ജനങ്ങൾക്ക് 'ഷോക്ക്', വൈദ്യുതി നിരക്കും സർചാർജും വർദ്ധിക്കും; പീക്ക് ടൈം മാറും, പുതിയ താരിഫ് നയം വിജ്ഞാപനം ചെയ്ത് റഗുലേറ്ററി കമ്മീഷൻ
വൈദ്യുതി മുടക്കം കൊണ്ട് വലഞ്ഞ ജനങ്ങൾക്ക് വീണ്ടും തിരിച്ചടി. സംസ്ഥാനത്ത് സംസ്ഥാനത്ത് വൈദ്യുതി നിരക്ക് കൂട്ടുന്നു. വൈദ്യുതി നിരക്കിലും സർചാർജുകളിലും വർദ്ധനവിന് കളമൊരുക്കി പുതിയ താരിഫ് നയം ഇലക്ട്രിസിറ്റി റഗുലേറ്ററി കമ്മീഷൻ വിജ്ഞാപനം ചെയ്തു. അടുത്ത അഞ്ച് വർഷത്തേയ്ക്കാണ് പുതിയ നയം നടപ്പിലാക്കുന്നത്. അടുത്ത ഏപ്രിൽ മാസം മുതൽ പ്രാബല്യത്തിൽ വരുന്ന രീതിയിലാണ് നടപ്പാക്കുക.കെ.എസ്.ഇ.ബിയുടെ മുൻകാല നഷ്ടം അയ്യായിരം കോടിയോളം രൂപ വരുമെന്നാണ് കണക്കാക്കുന്നത്. ഈ സാമ്പത്തിക ബാധ്യതയും ഹ്രസ്വകാല കരാറുകളിലെ അധിക ബാധ്യതകളും ഉപഭോക്താക്കളെ ബാധിക്കുന്ന തരത്തിലാണ് പുതിയ നയത്തിന്റെ ഘടന. ഇതിന്റെ ഭാഗമായി ഇന്ധന സർചാർജും നിരക്കിൽ ഉൾപ്പെടുത്തും.കൂടാതെ, വൈദ്യുതി ഉപഭോഗത്തിലെ പീക്ക് സമയം മാറ്റാൻ തീരുമാനിച്ചിട്ടുണ്ട്. ഇനി മുതൽ വൈകീട്ട് 6 മണി മുതൽ രാത്രി 11.30 വരെയുള്ള സമയമായിരിക്കും പീക്ക് സമയമായി കണക്കാക്കുക. ഈ സമയങ്ങളിലെ ഉയർന്ന ഉപഭോഗത്തിന് നിരക്കിൽ മാറ്റങ്ങൾ വന്നേക്കാം. പുതിയ താരിഫ് നയം നിലവിൽ വരുന്നതോടെ സാധാരണക്കാരായ വൈദ്യുതി ഉപഭോക്താക്കൾക്ക് മേൽ വലിയ സാമ്പത്തിക ഭാരം ഉണ്ടാകുമെന്നാണ് സൂചന.
തുലാവർഷം കനക്കുന്നു; ഏഴ് ജില്ലകളിൽ ഇന്ന് യെല്ലോ അലർട്ട്, ശക്തമായ കാറ്റിനൊപ്പം ഇടിമിന്നൽ ജാഗ്രത നിർദ്ദേശവും
സംസ്ഥാനത്ത് തുലാവർഷത്തിന്റെ പശ്ചാത്തലത്തിൽ വരും ദിവസങ്ങളിലും മഴ കനക്കുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇന്ന് 7 ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, ഇടുക്കി, എറണാകുളം, മലപ്പുറം, വയനാട്, കണ്ണൂർ ജില്ലകളിലാണ് മഴ മുന്നറിയിപ്പ്. ചൊവ്വാഴ്ച തിരുവനന്തപുരം മുതൽ എറണാകുളം വരെയുള്ള ജില്ലകളിലും ബുധനാഴ്ച തിരുവനന്തപുരം മുതൽ മലപ്പുറം വരെയുള്ള 10 ജില്ലകളിലും വ്യാഴാഴ്ച ഇടുക്കി മുതൽ കണ്ണൂർ വരെയുള്ള ജില്ലകളിലും യെല്ലോ അലർട്ടാണ്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. മഴയ്ക്കൊപ്പം 40 കിലോമീറ്റർ മുതൽ 50 കിലോമീറ്റർ വേഗത്തിലുള്ള കാറ്റിനും വ്യക്തമായ ഇടിമിന്നലും സാധ്യതയുള്ളതിനാൽ അതീവ ജാഗ്രത പാലിക്കണമെന്ന് മുന്നറിയിപ്പുണ്ട്.
ബാലസഭ കുട്ടികളുടെ പോഷകാഹാര മേള സംഘടിപ്പിച്ചു.
വെങ്ങപ്പള്ളി CDS - ന് കീഴിൽ പഞ്ചായത്ത് ഹാളിൽ വെച്ച് കാർബൺ ന്യൂട്രൽ കേരളം എന്ന ആശയം ആസ്പദമാക്കി ബാലസഭ കുട്ടികളുടെ പോഷകാഹാര മേള സംഘടിപ്പിച്ചു. പരിപാടി പഞ്ചായത്ത് പ്രസിഡൻ്റ് ജാസർ പാലക്കൽ ഉദ്ഘാടനം ചെയ്തു. CDS ചെയർപേഴ്സൺ ഷംന പരിപാടിക്ക് അധ്യക്ഷത വഹിച്ചു. പഞ്ചായത്ത് വൈസ് പ്രസിഡൻറ് ഷീജ, ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ മിഥില ,ആരോഗ്യ സ്റ്റാൻ്റിങ് കമ്മിറ്റി ചെയർമാൻ രാമൻ വികസന കാര്യ സ്റ്റാൻഡിങ് കമ്മിറ്റി ചെയർപേഴ്സൺ ഹസീന മെമ്പർമാർ ആയിട്ടുള്ള ഷമീറ ,ശർബിന , വസന്ത ജില്ലാ ആർപി ബബിത, ബാലസഭ RP ധന്യ തുടങ്ങിയവർ സംസാരിച്ചു.
