ഡ്രൈവിംഗ് ലൈസൻസില് മൊബൈല് നമ്പര് അപ്ഡേറ്റ് ചെയ്യാത്തവരുടെ ലൈസൻസ് റദ്ദാക്കുമെന്ന വാര്ത്ത വ്യാജം; അറിയിപ്പുമായി മോട്ടോര് വാഹന വകുപ്പ്
മോട്ടോർ ഡ്രൈവിംഗ് ലൈസൻസില് മൊബൈല് നമ്പർ ലിങ്ക് ചെയ്തില്ലെങ്കില് ലൈസൻസ് റദ്ദാക്കുമെന്ന തരത്തില് സോഷ്യല് മീഡിയകളില് പ്രചരിക്കുന്ന വാർത്തകള് തികച്ചും വ്യാജമാണെന്ന് മോട്ടോർ വാഹന വകുപ്പ് അറിയിച്ചു.2026 സെപ്റ്റംബർ 25-നകം നമ്പർ അപ്ഡേറ്റ് ചെയ്യണമെന്ന തരത്തിലാണ് തെറ്റായ സന്ദേശങ്ങള് പ്രചരിക്കുന്നത്.മോട്ടോർ വാഹന വകുപ്പിന്റെ സേവനങ്ങള് തടസ്സമില്ലാതെ ലഭിക്കുന്നതിന് ലൈസൻസുമായി സ്വന്തം മൊബൈല് നമ്പർ ബന്ധിപ്പിക്കേണ്ടത് അത്യാവശ്യമാണെങ്കിലും, ഇതിനായി യാതൊരുവിധ അവസാന തീയതിയോ സമയപരിധിയോ വകുപ്പ് നിശ്ചയിച്ചിട്ടില്ല. അതിനാല് ഇത്തരം തെറ്റിദ്ധരിപ്പിക്കുന്ന പ്രചരണങ്ങളില് പൊതുജനങ്ങള് ആശങ്കപ്പെടേണ്ടതില്ലെന്ന് അധികൃതർ വ്യക്തമാക്കി.മൊബൈല് നമ്പർ ഓണ്ലൈനായി അപ്ഡേറ്റ് ചെയ്യാം:ഓഫീസുകള് കയറി ഇറങ്ങാതെ തന്നെ ഡ്രൈവിംഗ് ലൈസൻസിലെ മൊബൈല് നമ്പർ പൊതുജനങ്ങള്ക്ക് ഓണ്ലൈനായി മാറ്റാവുന്നതാണ്sarathi.parivahan.gov.in എന്ന ഔദ്യോഗിക വെബ്സൈറ്റ് സന്ദർശിക്കുക.ഹോം പേജിലെ 'Update Mobile Number' എന്ന ഓപ്ഷൻ തിരഞ്ഞെടുത്ത് സ്വന്തമായി നമ്പർ അപ്ഡേറ്റ് ചെയ്യാം.ഓണ്ലൈനായി ചെയ്യാൻ സാധിക്കാത്ത സാഹചര്യത്തില് മാത്രം മോട്ടോർ വാഹന വകുപ്പിന്റെ ഓഫീസുകളുമായി ബന്ധപ്പെട്ടാല് മതിയാകും.വകുപ്പുമായി ബന്ധപ്പെട്ട എല്ലാ ഔദ്യോഗിക വിവരങ്ങള്ക്കും മോട്ടോർ വാഹന വകുപ്പിന്റെ ഔദ്യോഗിക സോഷ്യല് മീഡിയ പേജുകളെയും അറിയിപ്പുകളെയും മാത്രം ആശ്രയിക്കണമെന്നും വ്യാജ വാർത്തകള് പ്രചരിപ്പിക്കരുതെന്നും എം.വി.ഡി അഭ്യർത്ഥിച്ചു.
പ്രായപൂര്ത്തിയാവാത്ത കുട്ടിയെ ലൈംഗികാതിക്രമത്തിനിരയാക്കി ഗര്ഭിണിയാക്കിയ കേസില് യുവാവിന് തടവും പിഴയും
സംഭവശേഷം വിദേശത്തേക്ക് കടന്നു കളഞ്ഞ പ്രതിയെ ലുക്ക് ഔട്ട് സർക്കുലർ പ്രകാരമാണ് പിടികൂടിയത്കല്പ്പറ്റ: പ്രായപൂര്ത്തിയാവാത്ത കുട്ടിയെ ലൈംഗികാതിക്രമത്തിനിരയാക്കി ഗര്ഭിണിയാക്കിയ കേസില് യുവാവിന് 25 വര്ഷം തടവും 1,10,000 രൂപ പിഴയും. നടവയല്, നെല്ലിയമ്പം, കായക്കുന്ന്, കീടക്കാട്ട് വീട്ടില് ഹാഷിക്ക് റഹ്മാനെ(28)യാണ് കല്പ്പറ്റ അഡീ. ഡിസ്ട്രിക്ട് ആന്ഡ് സെഷന്സ് കോടതി(1) ജഡ്ജ് പി. സെയ്തലവി ശിക്ഷിച്ചത്. മീനങ്ങാടി പോലീസ് സ്റ്റേഷനില് 2022 ല് രജിസ്റ്റര് ചെയ്ത കേസിലാണ് ഐ.പി.സി, പോക്സോ നിയമങ്ങളിലെ വിവിധ വകുപ്പുകള് പ്രകാരം ശിക്ഷ വിധിച്ചത്.2021, 2022 വര്ഷങ്ങളിലാണ് ഇയാള് കുട്ടിയെ ലൈംഗികാതിക്രമത്തിനിരയാക്കിയത്. തുടര്ന്ന് കുട്ടി ഗര്ഭിണിയാകുകയും പോലീസ് കേസ് രജിസ്റ്റര് ചെയ്യുകയുമായിരുന്നു. അന്നത്തെ മീനങ്ങാടി ഇന്സ്പെക്ടര് എം. സനല് രാജ് കേസിന്റ ആദ്യാന്വേഷണം നടത്തി വരുന്നതിനിടെ പ്രതി വിദേശത്തേക്ക് കടന്നു കളഞ്ഞു. പോലീസ് ഇയാൾക്കെതിരെ ലുക്ക് ഔട്ട് സർക്കുലർ പുറപ്പെടുവിക്കുകയും 2024 ൽ ഇയാൾ കരിപ്പൂർ വിമാനത്താവളത്തിൽ എത്തിയപ്പോൾ പിടികൂടുകയും ചെയ്തു. അന്നത്തെ ഇന്സ്പെക്ടര് എസ് എച്ച് ഓ എ. സന്തോഷ് കുമാര് കേസിന്റെ തുടരന്വേഷണം നടത്തി കുറ്റപത്രം തയാറാക്കി കോടതിയില് സമര്പ്പിച്ചു. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടര് ടി.ജി. മോഹന്ദാസ് ഹാജരായി.
