിക്കുന്നത്.പ്രാർത്ഥനാവാരത്തിന്റെ ഔദ്യോഗിക ഉദ്ഘാടനം ഫാ. ഫ്രാൻസൺ ചേരമാൻകുന്നേൽ മാനേജർ ചുണ്ടേൽ എസ്റ്റേറ്റ് നിർവഹിച്ചു. തുടർന്ന് അദ്ദേഹം വചനസന്ദേശം നൽകി. എസ്ഥേർ 4:14-നെ അടിസ്ഥാനമാക്കിയുള്ള ഈ വർഷത്തെ പ്രമേയം, സമകാലിക സമൂഹത്തിലെ വെല്ലുവിളികൾ തിരിച്ചറിഞ്ഞ് ദൈവം ഏൽപ്പിച്ച ഉത്തരവാദിത്വങ്ങൾ ധൈര്യത്തോടെയും കരുണയോടെയും നിർവഹിക്കാൻ ഓരോരുത്തരും മുന്നോട്ടുവരണമെന്ന സന്ദേശമാണ് നൽകുന്നത്.പ്രാർത്ഥന കേവലം വാക്കുകളിലും ആരാധനാ സമ്മേളനങ്ങളിലും ഒതുങ്ങാതെ ജീവിതത്തിലും പ്രവർത്തനങ്ങളിലും പ്രതിഫലിക്കണമെന്നും വിശ്വാസത്തിൽനിന്ന് സേവനത്തിലേക്കും സാമൂഹിക ഉത്തരവാദിത്വത്തിലേക്കും വളരണമെന്നും പ്രാർത്ഥനാവാരത്തിന്റെ സന്ദേശം ഓർമ്മിപ്പിക്കുന്നു. നീതി, സമാധാനം, മനുഷ്യാന്തസ്സ്, യുവജനങ്ങളുടെ ഉന്നമനം, സാമൂഹിക ഐക്യം എന്നിവയ്ക്കായി പ്രവർത്തിക്കേണ്ടതിന്റെ പ്രാധാന്യവും ഈ പ്രമേയം ഉയർത്തിക്കാട്ടുന്നു.കൽപ്പറ്റ വൈ.എം.സി.എ പ്രസിഡന്റ് പ്രൊഫ. സിബി ജോസഫ് ചടങ്ങിൽ അധ്യക്ഷത വഹിച്ചു. പ്രോഗ്രാം കോർഡിനേറ്റർ ശ്രീ കെ ഐ വർഗീസ് സ്വാഗതവും, വൈ.എം.സി.എ സെക്രട്ടറി സി.എച്ച്. സ്റ്റാൻലി നന്ദിയും, വൈ.എം.സി.എ അംഗങ്ങളായ ജോണി പാറ്റാനി, ഡോ. വി എം ജോസ്, ജൂലി സിബി, സൂസൻ വർഗീസ് തുടങ്ങിയവർ ആശംസകൾ അർപ്പിച്ച് സംസാരിച്ചു.നവംബർ 14 വരെ നീണ്ടുനിൽക്കുന്ന പ്രാർത്ഥനാവാരത്തിൽ പ്രമേയാധിഷ്ഠിതമായ വചനചിന്തകളും പ്രാർത്ഥനകളും ആത്മീയ കൂട്ടായ്മകളും സംഘടിപ്പിക്കും.
കൽപ്പറ്റ ടൗൺ എൻ.എസ്.എസ് കരയോഗം കുടുംബ സംഗമം നടത്തി
കൽപ്പറ്റ എൻ.എസ്.എസ് ഹയർ സെക്കഡറി സ്കൂളിൽ വൈത്തിരി താലൂക്ക് എൻ.എസ്.എസ് യൂണിയൻ പ്രസിഡൻറ് പി.കെ സുധാകരൻ നായർ ഉദ്ഘാടനം നിർവഹിച്ചു തളിപറമ്പ് എൻ.എസ്.എസ് താലൂക്ക് യൂണിയൻ പ്രസിഡൻ്റ് അഡ്വക്കറ്റ് ശ്രീ എം.എം.ഷിജിത്ത് മുഖ്യ പ്രഭാഷണം നടത്തി. പരിപാടിയിൽ എം.സി ജയന്ദ്രൻ മാസ്റ്റർ അധ്യക്ഷനും ലോകേഷ് കെ.ആർ സ്വാഗതവും, വൈത്തിരി താലൂക്ക് എൻ.എസ് എസ് വനിത യൂണിയൻ പ്രസിഡൻറ് എ.പി സവിത, ബിന്ദു സുരേഷ് , വനിതാ യൂണിയൻ സെക്രട്ടറി ,വൈത്തിരി താലൂക്ക് എൻ.എസ്.എസ് യൂണിയൻ അംഗം ബാബുരാജ്. പി., കരയോഗാംഗം സദാശിവൻ കെ എന്നീവർ ആശംസകൾ നേർന്നു. മുരളിധരൻ മക്കോളി വൈത്തിരി താലുക്ക് എൻ.എസ്.എസ് യൂണിയൻ വൈസ് പ്രസിഡൻറ് മുതിർന്ന അംഗങ്ങളെ ഷാളാണിയിച്ച് ആദരിച്ചു. ഉന്നത വിജയം കൈവരിച്ച കുട്ടികളെയും അനുമോദിച്ചു. വൈത്തിരി താലുക്ക് എൻ.എസ് എസ് യൂണിയൻ സെക്രട്ടറി ശ്രീ ഉണ്ണികൃഷ്ണൻ സംഘടന പ്രവർത്തനങ്ങൾ വിശദികരിച്ചു.വിവിധ കലാപരിപാടികളോടെ സംഗമം അവസനിച്ചു കൃഷ്ണ വേണി നന്ദിയും രേഖപ്പെടുത്തി.
അപേക്ഷ തിയതി ദീര്‍ഘിപ്പിച്ചു
ദേശീയ ആരോഗ്യ ദൗത്യത്തിന് കീഴിലെ വിവിധ തസ്തികകളിലേക്ക് ഓണ്‍ലൈനായി അപേക്ഷിക്കാനുള്ള അവസാന തിയതി നവംബര്‍ 14 വൈകിട്ട് അഞ്ച് വരെ ദീര്‍ഘിപ്പിച്ചു. സ്റ്റാഫ് നഴ്‌സ്, എം.എല്‍.എസ്.പി, ജെ.എച്ച്.ഐ, ഡെന്റല്‍ ഹൈജീനിസ്റ്റ്, ഡയറ്റീഷ്യന്‍, ഡെവലപ്മെന്റല്‍ തെറാപ്പിസ്റ്റ്, എപ്പിഡെമിയോളജിസ്റ്റ്, കൗണ്‍സലര്‍, ടി.ബി.എച്ച്.വി തസ്തികകളിലേക്കാണ് നിയമനം. ഉദ്യോഗാര്‍ത്ഥികള്‍ www.arogyakeralam.gov.in ലോ, ഔദ്യോഗിക വെബ്‌സൈറ്റ് മുഖേനയോ അപേക്ഷ നല്‍കണം. അപേക്ഷ സമര്‍പ്പിച്ചവര്‍ വീണ്ടും അപേക്ഷിക്കേണ്ടതില്ല. ഫോണ്‍- 04936 202771.