നൂൽപ്പുഴ പഞ്ചായത്തിൽ പ്രത്യേക ഭിന്നശേഷി ഗ്രാമസഭകൾ വിളിച്ചു ചേർക്കുക;DAWF ( ഡിഫ്രന്റിലി ഏബിൾഡ് പേഴ്സൺസ് വെൽഫെയർ ഫെഡറേഷൻ)
നൂൽപ്പുഴ ഗ്രാമപഞ്ചായത്തിലെ മുന്നൂറിൽ അധികം വരുന്ന ഭിന്നശേഷിക്കാരുടെ പ്രശ്നങ്ങൾ ചർച്ച ചെയ്യുന്നതിനും പദ്ധതികൾ ആസൂത്രണം ചെയ്തു നടപ്പിലാക്കുന്നതിനുമായി ഫലപ്രദമായ രീതിയിൽ പ്രത്യേക ഭിന്നശേഷി ഗ്രാമസഭകൾ വിളിച്ചു ചേർക്കുന്നതിന് ബന്ധപ്പെട്ട അധികാരികൾ തയ്യാറാകണമെന്ന് DAWF ( ഡിഫ്രന്റിലി ഏബിൾഡ് പേഴ്സൺസ് വെൽഫെയർ ഫെഡറേഷൻ) നൂൽപുഴ പഞ്ചായത്ത് കൺവെൻഷൻ പ്രമേയത്തിലൂടെ ആവശ്യപ്പെട്ടു.മൂലങ്കാവ് ടി സി ജോൺ സ്മാരക ലൈബ്രറി ഹാളിൽ ചേർന്ന പഞ്ചായത്ത് കൺവെൻഷൻDAWF സംസ്ഥാന ജോയിന്റ് സെക്രട്ടറി കെ വി മോഹനൻ ഉദ്ഘാടനം ചെയ്തു. ജില്ലാ സെക്രട്ടറി കെ എൻ ഇന്ദ്രൻ സംഘടനാ റിപ്പോർട്ട് അവതരിപ്പിച്ചു. ഏരിയ സെക്രട്ടറി കെ പി ജോർജ്ജ് ഭാവി പ്രവർത്തന പരിപാടികൾ വിശദീകരിച്ചു. ഏരിയ പ്രസിഡണ്ട് എം വി വർഗീസിന്റെ അധ്യക്ഷതയിൽ ചേർന്ന കൺവെൻഷനിൽ ജാബിർ ഇ. എ സ്വാഗതവും മെൽവിൻ ജോസഫ് നന്ദിയും പറഞ്ഞു. കാടും വീടും വേർതിരിച്ച് നൂൽപുഴ പഞ്ചായത്തിലെ ജനങ്ങളെ വന്യമൃഗശല്യത്തിൽ നിന്നും രക്ഷിക്കുന്നതിനായുള്ള അടിയന്തിര നടപടികൾ സ്വീകരിക്കുക., ഭൂമിയും വീടും ഇല്ലാത്ത മുഴുവൻ ഭിന്നശേഷിക്കാർക്കും ഭൂമിയും വീടും അനുവദിക്കുക., കെഎസ്ആർടിസി ബസ്സുകളിൽ ഭിന്നശേഷിക്കാരായ എല്ലാവർക്കും യാത്ര സൗകര്യം അനുവദിക്കുക തുടങ്ങിയ പ്രമേയങ്ങളും കൺവെൻഷനിൽ അവതരിപ്പിച്ചു.രാജൻ കെ ( പ്രസിഡണ്ട് ), ജാബിർ ഇ എ( സെക്രട്ടറി), അയ്യപ്പൻ ടി ( വൈസ് പ്രസിഡണ്ട്), മെൽവിൻ ജോസഫ്( ജോയിന്റ് സെക്രട്ടറി ) സെക്കീന പി എസ് ( ട്രഷറർ ) എന്നിവരെ പുതിയ ഭാരവാഹികളായി തിരഞ്ഞെടുത്തു.