തളിർ വായനശാല പ്രവർത്തനം ആരംഭിച്ചു
നോർത്ത് വയനാട് വന വികസന ഏജൻസിയുടെ ആഭിമുഖ്യത്തിൽ ചാലിൽ വന സംരക്ഷണ സമിതിയ്ക്കു കീഴിൽ തളിർ വായനശാല പ്രവർത്തനം ആരംഭിച്ചു. നോർത്ത് വയനാട് ഡിവിഷനിലെ മൂന്നാമത്തെ വായനശാലയാണ് ആരംഭിച്ചത്. ഗ്രാമീണ മേഖലയിലും, ആദിവാസി വിഭാഗങ്ങൾക്കിടയിലും വായനാശീലം വർധിപ്പിക്കുക , സാംസ്കാരിക പ്രവർത്തനങ്ങൾക്ക് നേതൃത്വം നൽകുക എന്ന ലക്ഷ്യത്തോടുകൂടി നോർത്ത് വയനാട് എഫ്.ഡി. എ യും ചാലിൽ വി.എസ് എസും സംയുക്തമായാണ് വായനശാല പ്രവർത്തനം ആരംഭിച്ചിട്ടുള്ളത്. വായനശാലയ്ക്ക് ആവശ്യമായിട്ടുള്ള അഞ്ഞൂറ് പുസ്തകങ്ങൾ എറണാകുളം ആസ്ഥാനമായിട്ടുള്ള 'പഞ്ചമി പുസ്തകശാലയും, റോട്ടറി ക്ലബ് കോട്ടയവും ചേർന്നാണ് സൗജന്യമായി നൽകിയത്. വായനശാലയുടെ ഉദ്ഘാടനം തൊണ്ടർനാട് ഗ്രാമപഞ്ചായത്ത് പ്രസിഡൻ്റ് പ്രമോദ് എസ്.എം നിർവ്വഹിച്ചു. 14ാം വാർഡ് മെമ്പർ ആലിക്കുട്ടി ആറങ്ങാടൻ അധ്യക്ഷത വഹിച്ച പരിപാടിയിൽ മാനന്തവാടി റെയ്ഞ്ച് ർഫോ സൂരജ് വേണുഗോപാൽ മുഖ്യ പ്രഭാഷണം നടത്തി. പഞ്ചമി പുസ്തകശാലയ്ക്ക് വേണ്ടി യേശുദാസ് വരാപ്പുഴ , സംസാരിച്ചു. റോട്ടറി ക്ലബ് കോട്ടയത്തിനു വേണ്ടി PP മാത്യു സംസാരിച്ചു. പ്രദേശവാസികളുടെ സഹായത്താൽ പുസ്തക സമാഹരണം നടത്തി കൂടുതൽ പുസ്തകങ്ങൾ വായനാലയ്ക്ക് ലഭ്യമാക്കാനുള്ള പ്രവർത്തനങ്ങൾ ആരംഭിക്കും എന്ന് RFO സൂരജ് വേണുഗോപാൽ പറഞ്ഞു. ഇത്തരത്തിൽ നോർത്ത് വയനാട് എഫ്.ഡി.എ യുടെ കീഴിൽ തളിർ വായനശാല എന്ന പേരിൽ അഞ്ചോളം വായനശാലകൾ ആരംഭിക്കുന്നതിനുള്ള പ്രവർത്തനങ്ങളാണ് നിലവിൽ നടന്നു വരുന്നത്.
കോഫിഗ്രോവേർസ് ജില്ലാ ഓഫീസ് ഉദ്ഘാടനം ചെയ്തു.
കൽപറ്റ : വയനാട് കോഫിഗ്രോവേർസ് അസോസിയേഷൻ്റെയും വയനാട് റോബസ്റ്റ കോഫി പ്രൊഡ്യൂസർ കമ്പനിയുടെയും ഓഫീസ് ഉദ്ഘാടനം ചെയ്തു. കൽപറ്റ മലബാർ ഗോൾഡിന് സമീപമുള്ള പാലുകുന്ന് ബിൽഡിംഗിലാണ് പ്രിൻസിപിൾ കൃഷിഓഫീസർ സീമയും ജില്ലാ വ്യവസായകേന്ദ്രം ജനറൽ മനേജർ ജിഷയും ഓഫിസുകൾ ഉദ്ഘാടനം ചെയ്തത്. അനൂപ് പാലുക്കുന്ന്, അലി ബ്രാൻ ബാപ്പയ്യ ജൈനൻ മോഹൻരവി, അഡ്വ രമണി, സാബു ,ഷിബു ,സജി എന്നിവർ സംസാരിച്ചു.
വി.മൂസക്കോയ മുസ് ലിയാരെ എസ്കെജെഎം അനുമോദിച്ചു
വയനാടിൻ്റെ പണ്ഡിത തറവാട്ടിലെ കാരണവരായ വി മൂസക്കോയ മുസ് ലിയാരെ തേടി സമസ്തയുടെ ഉന്നതമായ ഔദ്യോഗിക പദവിയെത്തിയത് അഭിമാനകരമാണെന്ന് ജില്ലാ ജംഇയ്യത്തുൽ മുഅല്ലിമീൻ കമ്മിറ്റി അഭിപ്രായപ്പെട്ടു. നൂറ് വർഷത്തെ സമസ്തയുടെ ചരിത്രത്തിൽ ഔദ്യോഗിക ഭാരവാഹി സ്ഥാനത്തെത്തുന്ന ആദ്യ ജില്ലക്കാരനായി മൂസക്കോയ മുസ് ലിയാർ. സമസ്ത വൈസ് പ്രസിഡണ്ടായി തെരഞ്ഞെടുക്കപ്പെട്ടതിനെ തുടർന്ന് ജില്ലാ കമ്മിറ്റി ഉള്ളിശ്ശേരിയിലെത്തി മൂസക്കോയ മുസ് ലിയാരെ അനുമോദിക്കുകയും ഉപഹാരം നൽകുകയും ചെയ്തു. ഭാരവാഹികളായ സയ്യിദ് കെ.വി. എസ് തങ്ങൾ , ഹാരിസ് ബാഖവി കമ്പളക്കാട്, പി സൈനുൽ ആബിദ് ദാരിമി, അശ്റഫ് ഫൈസി പനമരം, അബ്ദുൽ മജീദ് അൻസ്വരി, അബ്ദുറസാഖ് ദാരിമി ബീനാച്ചി, ഹാശിം ദാരിമി തരുവണ , ഒ.പി റാശിദ് വാഫി, ജാബിർ ഹൈതമി, ഇസ്മായിൽ ദാരിമി, മുഹമ്മദലി ഗസ്സാലി സംബന്ധിച്ചു.
പഠനമുറിക്ക് അപേക്ഷിക്കാം
പട്ടികജാതി വികസന വകുപ്പ് മുഖേന പട്ടികജാതി വിഭാഗത്തിൽപ്പെട്ട വിദ്യാർഥികൾക്ക് പഠനമുറി നിർമ്മിക്കുന്നതിന് ധന സഹായത്തിനായി അപേക്ഷ ക്ഷണിച്ചു. സർക്കാർ, എയ്ഡഡ്, ടെക്നിക്കൽ, സ്പെഷ്യൽ അല്ലെങ്കിൽ കേന്ദ്രീയ വിദ്യാലയങ്ങളിൽ അഞ്ചാം ക്ലാസ്സ് മുതൽ പ്ലസ് ടു വരെ പഠിക്കുന്ന വിദ്യാർഥികളുടെ രക്ഷിതാക്കൾക്ക് അപേക്ഷിക്കാം. കുടുംബ വാർഷിക വരുമാനം ഒരു ലക്ഷം രൂപയിൽ താഴെയുള്ളവർക്കും 1000 സ്ക്വയർ ഫീറ്റിൽ താഴെ വിസ്തീർണ്ണമുള്ള വീടുകളിൽ താമസിക്കുന്നവർക്കുമാണ് അപേക്ഷിക്കാൻ അർഹതയുള്ളത്. അർഹരായ ഗുണഭോക്താക്കൾ നിർദ്ദിഷ്ട അപേക്ഷയോടൊപ്പം ജാതി സർട്ടിഫിക്കറ്റ്, വരുമാന സർട്ടിഫിക്കറ്റ്, വീടിന്റെ വിസ്തീർണ്ണം തെളിയിക്കുന്ന സാക്ഷ്യപത്രം, വീടിന്റെ ഓണർഷിപ്പ് സർട്ടിഫിക്കറ്റ്, കൈവശരേഖ, റേഷൻ കാർഡ്, ബാങ്ക് പാസ് ബുക്ക്, ആധാർ കാർഡ് എന്നിവയുടെ പകർപ്പ്, ഫോട്ടോ ഉള്പ്പെടെ ഒക്ടോബർ 19 നകം ബന്ധപ്പെട്ട ബ്ലോക്ക് പട്ടികജാതി വികസന ഓഫീസുകളിൽ സമർപ്പിക്കണം. ഫോൺ: 04936-203824.