പത്ത്‌ പേരായി ചുരുങ്ങിയിട്ടും കാലിക്കറ്റ് കുതിച്ചു, കണ്ണൂര്‍ വാരിയേഴ്‌സിനെ വീഴ്‌ത്തി ടേബിളില്‍ ഒന്നാം സ്ഥാനത്ത്‌
സൂപ്പർ ലീഗ് കേരളയിൽ കാലിക്കറ്റ് എഫ്‌സിയുടെ കുതിപ്പ് തുടരുന്നു. എവേ പോരാട്ടത്തിൽ കണ്ണൂർ വാരിയേഴ്‌സ് എഫ്സിയെ ഏകപക്ഷീയമായ ഒരു ഗോളിന് കീഴടക്കിയ കാലിക്കറ്റ്, നാല് മത്സരങ്ങളിൽനിന്ന് 11 പോയന്റുമായി പട്ടികയുടെ തലപ്പത്ത് തുടരുന്നു. ഒരു മണിക്കൂറോളം പത്തുപേരുമായി കളിച്ചിട്ടും പ്രതിരോധത്തിലെ അച്ചടക്കവും പോരാട്ടവീര്യവും കൈവിടാതെയാണ് കാലിക്കറ്റ് വിജയം പിടിച്ചെടുത്തത്. ഫെഡറിക്കോ ബുവാസോയുടെ ഗോളാണ് മത്സരത്തിൽ നിർണായകമായത്. നാല് മത്സരങ്ങളിൽ ഏഴ് പോയന്റുള്ള കണ്ണൂർ വാരിയേഴ്‌സ് മൂന്നാം സ്ഥാനത്താണ്.ജവഹർ മുനിസിപ്പൽ സ്റ്റേഡിയത്തിൽ കളി താളം പിടിക്കുംമുമ്പേ കാലിക്കറ്റിന് ആദ്യ മാറ്റം വേണ്ടിവന്നു. 11-ാം മിനിറ്റിൽ ഡിഫൻഡർ അലക്സിസ് സോസ പരിക്കേറ്റ് മടങ്ങി. മുഹമ്മദ് റിയാസ് പകരക്കാരനായി ഇറങ്ങി. മാറ്റം കളിയുടെ ഒഴുക്കിനെ ബാധിക്കാതെ കാലിക്കറ്റ് പന്തടക്കത്തിലും സംഘടിത മുന്നേറ്റങ്ങളിലും ശ്രദ്ധ കേന്ദ്രീകരിച്ചു. 15-ാം മിനിറ്റിൽ അതിന്റെ ഫലം കണ്ടു. ബോക്സിന് പുറത്തുനിന്ന് ഫെഡറിക്കോ ബുവാസോ തൊടുത്ത താഴ്ന്ന ഷോട്ട് കണ്ണൂരിന്റെ വലയിൽ. കാലിക്കറ്റ് 1–0ന് മുന്നിൽ.
മുട്ടില്‍ സന്താന ഗോപാല മഹാവിഷ്ണു- വേട്ടക്കരുമന്‍ ക്ഷേത്രത്തിൽ കളമെഴുത്ത് പാട്ടുത്സവം നവംബര്‍ 8ന്
മുട്ടില്‍ :മുട്ടില്‍ സന്താനഗോപാല മഹാവിഷ്ണു- വേട്ടക്കരുമന്‍ ക്ഷേത്രത്തില്‍ കളമെഴുത്ത് പാട്ടുത്സവം നവംബര്‍ 8ന് നടത്തും . ക്ഷേത്രം തന്ത്രി പാടേരി ഇല്ലത്ത് സുനില്‍ നമ്പൂതിരിപ്പാടിന്റെ മുഖ്യകാര്‍മ്മികത്വത്തില്‍ അഷ്ടദ്രവ്യ ഗണപത്തി ഹോമത്തോടെ പാട്ടുത്സവത്തിന് തുടക്കം കുറിച്ചു. കളമെഴുത്ത് പാട്ടുല്‍സവത്തിന്റെ ധനശേഖരണ സമര്‍പ്പണം യു. വൃന്ദാദേവി സത്യശീലനില്‍ നിന്നു ക്ഷേത്ര ഭരണ സമിതി ജോയിന്റ് സെക്രട്ടറി കെ. നാണു ഏറ്റുവാങ്ങി. ക്ഷേത്രം സെക്രട്ടറി കെ. ശശിധരന്‍ നായര്‍, വി. കെ. ഗോപീദാസ്, സുന്ദര്‍രാജ് എടപ്പെട്ടി, ഓ. ശശിധരന്‍ കൊളവല്‍, എം. വിജയകുമാര്‍, കെ. അനില്‍കുമാര്‍, ലീന സി. നായര്‍, എം. നളിനി മഞ്ചരക്കണ്ടി, കെ. ഗംഗാധരന്‍, എം. സുഭദ്രാമ്മ, ആര്‍. ചന്ദ്രശേഖരന്‍, കെ. പ്രദീപ് കുമാര്‍, പി. റീജ അനില്‍കുമാര്‍, പി. പാര്‍വതി, പി. സുരേഷ് ബാബു, കെ. തങ്കം എന്നിവര്‍ സംസാരിച്ചു .
ഗ്യാനേഷ് കുമാറിനെ പുറത്താക്കുക; എസ്‌ഐആർ വോട്ടർപട്ടിക റദ്ദാക്കുക: എസ്ഡിപിഐ
സുൽത്താൻ ബത്തേരി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പുറത്താക്കണമെന്നും എസ്‌ഐആർ പ്രകാരം തയ്യാറാക്കിയ വോട്ടർപട്ടിക റദ്ദാക്കണമെന്നും ആവശ്യപ്പെട്ട് എസ്ഡിപിഐ സുൽത്താൻ ബത്തേരി മണ്ഡലം കമ്മിറ്റി പ്രതിഷേധം സംഘടിപ്പിച്ചു.വോട്ടവകാശം സംരക്ഷിക്കുന്നതിലും തിരഞ്ഞെടുപ്പ് പ്രക്രിയയുടെ സുതാര്യത ഉറപ്പാക്കുന്നതിലും തിരഞ്ഞെടുപ്പ് കമ്മീഷൻ ഉത്തരവാദിത്തം പാലിക്കണമെന്ന് പ്രതിഷേധം ഉദ്ഘാടനം ചെയ്ത എസ്ഡിപിഐ ജില്ലാ വൈസ് പ്രസിഡന്റ് ഇ. ഉസ്മാൻ ആവശ്യപ്പെട്ടു. എസ്‌ഐആർ നടപടികളിലൂടെ വോട്ടർമാർക്ക് അവകാശനിഷേധം ഉണ്ടാകുന്ന സാഹചര്യം അംഗീകരിക്കാനാവില്ലെന്നും ഗ്യാനേഷ് കുമാറിനെ തൽസ്ഥാനത്തുനിന്ന് നീക്കണമെന്നും അദ്ദേഹം പറഞ്ഞു.മണ്ഡലം നേതാക്കളായ അസൈനാർ ആണ്ടൂർ, ഹബീബ്, അബൂബക്കർ മണക്കടവൻ, ജലീൽ ചോലക്കൽ, സാദിഖ് മാണിക്കോത്ത് തുടങ്ങിയവർ പ്രതിഷേധത്തിന് നേതൃത്വം നൽകി.
വയനാട് ദുരന്തബാധിതർക്ക് മലങ്കര ഓർത്തഡോക്സ് സഭയുടെ വീടുകൾ: ആദ്യഘട്ട ശിലാസ്ഥാപനം നിർവഹിച്ചു
വാഴവറ്റ: ചൂരൽമല - മുണ്ടക്കൈ ഉരുൾപൊട്ടൽ ദുരന്തബാധിതർക്കായി സ്വന്തമായി ഭൂമി വാങ്ങി വീടുകൾ നിർമ്മിച്ച് നൽകുന്ന മലങ്കര ഓർത്തഡോക്സ് സുറിയാനി സഭയുടെ പുനരധിവാസ പദ്ധതിക്ക് തുടക്കമായി.ആകെ വിഭാവനം ചെയ്തിട്ടുള്ള 50 വീടുകളിൽ ആദ്യഘട്ടത്തിലെ 13 ഭവനങ്ങളുടെ ശിലാസ്ഥാപനം സഭാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ നിർവ്വഹിച്ചു. ഇതിനോടനുബന്ധിച്ച് നടന്ന പൊതുസമ്മേളനം ബഹു. കൃഷി വകുപ്പ് മന്ത്രി ശ്രീ. ടി. സിദ്ദിഖ് ഉദ്ഘാടനം ചെയ്തു.മെത്രാപ്പോലീത്തമാരായ ഡോ. ഏബ്രഹാം മാർ സെറാഫിം, ഡോ. ഗീവർഗീസ് മാർ ബർന്നബാസ്, സഭാ വൈദിക ട്രസ്റ്റി ഫാ. ഡോ. തോമസ് വർഗീസ് അമയിൽ, അൽമായ ട്രസ്റ്റി റോണി വർഗീസ് ഏബ്രഹാം, അസോസിയേഷൻ സെക്രട്ടറി അഡ്വ. ബിജു ഉമ്മൻ, സുൽത്താൻ ബത്തേരി ഭദ്രാസന സെക്രട്ടറി ഫാ. ബേബി ജോൺ, മേപ്പാടി പഞ്ചായത്ത് പ്രസിഡന്റ് റംല ഹംസ, മറ്റ് തദ്ദേശ സ്വയംഭരണ ജനപ്രതിനിധികൾ, വൈദികർ, ഗുണഭോക്താക്കൾ തുടങ്ങിയവർ പങ്കെടുത്തു. പുനരധിവാസ പദ്ധതിയുടെ രണ്ടാം ഘട്ടമായി വയനാട്ടിൽ ഒരു റിഹാബിലിറ്റേഷൻ സെന്റർ സ്ഥാപിക്കുമെന്നും, പ്രകൃതിദുരന്ത സാദ്ധ്യതയുള്ള മേഖലകളിൽ കഴിയുന്നവർക്ക് മഴക്കാലത്ത് ഇവിടെ സൗജന്യ താമസസൗകര്യം ഒരുക്കുമെന്നും സഭാ അധികൃതർ അറിയിച്ചു.
വയനാട് ജനമൈത്രി പോലീസിന്റെ നേതൃത്വത്തില്‍ നേത്ര പരിശോധന ക്യാമ്പുകള്‍ നടത്തി
കല്‍പ്പറ്റ: വയനാട് ജില്ലാ ജനമൈത്രി പോലീസിന്റെ നേതൃത്വത്തില്‍ പൊതുജനങ്ങള്‍ക്കായി പനമരം ജി.എല്‍.പി സ്‌കൂള്‍ ഓഡിറ്റോറിയം. കേണിച്ചിറ വ്യാപാരി ഭവന്‍, വടുവന്‍ചാല്‍ വാലുമ്മല്‍ കോംപ്ലക്‌സ് എന്നിവിടങ്ങളില്‍ മെഗാ നേത്ര പരിശോധന ക്യാമ്പുകള്‍ സംഘടിപ്പിച്ചു. വയോജന ക്ഷേമ പ്രവര്‍ത്തനങ്ങളുടെ ഭാഗമായ 'പ്രശാന്തി' പദ്ധതിയുമായി ബന്ധപ്പെട്ട് വ്യാപാരി വ്യവസായി ഏകോപന സമിതി, കോയമ്പത്തൂര്‍ അരവിന്ദ കണ്ണാശുപത്രി എന്നിവരുമായി സഹകരിച്ചാണ് ക്യാമ്പുകള്‍ സംഘടിപ്പിച്ചത്. ക്യാമ്പുകൾ പൊതു ജനങ്ങളുടെ സജീവ പങ്കാളിത്തം കൊണ്ട് ശ്രെദ്ധേയമായി.പനമരത്ത് മാനന്തവാടി എം.എല്‍.എ ഉഷാ വിജയൻ ക്യാമ്പ് ഉദ്ഘാടനം ചെയ്തു. പനമരം പോലീസ് സ്റ്റേഷൻ എസ്.എച്ച്.ഒ കെ.എസ്. ജിഷ്ണു അധ്യക്ഷത വഹിച്ചു. ജനമൈത്രി പ്രോജക്ട് ജില്ലാ എ.ഡി.എൻ.ഒ എൻ.കെ. ദാമോദരൻ, കേരളാ വ്യാപാരി വ്യവസായി ഏകോപന സമിതി സെക്രട്ടറി കെ. ഉസ്മാൻ, എം.കെ നാസർ, കെയർവെല്‍ ക്ലിനിക്ക് ഡോ. ചന്ദ്രശേഖരൻ, അരവിന്ദ ഐ കെയർ ഹോസ്പിറ്റൽ ഡോ. ജയകുമാർ, സി.എച്ച് നവാസ്, സുലൈമാൻ ഹാജി, എ.എസ്.ഐ വി.എസ്. സുബീഷ്, സീനിയർ സിവിൽ പോലീസ് ഓഫീസർ ടി.കെ ദീപ, സിവിൽ പോലീസ് ഓഫീസർമാരായ ബഷീർ, ഷൈജൽ, തുടങ്ങിയവർ സംസാരിച്ചു. 