ലക്ചറർ നിയമനം
മേപ്പാടി ഗവ പോളിടെക്നിക് കോളേജില് ദിവസവേതനാടിസ്ഥാനത്തിൽ കമ്പ്യൂട്ടർ എഞ്ചിനീയറിംഗ് തസ്തികയിലേക്ക് ലക്ചറർ നിയമനം നടത്തുന്നു. ബന്ധപ്പെട്ട വിഷയത്തിൽ ഒന്നാം ക്ലാസ് ബിരുദമാണ് മിനിമം യോഗ്യത. ഉദ്യോഗാർഥികള് അസ്സൽ സർട്ടിഫിക്കറ്റുകളും പകർപ്പും സഹിതം സെപ്റ്റംബര് 26 ന് രാവിലെ 11 ന് പ്രിൻസിപ്പൽ മുമ്പാകെ മത്സര പരീക്ഷക്കും കൂടിക്കാഴ്ചക്കും ഹാജരാകണം. ഫോൺ: 04936282095, 9400006454
താത്ക്കാലിക നിയമനം
പനമരം സാമൂഹിക ആരോഗ്യ കേന്ദ്രത്തിലേക്ക് ഡാറ്റാ എൻട്രി ഓപ്പറേറ്റർ തസ്തികയിൽ ആറ് മാസത്തേക്ക് താത്ക്കാലിക നിയമനം നടത്തുന്നു. ഡിഗ്രി, പി.ജി.ഡി.സി.എ യോഗ്യതയുമുള്ള ഉദ്യോഗാർഥികൾ സര്ട്ടിഫിക്കറ്റുകള് സഹിതം ഒക്ടോബർ ഒന്നിന് രാവിലെ 10.30 ന് പനമരം സാമൂഹിക ആരോഗ്യ കേന്ദ്രം കോൺഫറൻസ് ഹാളിൽ അഭിമുഖത്തിന് എത്തണം. ഫോൺ: 04935 221189
വൈദ്യുതി മുടങ്ങും
വെള്ളമുണ്ട ഇലക്ട്രിക്കൽ സെക്ഷനിലെ നാലാം മൈൽ ടൗൺ, പുളിഞ്ഞാൽ റോഡ് തോട്ടുങ്കൽ ട്രാൻസ്ഫോർമർ പരിധികളില് നാളെ (സെപ്റ്റംബര് 25) രാവിലെ 8.30 മുതൽ 5.30 വരെ വൈദ്യുതി വിതരണം ഭാഗികമായി തടസ്സപ്പെടും.
സീറ്റൊഴിവ്
മീനങ്ങാടി ഗവ. പോളിടെക്നിക് കോളേജിലെ തുടർ വിദ്യാഭ്യാസ കേന്ദ്രത്തിൽ സെപ്റ്റംബറിൽ ആരംഭിച്ച ആറ് മാസം ദൈർഘ്യമുള്ള 'റഫ്രിജറേഷൻ ആൻഡ് എയർ കണ്ടീഷനിങ്' തൊഴിലധിഷ്ഠിത കോഴ്സില് ഒഴിവുള്ള സീറ്റുകളിലേക്ക് അപേക്ഷ ക്ഷണിച്ചു. പത്താം ക്ലാസാണ് യോഗ്യത. ഫോൺ: 9847699720, 8281362097
കുട്ടികളുടെ ബയോഡൈവേഴ്സിറ്റി കോൺഗ്രസ് 26 ന്
വിദ്യാർഥികളിൽ ജൈവവൈവിധ്യ അവബോധം സൃഷ്ടിക്കുന്നതിനായി സംസ്ഥാന ജൈവവൈവിധ്യ ബോർഡ് സംഘടിപ്പിക്കുന്ന ബയോഡൈവേഴ്സിറ്റി കോൺഗ്രസിന്റെ 19 ാമത് പതിപ്പ് സെപ്റ്റംബർ 26 ന് സുൽത്താൻ ബത്തേരി സെന്റ് മേരീസ് കോളേജിൽ നടക്കും. പരിപാടിയുടെ ഭാഗമായി വിദ്യാർഥികൾക്കായി പെൻസിൽ ഡ്രോയിങ്, പെയിന്റിംഗ്, പ്രൊജക്റ്റ് അവതരണം, ഹോം സ്റ്റെഡ് ബയോഡൈവേഴ്സിറ്റി എന്നീ മത്സരങ്ങള് നടത്തും. ജൂനിയർ, സീനിയർ വിഭാഗങ്ങളിലായിരിക്കും മത്സരങ്ങൾ. ജില്ലാതല മത്സര വിജയികൾക്ക് സംസ്ഥാന തലത്തിൽ പങ്കെടുക്കാം. ഫോൺ: 9656863232.
വയനാട് ജില്ലയിലെ ക്വാറികൾ, സാഹസിക ടൂറിസം സെന്ററുകൾ, ട്രക്കിങ് പ്രവർത്തനങ്ങൾ നിർത്തി വെക്കാൻ ഉത്തരവ്
കേന്ദ്ര കാലാവസ്ഥ വകുപ്പ് ജില്ലയിൽ ശക്തമായ മഴ സാധ്യത കണക്കിലെടുത്ത് ജാഗ്രതാ നിർദേശം നൽകിയ സാഹചര്യത്തിൽ പൊതുജനങ്ങളുടെ സുരക്ഷ മുൻനിർത്തി ജില്ലയിലെ ക്വാറികൾ, സാഹസിക വിനോദ സഞ്ചാര കേന്ദ്രങ്ങൾ സ, ട്രക്കിങ് ഉൾപ്പെടെയുള്ള പ്രവർത്തനം നിർത്തിവെക്കാൻ ജില്ലാ ദുരന്ത നിവാരണ അതോറിറ്റി ചെയർപേഴ്സൺ കൂടിയായ ജില്ലാ കളക്ടർ വി. ചെൽസസിനി ഉത്തരവിട്ടു. ജില്ലയിലെ ദുരന്ത സാധ്യത- ദുർബല പ്രദേശങ്ങളിലെ ആളുകളെ മാറ്റിപ്പാർപ്പിക്കേണ്ട സാഹചര്യമുണ്ടെങ്കിൽ അതത് ഗ്രാമ പഞ്ചായത്ത് സെക്രട്ടറിമാർആവശ്യമായ നടപടികൾ സ്വീകരിക്കണം. ടൗൺഷിപ്പ് നിർമ്മാണ പ്രദേശത്ത് മണ്ണൊലിപ്പ് ഭീഷണിയുള്ള ഭാഗത്തെ കുടുംബങ്ങളെ മാറ്റിപ്പാർപ്പിക്കേണ്ട സാഹചര്യം ഉണ്ടെങ്കിൽ കൽപ്പറ്റ നഗരസഭ സെക്രട്ടറി, ടൗൺഷിപ്പ് ചീഫ് ഓപ്പറേറ്റിംഗ് ഓഫീസറുമായി ഏകോപിപ്പിച്ച് ആവശ്യമായ നടപടികൾ സ്വീകരിക്കണം. കള്ളാടി-ആനക്കാംപൊയിൽ തുരങ്ക പാത നിർമ്മാണ പ്രദേശം, മുണ്ടക്കൈ-ചൂരൽമല ദുരന്ത ബാധിത പ്രദേശം, മേപ്പാടി ഗ്രാമപഞ്ചായത്തിൽ ഉരുൾപൊട്ടൽ ഭീഷണിയുള്ള പ്രദേശങ്ങളിലെ ആളുകളെ മാറ്റിപ്പാർപ്പിക്കേണ്ടതുണ്ടെങ്കിൽ മേപ്പാടി ഗ്രാമ പഞ്ചായത്ത് സെക്രട്ടറി ആവശ്യമായ ക്രമീകരണങ്ങൾ സ്വീകരിക്കണമെന്നും ജില്ലാ കളക്ടർ ഉത്തരവിട്ടു. ഉത്തരവ് ലംഘിക്കുന്നവർക്കെതിരെ ദുരന്ത നിവാരണ നിയമം 2005 സെക്ഷൻ 51 (ബി) പ്രകാരം ശിക്ഷാ നടപടികൾ സ്വീകരിക്കുമെന്നും ജില്ലാ കളക്ടർ അറിയിച്ചു.
ലഹരി വിരുദ്ധ റാലിയും തൂഫാൻ കമാൻഡോ പ്രഖ്യാപനവും നടത്തി
പുൽപ്പള്ളി ജയശ്രീ ഹയർ സെക്കണ്ടറി സ്കൂൾ നാഷണൽ സർവീസ് സ്കീം യൂണിറ്റിന്റെ നേതൃത്വത്തിൽ എൻഎസ്എസ് ദിനാചരണത്തോടാനുബന്ധിച്ച് ലഹരി വിരുദ്ധ റാലിയും തൂഫാൻ കമാൻഡോ പ്രഖ്യാപനവും നടത്തി. പുൽപ്പള്ളി ഗ്രാമപഞ്ചായത്ത് മെമ്പർ ബി മിനി ഉദ്ഘാടനം നിർവഹിച്ചു. പ്രിൻസിപ്പൽ കെ ആർ ജയരാജ് അധ്യക്ഷത വഹിച്ചു. പഠനവും ജീവിതവുമാണ് ലഹരി എന്ന വിഷയത്തെ ആസ്പദമാക്കി നടത്തിയ സെമിനാറിൽ പി.ജി ദിനേഷ് കുമാർ ക്ലാസ് എടുത്തു.സ്റ്റാഫ് സെക്രട്ടറി വി.കെ സായൂജ് , അധ്യാപകരായ സ്വപ്ന പീറ്റർ , സിതാര ജോസഫ്,പി.ആർ തൃദീപ് കുമാർ , സബി അഗസ്റ്റിൻ ,എന്നിവർ സംസാരിച്ചു.
ഡിവൈഎഫ്ഐ മെയിൽ അയക്കൽ ക്യാമ്പയിൻ സംഘടുപ്പിച്ചു
വയനാട് ജില്ലയിലെ 13 വില്ലേജുകളെ അതീവ പരിസ്ഥിതി ദുർബല പ്രദേശമായി പ്രഖ്യാപിച്ചു കൊണ്ടുള്ള കേന്ദ്ര വനം പരിസ്ഥിതി മന്ത്രാലയത്തിന്റെ ഉത്തരവിനെതിരെ 13 വില്ലേജ് കേന്ദ്രങ്ങളിലും ഡിവൈഎഫ്ഐ നേതൃത്വത്തിൽ സംഘടിപ്പിക്കുന്ന മെയിൽ അയക്കൽ ക്യാമ്പയിൻ തൃശ്ശിലേരി വില്ലേജ് കേന്ദ്രമായ കാട്ടിക്കുളത്ത് വെച്ച് സംഘടിപ്പിച്ചു.പരിപാടി ജില്ലാ പ്രസിഡന്റ് കെ ആർ ജിതിൻ ഉദ്ഘാടനം നിർവ്വഹിച്ചു.മാനന്തവാടി ബ്ലോക്ക് ജോയിൻ സെക്രട്ടറി ശ്രീജിത്ത് കെ.കെ,തൃശ്ശിലേരി മേഖല സെക്രട്ടറി ധനേഷ്, കാട്ടിക്കുളം മേഖല പ്രസിഡന്റ് ശരൻ,അജേഷ് എന്നിവർ നേതൃത്വം നൽകി.