400-ഓളം പേർ പങ്കെടുത്തു.കേണിച്ചിറ വ്യാപാര ഭവനിൽ നടന്ന ക്യാമ്പ് കേണിച്ചിറ പോലീസ് സ്റ്റേഷൻ എസ്.എച്ച്.ഓ കെ.സിൻഷ ഉദ്ഘാടനം ചെയ്തു. കേരള വ്യാപാരി വ്യവസായി ഏകോപന സമിതി ജില്ലാ വൈസ് പ്രസിഡണ്ട് രവീന്ദ്രൻ അധ്യക്ഷത വഹിച്ചു. 190-ഓളം ആളുകൾ പങ്കെടുത്തു. സി.പി.ഒ സിയാദ് സൽമാൻ, എം.ആർ. സുരേഷ്ബാബു എന്നിവർ സംസാരിച്ചു.വടുവന്‍ചാലില്‍ കേരള വ്യാപാരി വ്യവസായി ഏകോപന സമിതി ജില്ലാ പ്രസിഡണ്ട് ജോജിന്‍ പി. ജോയി ക്യാമ്പ് ഉദ്ഘാടനം ചെയ്തു. കെ.വി.വി.ഇ.എസ് വടുവഞ്ചാൽ യൂണിറ്റ് പ്രസിഡണ്ട് വി.പി. ഖാദർ അധ്യക്ഷത വഹിച്ചു. മേപ്പാടി പോലീസ് സ്റ്റേഷൻ എസ്.എച്ച്.ഓ ഡി. മിഥുൻ, മുപ്പനാട് പഞ്ചായത്ത് പ്രസിഡണ്ട് വി. കേശവൻ, വി.എൻ. ശശീന്ദ്രൻ, ജോളി സ്കറിയ, ഡോ. അഭിഷേക്, ഡോ. ദ്രുവ്, വി.എൻ ബൈജു, ബാലസുബ്രഹ്മണ്യം, എസ്.സി.പിഓ കമറുദ്ദീൻ വട്ടക്കര തുടങ്ങിയവർ സംസാരിച്ചു. 400-ഓളം പേർ പങ്കെടുത്തു.
കേരള– കർണാടക സംസ്ഥാനങ്ങളെ ബന്ധിപ്പിച്ച് ബൈരക്കുപ്പപാലം; 32 വർഷത്തെ കാത്തിരിപ്പിന് ശേഷം കേന്ദ്രാനുമതി
പുൽപള്ളി ∙ കേരള– കർണാടക സംസ്ഥാനങ്ങളെ ബന്ധിപ്പിച്ച് കബനിക്കുകുറുകെ വിഭാവനംചെയ്ത ബൈരക്കുപ്പപാലം നിർമാണത്തിന് കേന്ദ്രാനുമതിയായി. തറക്കല്ലിട്ടശേഷം 32 വർഷത്തെ കാത്തിരിപ്പിനൊടുവിലാണ് കേന്ദ്ര ഉപരിതല ഗതാഗതവകുപ്പ് പാലം നിർമാണത്തിനു പച്ചക്കൊടി കാണിച്ചത്. കേന്ദ്രത്തിന്റെ സേതുബന്ധൻ പദ്ധതിയിൽ പാലം നിർമാണത്തിന് 27 കോടി രൂപ അനുവദിച്ചു.40 കോടിയുടെ പദ്ധതിയാണ് കേരളസർക്കാർ ആദ്യം കേന്ദ്രത്തിനു സമർപ്പിച്ചത്. എന്നാൽ കഴിഞ്ഞമാസം 8ന് ദേശീയപാതാ വിഭാഗം ചീഫ് എൻജിനീയർ 27 കോടിയുടെ പരിഷ്കരിച്ച പദ്ധതി രൂപരേഖ തയാറാക്കി സമർപ്പിക്കുകയും അതിന് അനുമതി നൽകുകയുമായിരുന്നു. കേന്ദ്ര അടിസ്ഥാന റോഡ് വികസനഫണ്ടിൽനിന്ന് തുക അനുവദിക്കുന്നതിനാൽ അവരുടെ മാർഗനിർദേശങ്ങൾ പാലിച്ച് കേരള സർക്കാരിന്റെ ഉത്തരവാദിത്വത്തിൽ പാലംനിർമാണം നടത്തണമെന്നാണ് നിർദേശം.പാലംനിർമാണത്തിന് കർണാടക സർക്കാരും കേന്ദ്രത്തിന് താൽപര്യപത്രം നൽകിയിരുന്നു. സാമ്പത്തിക ബാധ്യതകളൊന്നും കർണാടകം വഹിക്കില്ല. പാലത്തിന്റെ അപ്രോച്ച്റോഡ് നിർമാണത്തിന് ഇരുഭാഗത്തും വേണ്ടിവരുന്ന സ്ഥലമെടുപ്പ്, നിർമാണം, മേൽനോട്ടം, അറ്റകുറ്റപ്പണികൾ എന്നിവയെല്ലാം കേരളാ മരാമത്ത് വകുപ്പ് വഹിക്കണം. ഈ വ്യവസ്ഥകളെല്ലാം അംഗീകരിച്ചാണ് പാലം നിർമാണവുമായി മരാമത്ത് വകുപ്പ് മുന്നോട്ടുപോകുന്നത്. കബനിക്കുകുറുകെ പാലംനിർമിക്കാൻ 1994 സെപ്റ്റംബർ 24 നാണ് കേരള–കർണാടക മുഖ്യമന്ത്രിമാർചേർന്ന് തറക്കല്ലിട്ടത്. അതിനുശേഷം വിവിധകാരണങ്ങളാൽ നിർമാണം ആരംഭിക്കാനായില്ല. വയനാട് എംപി പ്രിയങ്ക ഗാന്ധി താൽപര്യമെടുത്താണ് പാലംനിർമാണത്തിന് അനുകൂല സാഹചര്യമൊരുക്കിയത്. ഏതാനുംമാസങ്ങൾക്ക് മുൻപ് അവർ പെരിക്കലൂരിലെത്തി സ്ഥലംസന്ദർശിച്ച് കാര്യങ്ങൾ മനസ്സിലാക്കി. പിന്നീട് കേന്ദ്രമന്ത്രി നിതിൻ ഗഡ്കരി, കർണാടക മുഖ്യമന്ത്രി ഡി.