ക്വട്ടേഷൻ ക്ഷണിച്ചു.
കോട്ടത്തറ കുടുംബാരോഗ്യ കേന്ദ്രത്തിനു കീഴിലെ സ്ഥലങ്ങളിൽ രോഗ പ്രതിരോധ നിയന്ത്രണ പ്രവർത്തനം നടത്തുന്നതിന് വാഹനത്തിന് ക്വട്ടേഷൻ ക്ഷണിച്ചു. 2017 ന് ശേഷമുള്ള സെവൻ സീറ്റർ മോട്ടോർ കാബ്സ് ആയിരിക്കണം വാഹനം. ക്വട്ടേഷനുകൾ മെഡിക്കൽ ഓഫീസർ, കുടുംബാരോഗ്യകേന്ദ്രം, കോട്ടത്തറ, വാളൽ, മാടക്കുന്ന്.പി.ഒ എന്ന വിലാസത്തിൽ സെപ്റ്റംബർ 30 ന് രാവിലെ 11 നകം സമർപ്പിക്കണം. ഫോൺ: 9947657005
റീചാർജ് ചെയ്യുമ്പോൾ കോളും മെസേജും മാത്രം മതിയോ? ;ഡാറ്റ വേണ്ടാത്തവർക്ക് കൂടുതൽ റീചാർജ് ഓപ്ഷനുകൾ
മൊബൈല് റീചാര്ജ് ചെയ്യുമ്പോള് ഇന്റര്നെറ്റ് ഡാറ്റയും കൂടി നിര്ബന്ധമായി ഉള്പ്പെട്ടിരിക്കുന്ന പ്ലാന് തിരഞ്ഞെടുക്കേണ്ട സാഹചര്യം പലര്ക്കുമുണ്ട്. എന്നാല് മൊബൈല് പ്രധാനമായും ഫോണ് വിളികള്ക്കും എസ്എംഎസ് അയക്കാനും മാത്രമായി ഉപയോഗിക്കുന്നവരുണ്ട്. പ്രത്യേകിച്ച് മുതിര്ന്നവരും ഫീച്ചര് ഫോണ് ഉപയോഗിക്കുന്നവരും ഇത്തരക്കാരില്പ്പെടുന്നു. ഉപയോഗിക്കാത്ത ഡാറ്റയ്ക്കും പണം നല്കേണ്ടിവരുന്നത് ഇവര്ക്ക് അധിക ചിലവും കൂടിയാണ്.ഈ സാഹചര്യത്തിലാണ് ടെലികോം റെഗുലേറ്ററി അതോറിറ്റി ഓഫ് ഇന്ത്യ (TRAI) പുതിയ മാറ്റം കൊണ്ടുവന്നിരിക്കുന്നത്. കോളുകളും മെസേജും മാത്രം ലഭിക്കുന്ന റീചാര്ജ് പ്ലാനുകള് കൂടുതല് കാലാവധികളില് ലഭ്യമാക്കണമെന്നാണ് പുതിയ നിയമം. 2026 സെപ്റ്റംബര് 22ന് TRAI പുറത്തിറക്കിയ Telecom Consumer Protection (13th Amendment) Regulatiosn 2026 ആണ് ഇതിന് പിന്നില്.ഇത് പുതിയതായി വരുന്ന പ്ലാനുകളാണോ?കോളും എസ്എംഎസും മാത്രം നല്കുന്ന Special Tariff Vouchers (STVs) അവതരിപ്പിക്കാന് TRAI നേരത്തെ തന്നെ നിര്ദേശം നല്കിയിരുന്നു. 2025 ജനുവരിയില് ജിയോ, എയര്ടെല് ഉള്പ്പെടെയുള്ള കമ്പനികള് ഇത്തരം പ്ലാനുകള് അവതരിപ്പിക്കുകയും ചെയ്തിരുന്നു. ഉദാഹരണത്തിന് അന്ന് എയര്ടെല് 84 ദിവസത്തേക്കുള്ള 499 രൂപയുടെ പ്ലാനും 365 ദിവസത്തേക്കുള്ള 1,959 രൂപയുടെ പ്ലാനും അവതരിപ്പിച്ചിരുന്നു. ജിയോ 84 ദിവസത്തെയും 365 ദിവസത്തെയും വോയ്സ് എസ്എംഎസ് ഒണ്ലി പ്ലാനുകള് അവതരിപ്പിച്ചിരുന്നു.2024 ഡിസംബറില് കൊണ്ടുവന്ന നിയമഭേദഗതിയില് ടെലികോം കമ്പനികള് കുറഞ്ഞത് ഒരു Voice + SMS-only voucher നല്കണമെന്ന് TRAI നിര്ദേശിച്ചിരുന്നു. അതിന്റെ വാലിഡിറ്റി പരമാവധി 365 ദിവസം വരെയാകാമായിരുന്നു. അതായത് പുതിയ നിയമം ഇത്തരം പ്ലാനുകള് ആദ്യമായി അവതരിപ്പിക്കുന്നതല്ല. നിലവിലുള്ള Voice-SMS-only റീചാര്ജ് സംവിധാനത്തെ കൂടുതല് വിപുലപ്പെടുത്തുകയാണ്.എന്താണ് പുതിയ മാറ്റം ?നിലവില് വോയ്സ്-എസ്എംഎസ് പ്ലാനുകള് ലഭ്യമാണെങ്കിലും അവയുടെ കാലാവധി ഓപ്ഷനുകള് പരിമിതമാണെന്ന് TRAI വിലയിരുത്തി. പ്രത്യേകിച്ച് ചെറിയ കാലയളവിലേക്ക് റീചാര്ജ് ചെയ്യാന് ആഗ്രഹിക്കുന്നവര്ക്ക് ഓപ്ഷനുകള് കുറവായിരുന്നു. ഇത് പരിഹരിക്കാനാണ് പുതിയ ഭേദഗതി. ഇനി ഒരു ടെലികോം കമ്പനി Voice + SMS + Data ഉള്പ്പെടുന്ന ഒരു പ്ലാന് ഒരു പ്രത്യേക കാലാവധിയില് നല്കുന്നുണ്ടെങ്കില് അതിന് അനുയോജ്യമായ Voice + SMS-only STVയും നല്കേണ്ടിവരും. പ്രത്യേകിച്ച്30 ദിവസമോ അതില് കുറവോ ഉള്ള വാലിഡിറ്റിയില് കോള്, എസ്എംഎസ്, ഡാറ്റ ഉള്പ്പെടുന്ന പ്ലാന് ഉണ്ടെങ്കില് അതിന് Voice + SMS-only ഓപ്ഷനും വേണം30 ദിവസത്തില് കൂടുതലുള്ള ഓരോ വാലിഡിറ്റി കാലയളവിനും അനുയോജ്യമായ Voice + SMS-only voucher നല്കണംഒരേ തീയതിയില് ഓരോ മാസവും പുതുക്കാന് കഴിയുന്ന രീതിയിലുള്ള ഒരു Voice + SMS-only പ്ലാനും നല്കണംഇതിന് പുറമെ, മുകളില് പറഞ്ഞ കാലയളവുകളേക്കാള് കൂടുതല് വാലിഡിറ്റി ഉള്ള കുറഞ്ഞത് ഒരു Voice + SMS-only voucher കൂടി നല്കണം.30 ദിവസത്തെ പ്ലാന്' എന്നാല്?എല്ലാ മൊബൈല് റീചാര്ജുകളും ഇനി 30 ദിവസത്തേക്ക് ആയിരിക്കും എന്നല്ല TRAI പറഞ്ഞിരിക്കുന്നത്. പുതിയ നിയമം പറയുന്നത് കമ്പനികള് കോള്-എസ്എംഎസ് -ഡാറ്റ ഉള്പ്പെടുന്ന വിവിധ വാലിഡിറ്റി കാലയളവുകളില് പ്ലാനുകള് നല്കുന്നുണ്ടെങ്കില്, അതിന് സമാനമായ Voice + SMS-only ഓപ്ഷനുകളും നല്കണമെന്നാണ്. കൂടാതെ മാസംതോറും ഒരേ തീയതിയില് പുതുക്കാന് കഴിയുന്ന ഒരു Voice + SMS-only പ്ലാനും ഉണ്ടായിരിക്കണം. ആ തീയതി ഏതെങ്കിലും മാസത്തില് ഇല്ലെങ്കില് ആ മാസത്തിലെ അവസാന ദിവസമാണ് പുതുക്കല് തീയതിയായി കണക്കാക്കുക.
മൂന്ന് ദിവസം പണിമുടക്ക്; സെപ്റ്റംബർ 27 ഞായറാഴ്ച എല്ലാ പൊതുമേഖലാ ബാങ്കുകളും തുറന്ന് പ്രവർത്തിക്കും
ഞായറാഴ്ച ബാങ്കുകൾ (സെപ്റ്റംബർ 27) തുറന്നു പ്രവർത്തിക്കും. റിസർവ് ബാങ്ക് അനുമതിയോടെയാണ് ബാങ്കുകൾ പ്രവർത്തിക്കുക. സെപ്റ്റംബർ 28 മുതൽ തുടർച്ചയായി മൂന്നു ദിവസം ബാങ്ക് ജീവനക്കാർ പണിമുടക്ക് സമരം പ്രഖ്യാപിച്ചിരിക്കുന്ന സാഹചര്യത്തിലാണ് അസാധാരണ നടപടി.സെപ്റ്റംബർ 26 നാലാം ശനിയാഴ്ചയും 27 ഞായറാഴ്ചയും ആയതിനാൽ തുടർച്ചയായി അഞ്ച് ദിവസം ബാങ്ക് ഇടപാടുകൾ മുടങ്ങും. ഈ സാഹചര്യം കണക്കിലെടുത്താണ് ഞായറാഴ്ച ബാങ്കുകൾക്ക് പ്രവർത്തിക്കാൻ അനുമതി നൽകിയിരിക്കുന്നത്.ബാങ്ക് ജീവനക്കാരുടെ പ്രവൃത്തിദിനം അഞ്ചായി കുറയ്ക്കണമെന്ന് ആവശ്യപ്പെട്ട് യുഎഫ്ബിയു എന്ന സംഘടനയാണ് പണിമുടക്കിന് ആഹ്വാനം ചെയ്തിരിക്കുന്നത്. സമരം മുൻ നിർത്തി ബാങ്ക് ഇടപാടുകൾ മുൻകൂട്ടി പൂർത്തിയാക്കാൻ ബാങ്കുകൾ ഇടപാടുകാർക്ക് നിർദേശം നൽകിയിട്ടുണ്ട്. എടിഎമ്മുകളിൽ പണം നിറക്കാനുള്ള നടപടിയും സ്വീകരിച്ചിട്ടുണ്ട്.