കെ.ശിവകുമാർ എന്നിവരെ കണ്ട് പാലം യാഥാർഥ്യമാക്കണമെന്നാവശ്യപ്പെട്ടിരുന്നു. സംസ്ഥാന മരാമത്ത് മന്ത്രി പി.കെ. ബഷീറും ഇക്കാര്യങ്ങളിൽ ഇടപെടൽ ശക്തമാക്കിയിരുന്നു. മരാമത്ത് വകുപ്പ് ചീഫ്എൻജിനീയർ ഉൾപ്പെട്ട സംഘം അടുത്തിടെ പെരിക്കല്ലൂർ സന്ദർശിച്ച് കാര്യങ്ങൾ വിലയിരുത്തി.
മേപ്പാടി താഞ്ഞിലോട് കാറും ഓട്ടോയും കൂട്ടിയിടിച്ചു.
അപകടത്തിൽ പെട്ട ഓട്ടോ വീട്ടുമുറ്റത്തേക്ക് മറിഞ്ഞു. പരിക്കേറ്റവരെ അരപ്പറ്റ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. വൈകിട്ട് നാല് മണിയോടെയായിരുന്നു അപകടം.
മാനന്തവാടിയിൽ കഞ്ചാവുമായി രണ്ടുപേർ പിടിയിൽ
ചൂട്ടക്കടവിൽ കഞ്ചാവ് വിൽപനയ്ക്ക് ശ്രമിച്ച കൊണിയൻമുക്ക് കൂവയിൽ ഹൗസിൽ മുഹമ്മദ് സിയാദ് (19), പാലമുക്ക് സ്വദേശി ഇസ്മയിൽ വീട്ടിൽ ഹനീൽ (19 ) എന്നിവരാണ് പിടിയിലായത്. ഇവരിൽ നിന്ന് 65 ഗ്രാം കഞ്ചാവ് പിടിച്ചെടുത്തു. മാനന്തവാടി പോലീസ് സ്റ്റേഷൻ സബ് ഇൻസ്പെക്ടർമാരായ ആനന്ദ് ടി, സുനിൽകുമാർ കെ.എൻ എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. പോലീസ് സംഘത്തിൽ സി.പി.ഒമാരായ സനൂപ്, ജബിൻ ജോയ് എന്നിവരും ഉണ്ടായിരുന്നു
ലഹരിക്കെതിരെ ജാഗ്രതയോടെ പുളിയാർമല
പുളിയാർമല: ലഹരിയുടെ വിപത്തിൽ നിന്നും യുവതലമുറയെ സംരക്ഷിക്കുകയെന്ന ലക്ഷ്യത്തോടെ കൽപ്പറ്റ നഗരസഭ ഏഴാം വാർഡ് ജാഗ്രത സമിതിയുടെ ആഭിമുഖ്യത്തിൽ പുളിയാർമല അംഗൻവാടിയിൽ വച്ച് ലഹരി വിരുദ്ധ ബോധവൽക്കരണ സെമിനാർ സംഘടിപ്പിച്ചു. 'നേർവഴി – യുവത്വത്തെ കാക്കാം, നാടിനെ വീണ്ടെടുക്കാം' എന്ന സന്ദേശമുയർത്തി സംഘടിപ്പിച്ച സെമിനാർ എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി. സജിത്ത്കുമാർ അച്ചൂരാനം ഉദ്ഘാടനം ചെയ്ത് ക്ലാസ് നയിച്ചു. പുതുതലമുറയെ വഴിതെറ്റിക്കുന്ന ലഹരി മാഫിയകളെ പ്രതിരോധിക്കാൻ കുടുംബങ്ങളും പ്രാദേശിക ജാഗ്രതാ സമിതികളും ഒരുമിച്ച് കൈകോർക്കേണ്ടതുണ്ടെന്ന് അദ്ദേഹം ഓർമ്മിപ്പിച്ചു.ചടങ്ങിൽ വാർഡ് കൗൺസിലർ ജിതേഷ് വാകയിൽ അധ്യക്ഷത വഹിച്ചു.ജാഗ്രതാ സമിതി അംഗം കെ.ബി.വസന്ത സ്വാഗതം ആശംസിച്ച ചടങ്ങിൽ,കമ്മ്യൂണിറ്റി വിമൻ ഫെസിലിറ്റേറ്റർ സി.വിബിത വാർഡിലെ ജാഗ്രതാ സമിതി പ്രവർത്തനങ്ങളെക്കുറിച്ച് വിശദീകരിച്ചു.ബ്രഹ്മനാഥ പ്രകാശ്, വെള്ളൻ കരടിമണ്ണ്,സി. ശാരിക എന്നിവർ സംസാരിച്ചു. പ്രദേശവാസികളുടെയും കുടുംബശ്രീ പ്രവർത്തകരുടെയും സജീവ പങ്കാളിത്തത്തോടെ നടന്ന ചടങ്ങിൽ അംഗൻവാടി ടീച്ചർ എൻ.ഒ.മീന നന്ദി രേഖപ്പെടുത്തി.