ഗുണ്ടല്പേട്ടില് കാറും ലോറിയും കൂട്ടിയിടിച്ച് അപകടം; തച്ചനാട്ടുകര സ്വദേശിയായ യുവതി മരിച്ചു
തച്ചനാട്ടുകര: കര്ണാടകയിലെ ഗുണ്ടല്പേട്ടിലുണ്ടായ കാര് അപകടത്തില് മലപ്പുറം തച്ചനാട്ടുകര സ്വദേശിയായ യുവതി മരിച്ചു. പടിഞ്ഞാറേ പാലോട് പട്ടിശേരി മുഹമ്മദിന്റെ മകന് നബീലിന്റെ ഭാര്യ ലിസ്ന (28) ആണ് മരണപ്പെട്ടത്.ചൊവ്വാഴ്ചയാണ് നബീലിന്റെ ഭാര്യയും രണ്ടു മക്കളും ബന്ധുക്കളായ പാറക്കല്ലില് കരീം ഹാജിയുടെ മകന് സബീദ്, അദ്ദേഹത്തിന്റെ ഭാര്യ, മകന് എന്നിവരടങ്ങുന്ന സംഘം പാലോടുനിന്ന് മൈസൂരിലേക്ക് വിനോദയാത്ര പുറപ്പെട്ടത്.ബുധനാഴ്ച വൈകുന്നേരം ആറുമണിയോടെ മൈസൂരില് നിന്ന് നാട്ടിലേക്ക് മടങ്ങുന്നതിനിടെ ഇവര് സഞ്ചരിച്ചിരുന്ന കാര് ഗുണ്ടല്പേട്ടില് വെച്ച് ലോറിയുമായി കൂട്ടിയിടിക്കുകയായിരുന്നു. അപകടത്തില് ഗുരുതരമായി പരിക്കേറ്റ ലിസ്ന മരണപ്പെടുകയായിരുന്നു. മൃതദേഹം നിലവില് ഗുണ്ടല്പേട്ട് താലൂക്ക് സര്ക്കാര് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്.
താത്കാലിക നിയമനം
ജില്ലാ പഞ്ചായത്തിൻ്റെ തെരുവുനായ്ക്കളുടെ വന്ധ്യംകരണ പദ്ധതിയുടെ (എ ബി സി) നടത്തിപ്പിന്റെ ഭാഗമായി പടിഞ്ഞാറത്തറ എ ബി സി സെൻ്ററിലെ ശുചീകരണ തൊഴിലാളി തസ്തികയിലേക്ക് താൽക്കാലിക നിയമനം നടത്തുന്നു. ഒരു ഒഴിവിലേക്കാണ് നിയമനം. മാസ വേതനം 12000 രൂപ. താത്പര്യമുള്ളവർ തിരിച്ചറിയൽ രേഖയുടെ അസലും പകർപ്പും സഹിതം സെപ്റ്റംബർ 26 ന് രാവിലെ 11 ന് ജില്ലാ മൃഗസംരക്ഷണ ഓഫീസിൽ അഭിമുഖത്തിന് എത്തണം. ഫോൺ:04936 202292.
സംസ്ഥാനത്ത് ഇന്നും ശക്തമായ മഴയ്ക്ക് സാധ്യത; അഞ്ച് ജില്ലകളിൽ യെല്ലോ അലേർട്ട്
സംസ്ഥാനത്ത് വ്യാപകമായ ഒറ്റപ്പെട്ട മഴയ്ക്ക് സാധ്യതയെന്ന് കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു. ഇന്ന് കേരളത്തില് അഞ്ച് ജില്ലകളില് മഴ മുന്നറിയിപ്പ് പ്രഖ്യാപിച്ചിട്ടുണ്ട്. മലപ്പുറം, കോഴിക്കോട്, വയനാട്, കണ്ണൂര്, കാസര്കോട് എന്നീ ജില്ലകളിലാണ് യെല്ലോ അലേര്ട്ട് പ്രഖ്യാപിച്ചത്.നാളെ ഏഴ് ജില്ലകൾക്ക് കാലാവസ്ഥാ നിരീക്ഷണ കേന്ദ്രം മഴ മുന്നറിയിപ്പ് പുറപ്പെടിവിച്ചിട്ടുണ്ട്. മലപ്പുറം, കോഴിക്കോട്, വയനാട്, കണ്ണൂര്, കാസര്കോഡ്, തിരുവനന്തപുരം, കൊല്ലം, പത്തനംതിട്ട എന്നീ ജില്ലകളിലാണ് നാളെ യെല്ലോ അലേർട്ട് പ്രഖ്യാപിച്ചത്. ഇവിടെ ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. തീരപ്രദേശത്തുള്ളവർ ഈ ദിവസങ്ങളിൽ ജാഗ്രത പാലിക്കണമെന്നും നിർദേശമുണ്ട്.