താത്പര്യപത്രം ക്ഷണിച്ചു
ജില്ലാ പഞ്ചായത്തിൻ്റെ 2026-27 വാർഷിക പദ്ധതികളിലെ വിവിധ പദ്ധതികളിൽ ഉൾപ്പെടുത്തി നിർവഹിക്കുന്ന വടുവൻചാൽ ഗവ ഹയർ സെക്കൻഡറി സ്കൂൾ ഓഫീസ് നവീകരണം, അമ്പലവയൽ ഗവ ഹയർ സെക്കൻഡറി സ്കൂൾ- ഓഫീസ് നവീകരണ പ്രവൃത്തികൾ ഏറ്റെടുത്ത് നടത്തുന്നതിന് ഗവ അക്രഡിറ്റഡ് ഏജൻസികളിൽ നിന്നും താത്പര്യപത്രം ക്ഷണിച്ചു. താത്പര്യപത്രം ഒക്ടോബർ 29 ന് ഉച്ചയ്ക്ക് 12 നകം വിദ്യാഭ്യാസ ഉപഡയറക്ടറുടെ ഓഫീസിൽ നൽകണം. ഫോൺ: 04936-202593
അരിവയൽ ഭൂതാനത്ത് പുള്ളിമാനിൻ്റെ ജഡം കണ്ടെത്തി
മീനങ്ങാടി അരിവയൽ ഭൂതാനത്ത് പുള്ളിമാനിന്റെ പാതി ഭക്ഷിച്ച നിലയിലുള്ള ജഡം കണ്ടെത്തി. ഭൂതാനം കരീമിന്റെ കൃഷിയിടത്തിലാണ് ജഡം കണ്ടെത്തിയത്. വന്യജീവിയുടെ ആക്രമണമാണോ മാനിൻ്റെ മരണത്തിന് കാരണമെന്നത് ഇതുവരെ വ്യക്തമായിട്ടില്ല.
ലഹരിക്കെതിരെ കൈകോർത്ത് സൂര്യകാന്തി റസിഡന്റ്സ് അസോസിയേഷൻ
വാവാടി: കോവക്കുനിയിൽ ലഹരിയുടെ വിപത്തിനെതിരെ പ്രതിരോധം തീർക്കുകയെന്ന ലക്ഷ്യത്തോടെ സൂര്യകാന്തി റസിഡന്റ്സ് അസോസിയേഷന്റെ ആഭിമുഖ്യത്തിൽ ലഹരിവിരുദ്ധ ബോധവൽക്കരണ ക്യാമ്പയിനും സെമിനാറും സംഘടിപ്പിച്ചു. ചടങ്ങ് എക്സൈസ് ഇൻസ്പെക്ടർ സൻഫീർ മുഹമ്മദ് ഉദ്ഘാടനം നിർവഹിച്ചു.അസോസിയേഷൻ പ്രസിഡന്റ് വി.എസ്.മോഹൻദാസ് അധ്യക്ഷത വഹിച്ചു.എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി.സജിത്ത്കുമാർ അച്ചൂരാനം ലഹരിവിരുദ്ധ സന്ദേശം നൽകുകയും ബോധവൽക്കരണ സെമിനാർ "മയങ്ങില്ല കേരളം ഉണരുന്ന യുവത്വം" അവതരിപ്പിക്കുകയും ചെയ്തു.സമൂഹത്തിൽ വർദ്ധിച്ചുവരുന്ന ലഹരി ഉപയോഗങ്ങൾക്കെതിരെ കുടുംബങ്ങളും റസിഡന്റ്സ് അസോസിയേഷനുകളും കൃത്യമായ ജാഗ്രത പുലർത്തണമെന്ന് അദ്ദേഹം ആഹ്വാനം ചെയ്തു. വൈത്തിരി അസിസ്റ്റന്റ് സബ് ഇൻസ്പെക്ടർ ഓഫ് പോലീസ് മുരളീധരൻ കെ.പി.മുഖ്യപ്രഭാഷണം നടത്തി.കൽപ്പറ്റ ജനമൈത്രി ബിറ്റ് ഓഫീസർ കെ.വിനോദ് മുഖ്യാതിഥിയായിരുന്നു. അസോസിയേഷൻ ജോയിന്റ് സെക്രട്ടറി അനിൽ കാരാട്ട് സ്വാഗതവും,സെക്രട്ടറി ഇ.എൻ.ദിലീപ് കുമാർ പ്രവർത്തന വിശദീകരണവും നടത്തി. ഡബ്ല്യു.സി.സി.(WCC) പ്രസിഡന്റ് ബിന്ദു മിൽട്ടൺ, കെ.എസ്.ഇ.ബി.ഉദ്യോഗസ്ഥൻ ഹരികുമാർ,എക്സൈസ് പ്രിവൻ്റീവ് ഓഫീസർ പി.വി.രജിത്ത് തുടങ്ങിയവർ സംസാരിച്ചു.ചടങ്ങിൽ ഇൻഷ ഫാത്തിമ പ്രാർത്ഥന ഗാനം ആലപിക്കുകയും ലഹരിവിരുദ്ധ സത്യപ്രതിജ്ഞ ചൊല്ലിക്കൊടുക്കുകയും ചെയ്തു.റസിഡന്റ്സ് അസോസിയേഷൻ ഭാരവാഹികളും കുടുംബാംഗങ്ങളും ചടങ്ങിൽ സജീവമായി പങ്കെടുത്തു.
ടെന്‍ഡര്‍ ക്ഷണിച്ചു.
കല്‍പ്പറ്റ ജനറല്‍ ആശുപത്രിയിലെ പെയിന്‍ ആന്‍ഡ് പാലിയേറ്റീവ് സെക്കന്‍ഡറി യൂണിറ്റിലെ ഹോം കെയര്‍ സേവനത്തിന് വാഹനങ്ങള്‍ വാടകയ്ക്ക് നല്‍കാന്‍ താത്പര്യമുള്ള അംഗീകൃത ഏജന്‍സികള്‍, വാഹന ഉടമകളില്‍ നിന്നും ടെന്‍ഡര്‍ ക്ഷണിച്ചു. ടെന്‍ഡറുകള്‍ ഒക്ടോബര്‍ 23 ന് ഉച്ചയ്ക്ക് ഒന്ന് വരെ സ്വീകരിക്കും. ഫോണ്‍- 04936 206768കല്‍പ്പറ്റ ജനറല്‍ആശുപത്രിയില്‍ മാതൃയാനം പദ്ധതിയിലേക്ക് വാഹനങ്ങള്‍ വാടകയ്ക്ക് നല്‍കാന്‍ താത്പര്യമുള്ള വാഹന ഉടമകള്‍, അംഗീകൃത ഏജന്‍സികളില്‍ നിന്നും ടെന്‍ഡര്‍ ക്ഷണിച്ചു. ടെന്‍ഡറുകള്‍ ഒക്ടോബര്‍ 23 ന് ഉച്ചയ്ക്ക് ഒന്ന് വരെ സ്വീകരിക്കും. ഫോണ്‍- 04936 206768
ടെന്‍ഡര്‍ ക്ഷണിച്ചു.
വനിതാ ശിശു വികസന വകുപ്പിന് കീഴില്‍ പ്രവര്‍ത്തിക്കുന്ന കല്‍പ്പറ്റ അഡീഷണല്‍ ഐ.സി.ഡി.എസ് ഓഫീസ് ആവശ്യങ്ങള്‍ക്ക് കരാര്‍ അടിസ്ഥാനത്തില്‍ വാഹനം വാടകയ്ക്ക് നല്‍കാന്‍ താത്പര്യമുള്ള വാഹന ഉടമകള്‍, സ്ഥാപനങ്ങളില്‍ നിന്നും ടെന്‍ഡര്‍ ക്ഷണിച്ചു. ടെന്‍ഡറുകള്‍ ഒക്ടോബര്‍ 31 ന് ഉച്ചയ്ക്ക് 12 വരെ സ്വീകരിക്കും. ഫോണ്‍- 04936 021110,9446042395.
എം.എല്‍.എ ഫണ്ട് അനുവദിച്ചു
ഐ.സി ബാലകൃഷ്ണന്‍ എം.എല്‍.എയുടെ പ്രത്യേക വികസന നിധിയിലുള്‍പ്പെടുത്തി ചീങ്ങേരി സെന്റ് മേരീസ് എ.യു.പി സ്‌കൂളില്‍ കുഴല്‍ കിണര്‍ അനുബന്ധ പ്രവര്‍ത്തികള്‍ക്കായി മൂന്ന് ലക്ഷം രൂപയുടെ ഭരണാനുമതി ലഭിച്ചു.
കുടുംബശ്രീയില്‍ ഡെപ്യൂട്ടേഷന്‍ നിയമനം
കുടുംബശ്രീയില്‍ ഡെപ്യൂട്ടേഷന്‍ വ്യവസ്ഥയില്‍ ജില്ലാ മിഷന്‍ കോ ഓര്‍ഡിനേറ്റര്‍ (14 ഒഴിവ്), ജില്ലാ മിഷന്‍ അസിസ്റ്റന്റ് കോ ഓര്‍ഡിനേറ്റര്‍ (52 ഒഴിവ്) തസ്തികകളിലെ പ്രതീക്ഷിത ഒഴിവുകളിലേക്ക് അപേക്ഷ ക്ഷണിച്ചു. ഓരോ തസ്തികയ്ക്കും അനുയോജ്യമായ ശമ്പള സ്കെയിലുള്ള സര്‍ക്കാര്‍ ജീവനക്കാര്‍ക്ക് അപേക്ഷിക്കാം. മാതൃവകുപ്പില്‍ നിന്നുള്ള നോ ഒബ്ജക്ഷന്‍ സര്‍ട്ടിഫിക്കറ്റ് സഹിതം നിര്‍ദിഷ്ട മാതൃകയിലുള്ള ഫോമിലാണ് അപേക്ഷിക്കേണ്ടത്. അപേക്ഷകള്‍ എക്സിക്യൂട്ടീവ് ഡയറക്ടര്‍, കുടുംബശ്രീ സംസ്ഥാന ദാരിദ്ര്യ നിര്‍മാര്‍ജന മിഷന്‍, ട്രിഡ ബില്‍ഡിങ്ങ്, ചാലക്കുഴി റോഡ്, മെഡിക്കല്‍ കോളേജ് പി.ഓ, തിരുവനന്തപുരം-695 011 എന്ന വിലാസത്തില്‍ ഒക്ടോബര്‍ 31 നകം അയക്കണം. വിവരങ്ങള്‍ക്ക് www.kudumbashree.org സന്ദര്‍ശിക്കുക
